៣. អនុលោមបច្ចនីយវណ្ណនា

៤៥-៤៨. អនុលោមេ វុត្តេសុ សព្ពេសុ ឯកមូលកាទីសុ ឯកេកំ បទំ បរិហាបេត្វាតិ តត្ថ ឯកមូលកេ ចតុវីសតិ បច្ចយបទានិ ឥធ ឯកមូលកេ តេវីសតិ, ឯកោ បន បច្ចយោ មូលភាវេន ឋិតោ អបុព្ពតាភាវតោ អគណនូបគោ. តត្ថ ទុមូលកេ តេវីសតិ បច្ចយបទានិ គណនូបគានិ, ឥធ ទុមូលកេ ទ្វាវីសតីតិ ឯវំ បរិហាបេត្វាតិ អត្ថោ.

អនុលោមតោ ឋិតស្ស បច្ចនីយតោ អលព្ភមានានំ សុទ្ធិកបច្ចយានញ្ច អលព្ភមានតំ សន្ធាយ ‘‘លព្ភមានបទាន’’ន្តិ វុត្តំ. ន ហិ អញ្ញថា បុច្ឆាវសេន កោចិ បច្ចយោ អលព្ភមានោ នាម អត្ថីតិ. វិស្សជ្ជនាវសេនេវ វា បវត្តំ អនុលោមបច្ចនីយទេសនំ សន្ធាយ ‘‘លព្ភមានបទាន’’ន្តិ វុត្តំ.

អនុលោមបច្ចនីយវណ្ណនា និដ្ឋិតា.

បុច្ឆាវារវណ្ណនា និដ្ឋិតា.