អរិយវាសទសកវណ្ណនា

៣៤៨. អរិយានមេវ វាសាតិ អរិយវាសា អនរិយានំ តាទិសានំ អសម្ភវតោ. អរិយាតិ ចេត្ថ ឧក្កដ្ឋនិទ្ទេសេន ខីណាសវា គហិតា, តេ ច យស្មា តេហិ សព្ពកាលំ អវិរហិតវាសា ឯវ, តស្មា វុត្តំ ‘‘អរិយា ឯវ វសិំសុ វសន្តិ វសិស្សន្តី’’តិ. តត្ថ វសិំសូតិ និស្សាយ វសិំសុ. បញ្ចង្គវិប្បហីនត្តាទយោ ហិ អរិយានំ អបស្សយា. តេសុ បញ្ចង្គវិប្បហានបច្ចេកសច្ចបនោទនឯសនាសមវយវិស្សជ្ជនានិ ‘‘សង្ខាយេកំ បដិសេវតិ, អធិវាសេតិ, បរិវជ្ជេតិ, វិនោទេតី’’តិ វុត្តេសុ អបស្សេនេសុ វិនោទនញ្ច មគ្គកិច្ចានេវ, ឥតរេ មគ្គេនេវ សមិជ្ឈន្តិ.

ញាណាទយោតិ ញាណញ្ចេវ តំសម្បយុត្តធម្មា ច. តេនាហ ‘‘ញាណន្តិ វុត្តេ’’តិអាទិ. តត្ថ វត្តព្ពំ ហេដ្ឋា វុត្តមេវ.

អារក្ខកិច្ចំ សាធេតិ សតិវេបុល្លប្បត្តត្តា. ‘‘ចរតោ’’តិអាទិនា និច្ចសមាទានំ ទស្សេតិ, តំ វិក្ខេបាភាវេន ទដ្ឋព្ពំ.

បព្ពជ្ជុបគតាតិ យំ កិញ្ចិ បព្ពជ្ជំ ឧបគតា, ន សមិតបាបា. ភោវាទិនោតិ ជាតិមត្តព្រាហ្មណេ វទតិ. បាដេក្កសច្ចានីតិ តេហិ តេហិ ទិដ្ឋិគតិកេហិ បាដិយេក្កំ គហិតានិ ‘‘ឥទមេវ សច្ច’’ន្តិ (ម. និ. ២.១៨៧, ២០៣, ៤២៧; ៣.២៧; ឧទា. ៥៥; នេត្តិ. ៥៩) អភិនិវិដ្ឋានិ ទិដ្ឋិសច្ចាទីនិ. ទិដ្ឋិគតានិបិ ហិ ‘‘ឥទមេវ សច្ច’’ន្តិ (ម. និ. ២.១៨៧, ២០២, ៤២៧; ៣.២៧, ២៩; នេត្តិ. ៥៩) គហណំ ឧបាទាយ ‘‘សច្ចានី’’តិ វោហរីយន្តិ. តេនាហ ‘‘ឥទមេវា’’តិអាទិ. នីហដានីតិ អត្តនោ សន្តានតោ នីហរិតានិ អបនីតានិ. គហិតគ្គហណស្សាតិ អរិយមគ្គាធិគមតោ បុព្ពេ គហិតស្ស ទិដ្ឋិគាហស្ស. វិស្សដ្ឋភាវវេវចនានីតិ អរិយមគ្គេន សព្ពសោ បរិច្ចាគភាវស្ស អធិវចនានិ.

នត្ថិ ឯតាសំ វយោ វេកល្យន្តិ អវយាតិ អាហ ‘‘អនូនា’’តិ, អនវសេសាតិ អត្ថោ. ឯសនាតិ ហេដ្ឋា វុត្តកាមេសនាទយោ.

មគ្គស្ស កិច្ចនិប្ផត្តិ កថិតា រាគាទីនំ បហីនភាវទីបនតោ.

បច្ចវេក្ខណាយ ផលំ កថិតន្តិ បច្ចវេក្ខណមុខេន អរិយផលំ កថិតំ. អធិគតេ ហិ អគ្គផលេ សព្ពសោ រាគាទីនំ អនុប្បាទធម្មតំ បជានាតិ, តញ្ច បជាននំ បច្ចវេក្ខណញាណន្តិ.