៤. អនាទរិយសិក្ខាបទវណ្ណនា

ទុវិធញ្ហេត្ថ អនាទរិយំ បុគ្គលានាទរិយញ្ច ធម្មានាទរិយញ្ចាតិ អាហ ‘‘បុគ្គលស្ស វា’’តិអាទិ. តត្ថ យោ ភិក្ខុ ឧបសម្បន្នេន បញ្ញត្តេន វុច្ចមានោ ‘‘អយំ ឧក្ខិត្តកោ វា វម្ភិតោ វា គរហិតោ វា, ឥមស្ស វចនំ អកតំ ភវិស្សតី’’តិ (បាចិ. ៣៤២) អនាទរិយំ ករោតិ, អយំ បុគ្គលេ អនាទរិយំ ករោតិ នាម. យោ បន បញ្ញត្តេន វុច្ចមានោ ‘‘កថាយំ នស្សេយ្យ វា វិនស្សេយ្យ វា អន្តរធាយេយ្យ វា’’តិ, តំ វា នសិក្ខិតុកាមោ អនាទរិយំ ករោតិ, អយំ ធម្មេ អនាទរិយំ ករោតិ នាម. តេនាហ ‘‘តស្មា’’តិអាទិ.

ឥទំ ន សល្លេខាយ សំវត្តតីតិ សម្មា កិលេសេ លិខតីតិ សល្លេខោ, អប្បិច្ឆតា, តទត្ថំ នយិទំ សំវត្តតិ. អាទិសទ្ទេន ‘‘ឥទំ ន ធុតត្ថាយ សំវត្តតិ, ន បាសាទិកតាយ, ន អបចយាយ, ន វីរិយារម្ភាយ សំវត្តតី’’តិ (បាចិ. ៣៤៣) ឥទំ សង្គណ្ហាតិ. អបញ្ញត្តេនាតិ សុត្តេ វា អភិធម្មេ វា អាគតេន. បវេណិអាគតន្តិ សង្គីតិកាលតោ បដ្ឋាយ មហាកស្សបាទិអាចរិយបរម្បរាយ អាគតំ. សចេ បន យស្មា ឧច្ឆុរសោ សត្តាហកាលិកោ, តស្ស កសដោ យាវជីវិកោ, ទ្វិន្នំយេវ សមវាយោ ឧច្ឆុយដ្ឋិ, តស្មា វិកាលេ ឧច្ឆុយដ្ឋិំ ខាទិតុំ វដ្ដតិ គុឡហរីតកំ វិយាតិ ឯវមាទិកំ គារយ្ហាចរិយុគ្គហំ គហេត្វា ‘‘ឯវំ អម្ហាកំ អាចរិយានំ ឧគ្គហោ បរិបុច្ឆា’’តិ ភណតិ, អាបត្តិយេវ.

អនាទរិយសិក្ខាបទវណ្ណនា និដ្ឋិតា.