៣. តបនីយសុត្តវណ្ណនា

៣. តតិយេ តបនីយាតិ ឯត្ថ កត្តុអត្ថេ អនីយ-សទ្ទោតិ អាហ ‘‘តបន្តីតិ តបនីយា’’តិ. តបន្តីតិ វិពាធេន្តិ, វិហេឋេន្តីតិ អត្ថោ. តបនំ វា ទុក្ខំ, ទិដ្ឋេ ចេវ ធម្មេ អភិសម្បរាយញ្ច តស្ស ឧប្បាទនេន ចេវ អនុពលប្បទានេន ច ហិតាតិ តបនីយា. អថ វា តបន្តិ តេនាតិ តបនំ, អនុតាបោ, វិប្បដិសារោតិ អត្ថោ. តស្ស ហេតុភាវតោ ហិតាតិ តបនីយា. អនុសោចតីតិ វិប្បដិសារី ហុត្វា កតាកតំ អនុគម្ម សោចតិ. សោចនញ្ហិ កតត្តា ច ហោតិ អកតត្តា ច. តថា ចេវ បាឡិយំ វិភត្តំ. នន្ទយក្ខាទីនំ វត្ថូនិ បាកដានីតិ តានិ អទស្សេត្វា ទ្វេភាតិកវត្ថុំ ទស្សេន្តោ ‘‘តេ កិរា’’តិ អាទិមាហ. តត្ថ តេតិ ទ្វេ ភាតរោ. បុន កិំ មគ្គសីតិ បុន កិំ ឥច្ឆសិ.

តបនីយសុត្តវណ្ណនា និដ្ឋិតា.