៤. បហារសិក្ខាបទវណ្ណនា

ចតុត្ថេ បហារំ ទទេយ្យាតិ ឯត្ថ បហរិតុកាមតាយ បហារេ ទិន្នេ សចេបិ មរតិ, បាចិត្តិយមេវ.

សាវត្ថិយំ ឆព្ពគ្គិយេ អារព្ភ បហារទានវត្ថុស្មិំ បញ្ញត្តំ, សាធារណបញ្ញត្តិ, អនាណត្តិកំ, តិកបាចិត្តិយំ, អនុបសម្បន្នេ តិកទុក្កដំ, វិរូបករណាធិប្បាយេន បន ឧបសម្បន្នស្សបិ កណ្ណាទិច្ឆេទនេ ទុក្កដមេវ. កេនចិ វិហេឋិយមានស្ស បន មោក្ខាធិប្បាយស្ស, ឧម្មត្តកាទីនញ្ច អនាបត្តិ. កុបិតតា, ន មោក្ខាធិប្បាយតា, ឧបសម្បន្នស្ស បហារទានន្តិ ឥមានេត្ថ តីណិ អង្គានិ. សមុដ្ឋានាទីនិ បឋមបារាជិកសទិសានិ, ឥទំ បន ទុក្ខវេទនន្តិ.

បហារសិក្ខាបទវណ្ណនា និដ្ឋិតា.