៩-១០. គីតស្សរសុត្តាទិវណ្ណនា

២០៩-២១០. នវមេ អាយតកោ នាម គីតស្សរោ តំ តំ វត្តំ ភិន្ទិត្វា អក្ខរានិ វិនាសេត្វា បវត្តោតិ អាហ ‘‘អាយតកេនា’’តិអាទិ. ធម្មេហិ សុត្តវត្តំ នាម អត្ថិ, គាថាវត្តំ នាម អត្ថិ, តំ វិនាសេត្វា អតិទីឃំ កាតុំ ន វដ្ដតិ. ធម្មញ្ហិ ភាសន្តេន ចតុរស្សេន វត្តេន បរិមណ្ឌលានិ បទព្យញ្ជនានិ ទស្សេតព្ពានិ. ‘‘អនុជានាមិ, ភិក្ខវេ, សរភញ្ញ’’ន្តិ (ចូឡវ. ២៤៩) ច វចនតោ សរេន ធម្មំ ភណិតុំ វដ្ដតិ. សរភញ្ញេ កិរ តរង្គវត្តធោតកវត្តភាគគ្គហកវត្តាទីនិ ទ្វត្តិំស វត្តានិ អត្ថិ. តេសុ យំ ឥច្ឆតិ, តំ កាតុំ លភតីតិ. ទសមេ នត្ថិ វត្តព្ពំ.

គីតស្សរសុត្តាទិវណ្ណនា និដ្ឋិតា.

កិមិលវគ្គវណ្ណនា និដ្ឋិតា.