២. សមាធិបរិក្ខារសុត្តវណ្ណនា

៤៥. ទុតិយេ សមាធិបរិក្ខារាតិ ឯត្ថ តយោ បរិក្ខារា. ‘‘រថោ សីលបរិក្ខារោ, ឈានក្ខោ ចក្កវីរិយោ’’តិ (សំ. និ. ៥.៤) ហិ ឯត្ថ អលង្ការោ បរិក្ខារោ នាម. ‘‘សត្តហិ នគរបរិក្ខារេហិ សុបរិក្ខតំ ហោតី’’តិ (អ. និ. ៧.៦៧) ឯត្ថ បរិវារោ បរិក្ខារោ នាម. ‘‘គិលានបច្ចយ…បេ… ជីវិតបរិក្ខារា’’តិ (ម. និ. ១.១៩១-១៩២) ឯត្ថ សម្ភារោ បរិក្ខារោ នាម. សោ ឥធ អធិប្បេតោតិ អាហ ‘‘មគ្គសមាធិស្ស សម្ភារា’’តិ. បរិវារបរិក្ខារោបិ វដ្ដតិយេវ. បរិវារោ ហិ សម្មាទិដ្ឋាទយោ មគ្គធម្មា សម្មាសមាធិស្ស សហជាតាទិបច្ចយភាវេន បរិករណតោ អភិសង្ខរណតោ. បរិក្ខតាតិ បរិវារិតា. អយំ វុច្ចតិ អរិយោ សម្មាសមាធីតិ អយំ សត្តហិ រតនេហិ បរិវុតោ ចក្កវត្តី វិយ សត្តហិ អង្គេហិ បរិវុតោ អរិយោ សម្មាសមាធីតិ វុច្ចតិ. ឧបេច្ច និស្សីយតីតិ ឧបនិសា, សហ ឧបនិសាយាតិ សឧបនិសោ, សឧបនិស្សយោ អត្ថោ, សបរិវារោយេវាតិ វុត្តំ ហោតិ. សហការិការណភូតោ ហិ ធម្មសមូហោ ឥធ ‘‘ឧបនិសោ’’តិ អធិប្បេតោ.

សមាធិបរិក្ខារសុត្តវណ្ណនា និដ្ឋិតា.