អភិជាតិឆក្កវណ្ណនា

៣២៩. ‘‘អភិជាតិយោ’’តិ ឯត្ថ អភិ-សទ្ទោ ឧបសគ្គមត្តំ, ន អត្ថវិសេសជោតកោតិ អាហ ‘‘ជាតិយោ’’តិ. អភិជាយតីតិ ឯត្ថាបិ ឯសេវ នយោ. ជាយតីតិ ច អន្តោគធហេតុអត្ថបទំ, ឧប្បាទេតីតិ អត្ថោ. ជាតិយា, តំនិព្ពត្តកកម្មានញ្ច កណ្ហសុក្កបរិយាយតាយ យំ វត្តព្ពំ, តំ ហេដ្ឋា វុត្តមេវ. បដិប្បស្សម្ភនវសេន កិលេសានំ និព្ពាបនតោ និព្ពានំ សចេ កណ្ហំ ភវេយ្យ យថា តំ ទសវិធំ ទុស្សីល្យកម្មំ. សចេ សុក្កំ ភវេយ្យ យថា តំ ទានសីលាទិកុសលកម្មំ. ទ្វិន្នម្បិ កណ្ហសុក្កវិបាកានំ. អរហត្តំ អធិប្បេតំ ‘‘អភិជាយតី’’តិ វចនតោ. តំ កិលេសនិព្ពានន្តេ ជាតត្តា និព្ពានំ យថា រាគាទីនំ ខយន្តេ ជាតត្តា រាគក្ខយោ ទោសក្ខយោ មោហក្ខយោតិ.