៣. វិកាលគាមប្បវេសនសិក្ខាបទវណ្ណនា

ចារិត្តេតិ ចារិត្តសិក្ខាបទេ. ឧបចារន្តិ ទុតិយលេឌ្ឌុបាតំ. អញ្ញំ គាមំ គច្ឆន្តានំ បុន អាបុច្ឆនកិច្ចំ នត្ថីតិ ឧស្សាហំ អប្បដិប្បស្សម្ភេត្វា អញ្ញំ គាមំ គច្ឆន្តានំ គាមសតម្បិ ហោតុ, បុន អាបុច្ឆនកិច្ចំ នត្ថីតិ អត្ថោ. តេនាហ ‘‘សចេ បនា’’តិអាទិ. ឧស្សាហន្តិ គាមប្បវិសនុស្សាហំ. អន្តរារាមាទីសុ (បាចិ. អដ្ឋ. ៥១៥) ន កេវលំ អនាបុច្ឆា គច្ឆន្តស្សេវ, កាយពន្ធនំ អពន្ធិត្វា សង្ឃាដិំ អបារុបិត្វា គច្ឆន្តស្សាបិ អនាបត្តិ. អាបទាសូតិ សីហោ វា ព្យគ្ឃោ វា អាគច្ឆតិ, មេឃោ វា ឧដ្ឋេតិ, អញ្ញោ វា កោចិ ឧបទ្ទវោ ឧប្បជ្ជតិ, អនាបត្តិ. ឯវរូបាសុ អាបទាសុ ពហិគាមតោ អន្តោគាមំ បវិសិតុំ វដ្ដតិ.

វិកាលគាមប្បវេសនសិក្ខាបទវណ្ណនា និដ្ឋិតា.