១០. អកប្បិយមំសនិទ្ទេសវណ្ណនា

១១៣. ឥទានិ មំសេសុ បដិបជ្ជិតព្ពាការំ ទស្សេតុំ ‘‘មំសេសុ ច អកប្បិយ’’ន្តិ ឧទ្ធដំ. អកប្បិយមំសម្ហិ ទស្សិតេ កប្បិយមំសំ ទស្សិតមេវ ហោតិ បារិសេសនយេន. ឧរគស្ស ចាតិ ឯត្ថ សព្ពោបិ ឧរគោ ន កប្បតិ.

១១៤. ឯត្តាវតា ជាតិវសេន ទសវិធម្បិ អកប្បិយមំសំ ទស្សេត្វា ឥទានិ កប្បិយមំសេសុបិ អកប្បិយវិធិំ ទស្សេតុំ ‘‘ឧទ្ទិស្សកតមំសញ្ច, យញ្ច អប្បដិវេក្ខិត’’ន្តិ វុត្តំ. តត្ថ បញ្ចសុ សហធម្មិកេសុ យស្ស កស្សចិ យំ កិញ្ចិ ឧទ្ទិស្ស កតំ ឧទ្ទិស្សកតំ នាម, តំ បន ជានិត្វា បរិភុញ្ជិតុំ សព្ពេសម្បិ ន វដ្ដតិ, អជានន្តានំ អនាបត្តិ. មច្ឆេសុបិ ឯសេវ នយោ. អប្បដិវេក្ខិតន្តិ អនុបបរិក្ខិតំ, អនាបុច្ឆិតន្តិ អត្ថោ. ‘‘ន ភិក្ខវេ អប្បដិវេក្ខិត្វា មំសំ បរិភុញ្ជិតព្ពំ, យោ បរិភុញ្ជេយ្យ, អាបត្តិ ទុក្កដស្សា’’តិ (មហាវ. ២៨១) វុត្តំ. មច្ឆេសុ បន អាបុច្ឆនកិច្ចំ នត្ថិ អកប្បិយមច្ឆានំ នត្ថិតាយាតិ វទន្តិ. ឥទានិ ឯតេសុ អាបត្តិភេទំ ទស្សេតុំ ‘‘ថុល្លច្ចយ’’ន្តិអាទិមាហ. តំ សព្ពំ (កង្ខា. អដ្ឋ. សន្និធិការកសិក្ខាបទវណ្ណនា) ឧត្តានមេវ.

១១៥. ឥទានិ ន កេវលំ ឥមេសំ មនុស្សាទីនំ មំសមេវ អកប្បិយំ, អដ្ឋិអាទីនិបិ អកប្បិយានីតិ ទស្សេតុំ ‘‘អដ្ឋីបី’’តិអាទិ វុត្តំ. តត្ថ (មហាវ. អដ្ឋ ២៨១) លោមម្បេសន្តិ លោមម្បិ ឯសំ អកប្បិយមំសវត្ថូនន្តិ អត្ថោ. សចិត្តកំ វាតិ ឯតេសុ បន ឧទ្ទិស្សកតមេវ សចិត្តកំ, សេសា អចិត្តកាតិ. អកប្បិយមំសវិនិច្ឆយោ.

អកប្បិយមំសនិទ្ទេសវណ្ណនា និដ្ឋិតា.