៣-៤. បឋមធម្មវិហារីសុត្តាទិវណ្ណនា

៧៣-៧៤. តតិយេ និយកជ្ឈត្តេតិ អត្តនោ សន្តានេ. មេត្តាយ ឧបសំហរណវសេន ហិតំ ឯសន្តេន. ករុណាយ វសេន អនុកម្បមានេន. បរិគ្គហេត្វាតិ បរិតោ គហេត្វា, ផរិត្វាតិ អត្ថោ. បរិច្ចាតិ បរិតោ កត្វា, សមន្តតោ ផរិត្វា ឥច្ចេវ អត្ថោ. ‘‘បដិច្ចា’’តិបិ បាឋោ. មា បមជ្ជិត្ថាតិ ‘‘ឈាយថា’’តិ វុត្តសមថវិបស្សនានំ អននុយុញ្ជនេន អញ្ញេន វា កេនចិ បមាទការណេន មា បមាទំ អាបជ្ជិត្ថ. និយ្យានិកសាសនេ អកត្តព្ពករណំ វិយ កត្តព្ពាករណម្បិ បមាទោតិ. វិបត្តិកាលេតិ សត្តអសប្បាយាទិវិបត្តិយុត្តេ កាលេ. សព្ពេបិ សាសនេ គុណា ឥធេវ សង្គហំ គច្ឆន្តីតិ អាហ ‘‘ឈាយថ មា បមាទត្ថ…បេ… អនុសាសនី’’តិ. ចតុត្ថេ នត្ថិ វត្តព្ពំ.

បឋមធម្មវិហារីសុត្តាទិវណ្ណនា និដ្ឋិតា.