៦. ជោតិសិក្ខាបទវណ្ណនា

អគិលានោតិ យស្ស វិនា អគ្គិនា ផាសុ ហោតិ, សោ ឥធ អគិលានោ នាម. ជោតិន្តិ អគ្គិំ.

ភគ្គេសូតិ ឯវំនាមកេ ជនបទេ. ភគ្គានាម ជានបទិនោ រាជកុមារា, តេសំ និវាសោ ឯកោបិ ជនបទោ រុឡ្ហិសទ្ទេន ‘‘ភគ្គា’’តិ វុច្ចតិ. តេន វុត្តំ ‘‘ភគ្គេសូតិ ឯវំនាមកេ ជនបទេ’’តិ. តថា បតិលាតំ ឧក្ខិបន្តស្សាតិ ឌយ្ហមានំ អលាតំ បតិតំ ឧក្ខិបន្តស្ស តថា ទុក្កដន្តិ អត្ថោ. តញ្ចាតិ ទុក្កដំ បរាមសតិ. អវិជ្ឈាតន្តិ អនិព្ពុតាលាតំ. បទីបជោតិកជន្តាឃរេតិ បទីបុជ្ជលនបត្តបចនសេទកម្មាទីសុ ជោតិករណេ អគ្គិសាលាយញ្ច សមាទហន្តស្ស អនាបត្តីតិ អត្ថោ. តថារូបប្បច្ចយេតិ ឋបេត្វា បទីបាទីនិ អញ្ញស្មិម្បិ តថារូបបច្ចយេ. អាបទាសូតិ ទុដ្ឋវាឡមិគអមនុស្សេហិ ឧបទ្ទវេសុ.

ជោតិសិក្ខាបទវណ្ណនា និដ្ឋិតា.