១០. សុគតវិនយសុត្តវណ្ណនា

១៦០. ទសមេ វឡញ្ជេន្តីតិ សជ្ឈាយន្តិ ចេវ វាចុគ្គតំ ករោន្តា ធារេន្តិ ច. អវិគតតណ្ហតាយ តំ តំ បរិក្ខារជាតំ ពហុម្បិ អាទិយន្តីតិ ពហុលា, តេ ឯវ ពាហុលិកា យថា ‘‘វេនយិកោ’’តិ (ម. និ. ១.២៤៦; អ. និ. ៨.១១; បារា. ៨). តេ បន យស្មា បច្ចយពហុលភាវា យុត្តប្បយុត្តា នាម ហោន្តិ, តស្មា អាហ ‘‘បច្ចយពាហុល្លាយ បដិបន្នា’’តិ. សិថិលំ គណ្ហន្តីតិ សាថលិកា, សិក្ខាយ អាទរគារវាភាវេន សិថិលំ អទឡ្ហំ គណ្ហន្តីតិ អត្ថោ. សិថិលន្តិ ច ភាវនបុំសកនិទ្ទេសោ, សិថិល-សទ្ទេន វា សមានត្ថស្ស សាថលសទ្ទស្ស វសេន សាថលិកាតិ បទសិទ្ធិ វេទិតព្ពា. អវគមនតោតិ អធោគមនតោ, ឱរម្ភាគិយភាវតោតិ អត្ថោ. និព្ពីរិយាតិ ឧជ្ឈិតុស្សាហា តទធិគមាយ អារម្ភម្បិ អកុរុមានា.

សុគតវិនយសុត្តវណ្ណនា និដ្ឋិតា.

ឥន្ទ្រិយវគ្គវណ្ណនា និដ្ឋិតា.