៨. ទេវទត្តសុត្តវណ្ណនា

៦៨. អដ្ឋមេ កាលេ សម្បត្តេតិ គព្ភស្ស បរិបាកគតត្តា វិជាយនកាលេ សម្បត្តេ. បោតកន្តិ អស្សតរិយា បុត្តំ. ‘‘ផលំ វេ កទលិំ ហន្តី’’តិអាទិគាថាយ កុក្កុជកេនេវ បត្តវដ្ដិបសវស្ស ឧច្ឆិន្នត្តា ផលុប្បត្តិ កទលិយា បរាភវាយ ហោតីតិ អាហ ‘‘ផលំ វេ កទលិំ ហន្តី’’តិ. កុក្កុជកំ នាម កទលិយា បុប្ផនាឡំ. តថា ផលបាកបរិយោសានត្តា ឱសធីនំ ‘‘ផលំ វេឡុំ នឡ’’ន្តិ វុត្តំ. អយំ បនេត្ថ បិណ្ឌត្ថោ – យថា អត្តនោ ផលំ កទលិវេឡុនឡេ វិនាសេតិ, គព្ភោ ច អស្សតរិំ, ឯវំ អត្តនោ កម្មភូតោ សក្ការោ អសប្បុរិសំ វិនាសេតីតិ.

ទេវទត្តសុត្តវណ្ណនា និដ្ឋិតា.