៧. វស្សសុត្តវណ្ណនា

១៩៧. សត្តមេ ឧតុសមុដ្ឋានន្តិ វស្សិកេ ចត្តារោ មាសេ ឧប្បន្នំ. អកាលេបីតិ ចិត្តវេសាខមាសេសុបិ. វស្សវលាហកទេវបុត្តានញ្ហិ អត្តនោ រតិយា កីឡិតុកាមតាចិត្តេ ឧប្បន្នេ អកាលេបិ ទេវោ វស្សតិ. តត្រិទំ វត្ថុ – ឯកោ កិរ វស្សវលាហកទេវបុត្តោ វាករកុដកវាសិខីណាសវត្ថេរស្ស សន្តិកំ គន្ត្វា វន្ទិត្វា អដ្ឋាសិ. ថេរោ ‘‘កោសិ ត្វ’’ន្តិ បុច្ឆិ. អហំ, ភន្តេ, វស្សវលាហកទេវបុត្តោតិ. តុម្ហាកំ កិរ ចិត្តេន ទេវោ វស្សតីតិ. អាម, ភន្តេតិ. បស្សិតុកាមា មយន្តិ. តេមិស្សថ, ភន្តេតិ. មេឃសីសំ វា គជ្ជិតំ វា ន បញ្ញាយតិ, កថំ តេមិស្សាមាតិ. ភន្តេ, អម្ហាកំ ចិត្តេន ទេវោ វស្សតិ, តុម្ហេ បណ្ណសាលំ បវិសថាតិ. ‘‘សាធុ, ទេវបុត្តា’’តិ បាទេ ធោវិត្វា បណ្ណសាលំ បាវិសិ. ទេវបុត្តោ តស្មិំ បវិសន្តេយេវ ឯកំ គីតំ គាយិត្វា ហត្ថំ ឧក្ខិបិ, សមន្តា តិយោជនដ្ឋានំ ឯកមេឃំ អហោសិ. ថេរោ អទ្ធតិន្តោ បណ្ណសាលំ បវិដ្ឋោតិ.

វស្សសុត្តវណ្ណនា និដ្ឋិតា.