វិវាទមូលឆក្កវណ្ណនា

៣២៥. កោធនោតិ កុជ្ឈនសីលោ. យស្មា សោ អប្បហីនកោធតាយ វិគតកោធនោ នាម ន ហោតិ, តស្មា ‘‘កោធេន សមន្នាគតោ’’តិ អាហ. ឧបនាហោ ឯតស្ស អត្ថិ, ឧបនយ្ហនសីលោតិ វា ឧបនាហី. វិវាទោ នាម ឧប្បជ្ជមានោ យេភុយ្យេន បឋមំ ទ្វិន្នំ វសេន ឧប្បជ្ជតីតិ វុត្តំ ‘‘ទ្វិន្នំ ភិក្ខូនំ វិវាទោ’’តិ. សោ បន យថា ពហូនំ អនត្ថាវហោ ហោតិ, តំ និទស្សនមុខេន ទស្សេន្តោ ‘‘កថ’’ន្តិអាទិមាហ. អព្ភន្តរបរិសាយាតិ បរិសព្ភន្តរេ.

បរគុណមក្ខនាយ បវត្តោបិ អត្តនោ ការកំ គូថេន បហរន្តំ គូថោ វិយ បឋមតរំ មក្ខេតីតិ មក្ខោ, សោ ឯតស្ស អត្ថីតិ មក្ខី. បលាសតីតិ បលាសោ, បរស្ស គុណេ ឌំសិត្វា វិយ អបនេតីតិ អត្ថោ, សោ ឯតស្ស អត្ថីតិ បលាសី. បលាសី បុគ្គលោ ហិ ទុតិយស្ស ធុរំ ន ទេតិ, សមំ បសារេត្វា តិដ្ឋតិ. តេនាហ ‘‘យុគគ្គាហលក្ខណេន បលាសេន សមន្នាគតោ’’តិ. ‘‘ឥស្សុកី’’តិអាទីនំ បទានមត្ថោ ហេដ្ឋា វុត្តនយត្តា សុវិញ្ញេយ្យោវ. កម្មបថប្បត្តាយ មិច្ឆាទិដ្ឋិយា វសេនេត្ថ មិច្ឆាទិដ្ឋិ វេទិតព្ពាតិ អាហ ‘‘នត្ថិកវាទី អហេតុកវាទី អកិរិយវាទី’’តិ.