សតតវិហារឆក្កវណ្ណនា

៣២៨. និច្ចវិហារាតិ សព្ពទា បវត្តនកវិហារា. ឋបេត្វា ហិ សមាបត្តិវេលំ, ភវង្គវេលញ្ច ខីណាសវា ឥមិនាវ ឆឡង្គុបេក្ខាវិហារេន សព្ពកាលំ វិហរន្តិ. ចក្ខុនា រូបំ ទិស្វាតិ និស្សយវោហារេន វុត្តំ. សសម្ភារកថា ហេសា យថា ‘‘ធនុនា វិជ្ឈតី’’តិ. តស្មា និស្សយសីសេន និស្សិតស្ស គហណំ ទដ្ឋព្ពន្តិ អាហ ‘‘ចក្ខុវិញ្ញាណេន ទិស្វា’’តិ. ឥដ្ឋេ អរជ្ជន្តោតិ ឥដ្ឋេ អារម្មណេ រាគំ អនុប្បាទេន្តោ មគ្គេន សមុច្ឆិន្នត្តា. នេវ សុមនោ ហោតិ គេហសិតបេមវសេនបិ. ន ទុម្មនោ បសាទញ្ញថត្តវសេនបិ. អសមបេក្ខនេតិ ឥដ្ឋេបិ អនិដ្ឋេបិ មជ្ឈត្តេបិ អារម្មណេ ន សមំ ន សម្មា អយោនិសោ គហណេ. យោ អខីណាសវានំ មោហោ ឧប្បជ្ជតិ, តំ អនុប្បាទេន្តោ មគ្គេនេវ តស្ស សមុគ្ឃាដិតត្តា. ញាណុបេក្ខាវសេនេវ ឧបេក្ខកោ វិហរតិ មជ្ឈត្តោ. អយញ្ចស្ស បដិបត្តិវេបុល្លប្បត្តិយា, បញ្ញាវេបុល្លប្បត្តិយា វាតិ អាហ ‘‘សតិយា’’តិអាទិ. ឆឡង្គុបេក្ខាតិ ឆសុ ទ្វារេសុ បវត្តា សតិសម្បជញ្ញស្ស វសេន ឆាវយវា ឧបេក្ខា. ញាណសម្បយុត្តចិត្តានិ លព្ភន្តិ តេហិ វិនា សម្បជានតាយ អសម្ភវតោ. មហាចិត្តានីតិ អដ្ឋបិ មហាកិរិយចិត្តានិ លព្ភន្តិ. សតតវិហារាតិ ញាណុប្បត្តិបច្ចយរហិតកាលេបិ បវត្តិភេទនតោ. ទស ចិត្តានីតិ អដ្ឋ មហាកិរិយចិត្តានិ ហសិតុប្បាទវោដ្ឋព្ពនចិត្តេហិ សទ្ធិំ ទស ចិត្តានិ លព្ភន្តិ. អរជ្ជនាទុស្សនវសេន បវត្តិ តេសម្បិ សាធារណាតិ.‘‘ឧបេក្ខកោ វិហរតី’’តិ វចនតោ ឆឡង្គុបេក្ខាវសេន អាគតានំ ឥមេសំ សតតវិហារានំ ‘‘សោមនស្សំ កថំ លព្ភតី’’តិ ចោទេត្វា ‘‘អាសេវនតោ លព្ភតី’’តិ សយមេវ បរិហរតីតិ. កិញ្ចាបិ ខីណាសវោ ឥដ្ឋានិដ្ឋេបិ អារម្មណេ មជ្ឈត្តេ វិយ ពហុលំ ឧបេក្ខកោ វិហរតិ អត្តនោ បរិសុទ្ធបកតិភាវាវិជហនតោ, កទាចិ បន តថា ចេតោភិសង្ខារាភាវេ យំ តំ សភាវតោ ឥដ្ឋំ អារម្មណំ, តត្ថ យាថាវសភាវគ្គហណវសេនបិ អរហតោ ចិត្តំ សោមនស្សសហគតំ ហុត្វា បវត្តតេវ, តញ្ច ខោ បុព្ពាសេវនវសេន. តេនាហ ‘‘អាសេវនតោ លព្ភតី’’តិ.