៥. បឋមយោធាជីវសុត្តវណ្ណនា

៧៥. បញ្ចមេ យុជ្ឈនំ យោធោ, សោ អាជីវោ ឯតេសន្តិ យោធាជីវា. តេនាហ ‘‘យុទ្ធូបជីវិនោ’’តិ. សន្ថម្ភិត្វា ឋាតុំ ន សក្កោតីតិ ពទ្ធោ ធិតិសម្បន្នោ ឋាតុំ ន សក្កោតិ. សមាគតេតិ សម្បត្តេ. ព្យាបជ្ជតីតិ វិការមាបជ្ជតិ. តេនាហ ‘‘បកតិភាវំ ជហតី’’តិ.

រជគ្គស្មិន្តិ បច្ចត្តេ ភុម្មវចនន្តិ អាហ ‘‘កិំ តស្ស បុគ្គលស្ស រជគ្គំ នាមា’’តិ. វិនិព្ពេឋេត្វាតិ គហិតគ្គហណំ វិស្សជ្ជាបេត្វា. មោចេត្វាតិ សរីរតោ អបនេត្វា.

បឋមយោធាជីវសុត្តវណ្ណនា និដ្ឋិតា.