២. បច្ចយបច្ចនីយវណ្ណនា

៤២-៤៤. តេវីសតិមូលកន្តិ ឥទញ្ចេត្ថ ទុមូលកំយេវ សន្ធាយ វុត្តន្តិ ឥទំ ទុកមូលកេ បុច្ឆានំ មូលភូតា តេវីសតិ ទុកា សម្ភវន្តីតិ តស្ស ‘‘តេវីសតិមូលក’’ន្តិ នាមំ កត្វា យាវ យត្តកោ បភេទោ អត្ថិ, តាវ តត្តកំ តេវីសតិមូលកំ យថានុលោមេ វិត្ថារិតំ. ឯវំ បច្ចនីយេបិ វិត្ថារេតព្ពន្តិ ទុកមូលកេន តិកមូលកាទីសុ នយំ ទស្សេតីតិ ឥមិនា អធិប្បាយេន វុត្តំ សិយា. យទិ បន យាវ តេវីសតិមំ មូលំ យថា វិត្ថារិតន្តិ អយមត្ថោ អធិប្បេតោ, ‘‘យាវ តេវីសតិមំ មូល’’ន្ត្វេវ បាឋេន ភវិតព្ពំ សិយា. ន ហិ ‘‘តេវីសតិមូលក’’ន្តិ ឯតស្ស ព្យញ្ជនស្ស តេវីសតិមំ មូលកន្តិ អយមត្ថោ សម្ភវតិ. យថា អនុលោមេ ‘‘ឯកេកបទស្សា’’តិអាទិនា បន ឯកមូលាទិសព្ពមូលកបរិយោសានំ តត្ថ នយទស្សនវសេន ទស្សិតំ ឯកេកស្ស បទស្ស វិត្ថារំ ទស្សេតីតិ សព្ពមូលកមេវ ចេត្ថ ‘‘តេវីសតិមូលក’’ន្តិ វុត្តន្តិ វេទិតព្ពំ. តញ្ហិ តេវីសតិយា បច្ចយានំ អវសេសស្ស បច្ចយស្ស មូលភាវតោ ‘‘តេវីសតិមូលក’’ន្តិ ច តតោ បរំ មូលស្ស អញ្ញស្ស អភាវតោ ‘‘សព្ពមូលក’’ន្តិ ច វុច្ចតិ.

បច្ចយបច្ចនីយវណ្ណនា និដ្ឋិតា.