៦-៨. វិនិពន្ធសុត្តាទិវណ្ណនា

២០៦-៨. ឆដ្ឋេ បវត្តិតុំ អប្បទានវសេន កុសលចិត្តំ វិនិពន្ធន្តីតិ ចេតសោវិនិពន្ធា. តំ បន វិនិពន្ធន្តា មុដ្ឋិគ្គាហំ គណ្ហន្តា វិយ ហោន្តីតិ អាហ ‘‘ចិត្តំ វិនិពន្ធិត្វា’’តិអាទិ. កាមគិទ្ធោ បុគ្គលោ វត្ថុកាមេបិ កិលេសកាមេបិ អស្សាទេតិ អភិនន្ទតីតិ វុត្តំ ‘‘វត្ថុកាមេបិ កិលេសកាមេបី’’តិ. អត្តនោ កាយេតិ អត្តនោ នាមកាយេ, អត្តភាវេ វា. ពហិទ្ធារូបេតិ បរេសំ កាយេ អនិន្ទ្រិយពទ្ធរូបេ ច. ឧទរំ អវទិហតិ ឧបចិនោតិ បូរេតីតិ ឧទរាវទេហកំ. សេយ្យសុខន្តិ សេយ្យាយ សយនវសេន ឧប្បជ្ជនកសុខំ. សម្បរិវត្តកន្តិ សម្បរិវត្តិត្វា. បណិធាយាតិ តណ្ហាវសេនេវ បណិទហិត្វា. ឥតិ បញ្ចវិធោបិ លោភវិសេសោ ឯវ ‘‘ចេតោវិនិពន្ធោ’’តិ វុត្តោតិ វេទិតព្ពោ. សត្តមដ្ឋមេសុ នត្ថិ វត្តព្ពំ.

វិនិពន្ធសុត្តាទិវណ្ណនា និដ្ឋិតា.