៤. ទានកថាវណ្ណនា

៤៧៨. ទេយ្យធម្មវសេន ចោទេតុន្តិ យទិ ចេតសិកោវ ធម្មោ ទានំ, ‘‘ទិយ្យតីតិ ទាន’’ន្តិ ឥមិនាបិ អត្ថេន ចេតសិកស្សេវ ទានភាវោ អាបជ្ជតីតិ ចោទេតុន្តិ អត្ថោ.

៤៧៩. អនិដ្ឋផលន្តិអាទិ អចេតសិកស្ស ធម្មស្ស ទានភាវទីបនត្ថំ វុត្តន្តិ ផលទានភាវទីបនត្ថំ ន វុត្តន្តិ អត្ថោ ទដ្ឋព្ពោ. អនិដ្ឋផលន្តិអាទិនា អចេតសិកស្ស ធម្មស្ស ផលទានំ វុត្តំ វិយ ហោតិ, ន ទានភាវោ, តន្និវារណត្ថញ្ចេតមាហាតិ. ឯវញ្ច កត្វា អនន្តរមេវាហ ‘‘ន ហិ អចេតសិកោ អន្នាទិធម្មោ អាយតិំ វិបាកំ ទេតី’’តិ. ឥដ្ឋផលភាវនិយមនត្ថន្តិ ទេយ្យធម្មោ វិយ កេនចិ បរិយាយេន អនិដ្ឋផលតា ទានស្ស នត្ថិ, ឯកន្តំ បន ឥដ្ឋផលមេវាតិ និយមនត្ថន្តិ អត្ថោ.

ឥតរេនាតិ ‘‘ទិយ្យតីតិ ទាន’’ន្តិ ឥមិនា បរិយាយេន. ន បន ឯកេនត្ថេនាតិ ‘‘ទេយ្យធម្មោវ ទាន’’ន្តិ ឥមំ សកវាទីវាទំ និវត្តេតុំ ‘‘សទ្ធា ហិរិយ’’ន្តិអាទិកំ សុត្តសាធនំ បរវាទីវាទេ យុជ្ជតិ, ‘‘ឥធេកច្ចោ អន្នំ ទេតី’’តិអាទិកញ្ច, ‘‘ចេតសិកោវ ធម្មោ ទាន’’ន្តិ ឥមំ និវត្តេតុំ ‘‘ចេតសិកោ ធម្មោ ទាន’’ន្តិ ឥមំ បន សាធេតុំ ‘‘សទ្ធា ហិរិយ’’ន្តិអាទិកំ សកវាទីវាទេ យុជ្ជតិ, ‘‘ឥធេកច្ចោ អន្នំ ទេតី’’តិអាទិកំ វា ‘‘ទេយ្យធម្មោ ទាន’’ន្តិ សាធេតុន្តិ ឯវំ និវត្តនសាធនត្ថនានត្តំ សន្ធាយ ‘‘ន បន ឯកេនត្ថេនា’’តិ វុត្តន្តិ ទដ្ឋព្ពំ. តត្ថ យថា បរវាទីវាទេ ច សុត្តសាធនត្ថំ ‘‘ន វត្តព្ពំ ចេតសិកោ ធម្មោ ទាន’’ន្តិ បុច្ឆាយំ ចេតសិកោវាតិ អត្ថោ ទដ្ឋព្ពោ, តថា ‘‘ន វត្តព្ពំ ទេយ្យធម្មោ ទាន’’ន្តិ បុច្ឆាយ ច ទេយ្យធម្មោវាតិ. ទេយ្យធម្មោ ឥដ្ឋផលោតិ ឥដ្ឋផលាភាវមត្តមេវ បដិក្ខិត្តន្តិ ឯត្ថ ‘‘ឥដ្ឋផលភាវមត្តមេវ បដិក្ខិត្ត’’ន្តិ បាឋេន ភវិតព្ពន្តិ. ‘‘ឥដ្ឋផលាភាវមត្តមេវ ទិស្វា បដិក្ខិត្ត’’ន្តិ វា វត្តព្ពំ. សង្ករភាវមោចនត្ថន្តិ ចេតសិកស្ស ទាតព្ពដ្ឋេន ទេយ្យធម្មស្ស ច ឥដ្ឋផលដ្ឋេន ទានភាវមោចនត្ថន្តិ វុត្តំ ហោតិ.

ទានកថាវណ្ណនា និដ្ឋិតា.