១. អចេលកសិក្ខាបទវណ្ណនា

អចេលកវគ្គស្ស បឋមេ ឯតេសំ អចេលកាទីនំ អញ្ញតិត្ថិយានំ យំកិញ្ចិ អាមិសំ ឯកប្បយោគេន ទេន្តស្ស ឯកំ បាចិត្តិយំ, អវច្ឆិន្ទិត្វា អវច្ឆិន្ទិត្វា ទេន្តស្ស បយោគេ បយោគេ បាចិត្តិយំ.

វេសាលិយំ អាយស្មន្តំ អានន្ទំ អារព្ភ បរិព្ពាជិកាយ ទ្វេ បូវេ ទានវត្ថុស្មិំ បញ្ញត្តំ, អសាធារណបញ្ញត្តិ, អនាណត្តិកំ, តិកបាចិត្តិយំ, ឧទកទន្តបោនំ ទេន្តស្ស, អតិត្ថិយេ តិត្ថិយសញ្ញិស្ស, វេមតិកស្ស ច ទុក្កដំ. អតិត្ថិយេ អតិត្ថិយសញ្ញិស្ស, អនុបសម្បន្នេន ទាបេន្តស្ស, តេសំ សន្តិកេ ភាជនំ និក្ខិបិត្វា ‘‘ឥទំ គណ្ហថា’’តិ ភណន្តស្ស, តេសំ វា និក្ខិត្តភាជនេ ទេន្តស្ស, ពាហិរលេបំ ទេន្តស្ស, ឧម្មត្តកាទីនញ្ច អនាបត្តិ. អញ្ញតិត្ថិយតា, អននុញ្ញាតតា, អជ្ឈោហរណីយំ អជ្ឈោហរណត្ថាយ សហត្ថា អនិក្ខិត្តភាជនេ ទានន្តិ ឥមានេត្ថ តីណិ អង្គានិ. សមុដ្ឋានាទីនិ ឯឡកលោមសទិសានីតិ.

អចេលកសិក្ខាបទវណ្ណនា និដ្ឋិតា.