៩. ជាណុស្សោណិសុត្តវណ្ណនា

៦០. នវមេ ទេយ្យធម្មស្សេតំ នាមន្តិ យាគំ ករោន្តេន ទាតព្ពទេយ្យធម្មំ សន្ធាយ វទតិ តទញ្ញស្ស បាឡិយំ ទេយ្យធម្មគ្គហណេនេវ គហិតត្តា. មតកភត្តន្តិ មតកេ ឧទ្ទិស្ស ទាតព្ពភត្តំ, បិតុបិណ្ឌន្តិ វុត្តំ ហោតិ. វរបុរិសានន្តិ វិសិដ្ឋបុរិសានំ, ឧត្តមបុរិសានន្តិ អត្ថោ. សព្ពមេតំ ទានន្តិ យថាវុត្តភេទំ យញ្ញសទ្ធាទិទានំ.

ជាណុស្សោណិសុត្តវណ្ណនា និដ្ឋិតា.