១០. រាជសិក្ខាបទវណ្ណនា

‘‘ឋានំ ភញ្ជតិ, អាគតការណំ វិនាសេតី’’តិ វុត្តត្តា បុន ចោទនំ ន លភតីតិ ឯកេ. អាគមនស្ស សាត្ថកំ ន ហោតិ, ចីវរំ ន លភិស្សតិ បដិសន្ថារស្ស កតត្តាតិ ឯកេ. ចោទនាលក្ខណំ ន ហោតីតិ កត្វា វុត្តន្តិ ឯកេ. ‘‘ធម្មទេសនាធិប្បាយាទិនា ន បដិសន្ថារោ កាតព្ពោ’’តិ ឧបតិស្សត្ថេរោ ‘‘‘អាគតការណំ វិនាសេតី’តិ ចោទនាឋានានិ ភញ្ជតិ, ចោទេតុកាមោ អកត្តព្ពមកាសិ, តប្បច្ចយា វត្តភេទេ ទុក្កដ’’ន្តិ ច វទតិ. ធម្មសិរិត្ថេរោ បន ‘‘អាសនេ ចេ និសីទតិ, ឯកាយ និសជ្ជាយ ទ្វេ ឋានានិ ភញ្ជតិ. អាមិសំ ចេ បដិគ្គណ្ហាតិ, ឯកេន បដិគ្គហណេន ទ្វេ ឋានានិ ភញ្ជតិ. ធម្មំ ចេ ភាសតិ, ធម្មទេសនាសិក្ខាបទេ វុត្តបរិច្ឆេទាយ ឯកាយ វាចាយ ទ្វេ ឋានានិ ភញ្ជតិ. តំ សន្ធាយ ‘អាគតការណំ វិនាសេតី’តិ វុត្ត’’ន្តិ វទតិ. ‘‘ឯសោ ខោ’’តិ វុត្តេន សញ្ញត្តោ ឯកោ, ‘‘អយំ វេយ្យាវច្ចករោតិ…បេ… អវុត្តេបិ ចោទេតុំ វដ្ដតី’’តិ វុត្តោ ទុតិយោ, សចេ បន ទូតោ គច្ឆន្តោវ ‘‘អហំ តស្ស ហត្ថេ ទស្សាមី’’តិអាទិនា វុត្តោ តតិយោ, ‘‘អញ្ញំ វា បេសេត្វា អារោចាបេតី’’តិ វុត្តោ ចតុត្ថោតិ យថា ភិក្ខុនា និទ្ទិដ្ឋា ចត្តារោ, តថេវ ទូតេន និទ្ទិដ្ឋា ចត្តារោ. មុខវេវដិកកប្បិយការកោ, បរម្មុខកប្បិយការកោ ចេតិ ឯតេសុ អញ្ញាតកអប្បវារិតេសុ វិយ បដិបជ្ជិតព្ពន្តិ លិខិតំ.

រាជសិក្ខាបទវណ្ណនា និដ្ឋិតា.

ចីវរវគ្គោ បឋមោ.