៦. ចារិត្តសិក្ខាបទវណ្ណនា

អន្តោឧបចារសីមាយ ទស្សនូបចារេ ភិក្ខុំ ទិស្វាតិ យត្ថ ឋិតស្ស កុលានិ បយិរុបាសនចិត្តំ ឧប្បន្នំ, តតោ បដ្ឋាយ គច្ឆន្តោ អន្តោឧបចារសីមាយ ទស្សនូបចារេ ភិក្ខុំ បស្សេ វា អភិមុខេ វា ទិស្វា. បកតិវចនេនាតិ យំ ទ្វាទសហត្ថព្ភន្តរេ ឋិតេន សោតុំ សក្កា, តាទិសេន វចនេន, ឥតោ ចិតោ ច បរិយេសិត្វា អារោចនកិច្ចំ បន នត្ថិ. យោ ហិ ឯវំ បរិយេសិតព្ពោ, សោ អសន្តោយេវ. តេនាហ ‘‘តាទិស’’ន្តិអាទិ. អនាបុច្ឆិត្វាតិ អនារោចេត្វា.

អន្តរារាមភិក្ខុនុបស្សយតិត្ថិយសេយ្យបដិក្កមនភត្តិយឃរានីតិ ឯត្ថ អន្តរារាមន្តិ អន្តោគាមេ វិហារោ. បដិក្កមនន្តិ អាសនសាលា. ភត្តិយឃរន្តិ និមន្តិតឃរំ វា សលាកភត្តាទិទាយកានំ វា ឃរំ. អាបទាសូតិ ជីវិតព្រហ្មចរិយន្តរាយេសុ. កិរិយាកិរិយន្តិ ឯត្ថ កុលេសុ ចារិត្តាបជ្ជនំ កិរិយំ, អនាបុច្ឆនំ អកិរិយន្តិ វេទិតព្ពំ.

ចារិត្តសិក្ខាបទវណ្ណនា និដ្ឋិតា.