កុសលកម្មបថទសកវណ្ណនា

បាណាតិបាតា …បេ… វេទិតព្ពានិ លោកិយលោកុត្តរមិស្សកវសេនេត្ថ កុសលកម្មបថានំ ទេសិតត្តា. វេរហេតុតាយ វេរសញ្ញិតំ បាណាតិបាតាទិបាបធម្មំ មណតិ ‘‘មយិ ឥធ ឋិតាយ កថំ អាគច្ឆសី’’តិ តជ្ជន្តី វិយ នីហរតីតិ វេរមណី, វិរមតិ ឯតាយាតិ វា ‘‘វិរមណី’’តិ វត្តព្ពេ និរុត្តិនយេន ‘‘វេរមណី’’តិ វុត្តំ. សមាទានវសេន ឧប្បន្នា វិរតិ សមាទានវិរតិ. អសមាទិន្នសីលស្ស សម្បត្តតោ យថាឧបដ្ឋិតវីតិក្កមិតព្ពវត្ថុតោ វិរតិ សម្បត្តវិរតិ. កិលេសានំ សមុច្ឆិន្ទនវសេន បវត្តា មគ្គសម្បយុត្តា វិរតិ សមុច្ឆេទវិរតិ. កាមញ្ចេត្ថ បាឡិយំ វិរតិយេវ អាគតា, សិក្ខាបទវិភង្គេ (វិភ. ៧០៣) បន ចេតនាបិ អាហរិត្វា ទស្សិតាតិ តទុភយម្បិ គណ្ហន្តោ ‘‘ចេតនាបិ វត្តន្តិ វិរតិយោបី’’តិ អាហ. អនភិជ្ឈា ហិ មូលំ បត្វាតិ កម្មបថកោដ្ឋាសេ ‘‘អនភិជ្ឈា’’តិ វុត្តធម្មោ មូលតោ អលោភោ កុសលមូលំ ហោតីតិ ឯវមេត្ថ អត្ថោ ទដ្ឋព្ពោ. សេសបទទ្វយេបិ ឯសេវ នយោ.

ទុស្សីល្យារម្មណា តទារម្មណជីវិតិន្ទ្រិយាទិអារម្មណា កថំ ទុស្សីល្យានិ បជហន្តីតិ តំ ទស្សេតុំ ‘‘យថា បនា’’តិអាទិ វុត្តំ. បជហន្តីតិ វេទិតព្ពា បាណាតិបាតាទីហិ វិរមណវសេនេវ បវត្តនតោ. អថ តទារម្មណភាវេ, ន សោ តានិ បជហតិ. ន ហិ តទេវ អារព្ភ តំ បជហិតុំ សក្កា តតោ អវិនិស្សដភាវតោ.

អនភិជ្ឈា…បេ… វិរមន្តស្សាតិ អភិជ្ឈំ បជហន្តស្សាតិ អត្ថោ. ន ហិ មនោទុច្ចរិតតោ វិរតិ អត្ថិ អនភិជ្ឈាទីហេវ តប្បហានសិទ្ធិតោ.