៥. បរិភោគមយបុញ្ញកថាវណ្ណនា

៤៨៣. បរិភោគមយំ នាម ចិត្តវិប្បយុត្តំ បុញ្ញំ អត្ថីតិ លទ្ធិ. តញ្ហិ តេ សន្ធាយ បរិភោគមយំ បុញ្ញំ បវឌ្ឍតីតិ វទន្តីតិ អធិប្បាយោ.

៤៨៥. តស្សាបិ វសេនាតិ តស្សាបិ លទ្ធិយា វសេន. បញ្ចវិញ្ញាណានំ វិយ ឯតេសម្បិ សមោធានំ សិយាតិ បដិជានាតីតិ វទន្តិ. បញ្ចវិញ្ញាណផស្សាទីនមេវ បន សមោធានំ សន្ធាយ បដិជានាតីតិ អធិប្បាយោ.

៤៨៦. អបរិភុត្តេបីតិ ឥមិនា ‘‘បដិគ្គាហកោ បដិគ្គហេត្វា ន បរិភុញ្ជតិ ឆឌ្ឌេតី’’តិអាទិកំ ទស្សេតិ. អបរិភុត្តេ ទេយ្យធម្មេ បុញ្ញភាវតោ បរិភោគមយំ បុញ្ញំ បវឌ្ឍតីតិ អយំ វាទោ ហីយតិ. តស្មិញ្ច ហីនេ សកវាទីវាទោ ពលវា. ចាគចេតនាយ ឯវ ហិ បុញ្ញភាវោ ឯវំ សិទ្ធោ ហោតីតិ អធិប្បាយោ. អបរិភុត្តេបិ ទេយ្យធម្មេ បុញ្ញភាវេ ចាគចេតនាយ ឯវ បុញ្ញភាវោតិ អាហ ‘‘សកវាទីវាទោវ ពលវា’’តិ.

បរិភោគមយបុញ្ញកថាវណ្ណនា និដ្ឋិតា.