៥. ភូមិបុគ្គលកថា

១៨០. ឥតោ បរំ បវក្ខាមិ, ភូមិបុគ្គលភេទតោ;

ចិត្តានំ បន សព្ពេសំ, កមតោ សង្គហំ កថំ.

១៨១. និរយញ្ច តិរច្ឆានយោនិ បេតាសុរា តថា;

ចតុរាបាយភូមីតិ, កាមេ ទុគ្គតិយោ មតា.

១៨២. ចាតុមហារាជិកា ច, តាវតិំសា ច យាមកា;

តុសិតា ចេវ និម្មានរតិនោ វសវត្តិនោ.

១៨៣. ឆឡេតេ ទេវលោកា ច, មានវាតិ ច សត្តធា;

កាមសុគតិយោ ចេកាទសធា កាមភូមិយោ.

១៨៤. ព្រហ្មានំ បារិសជ្ជា ច, តថា ព្រហ្មបុរោហិតា;

មហាព្រហ្មា ច តិវិធា, បឋមជ្ឈានភូមិយោ.

១៨៥. បរិត្តាភាប្បមាណាភា, តថេវាភស្សរាតិ ច;

ទុតិយជ្ឈានភូមិ ច, តិវិធាវ បកាសិតា.

១៨៦. បរិត្តសុភាប្បមាណាសុភា ច សុភកិណ្ហកា;

តិវិធាបិ បវុច្ចន្តិ, តតិយជ្ឈានភូមិយោ.

១៨៧. វេហប្ផលា អសញ្ញី ច, សុទ្ធាវាសា ច បញ្ចធា;

ឥច្ចេតា បន សត្តាបិ, ចតុត្ថជ្ឈានភូមិយោ.

១៨៨. អវិហា ច អតប្បា ច, សុទស្សា ច សុទស្សិនោ;

អកនិដ្ឋាតិ បញ្ចេតេ, សុទ្ធាវាសា បកាសិតា.

១៨៩. ឥតិ សោឡសធា ភិន្នា, ព្រហ្មលោកា បវុច្ចរេ;

រូបិព្រហ្មានមាវាសា, រូបាវចរភូមិយោ.

១៩០. អាកាសានញ្ចាយតននាមាទីហិ បកាសិតា;

អរូបិព្រហ្មលោកា ច, ចតុធារូបភូមិយោ.

១៩១. សោតាបន្នាទិភេទេន, ចតុធានុត្តរា មតា;

បញ្ចតិំស បនិច្ចេវំ, សព្ពថាបិ ច ភូមិយោ.

១៩២. ជាយន្តិ ចតុរាបាយេ, បាបបាកាយ សន្ធិយា;

កាមាវចរទេវេសុ, មហាបាកេហិ ជាយរេ.

១៩៣. អហេតុកា បុញ្ញបាកាហេតុកេន តុ ជាយរេ;

ភុម្មទេវមនុស្សេសុ, មហាបាកេហិ ចេតរេ.

១៩៤. វិបាកំ បឋមជ្ឈានំ, បឋមជ្ឈានភូមិយំ;

ទុតិយំ តតិយញ្ចេវ, ទុតិយជ្ឈានភូមិយំ.

១៩៥. តតិយម្ហិ ចតុត្ថំ តុ, ចតុត្ថម្ហិ ច បញ្ចមំ;

អារុប្បា ច កមេនេវ, អារុប្បេ ហោន្តិ សន្ធិយោ.

១៩៦. កាយវាចាមនោទ្វារេ, កម្មំ បាណវធាទិកំ;

កត្វា បាបកចិត្តេហិ, ជាយន្តាបាយភូមិយំ.

១៩៧. កាយវាចាមនោទ្វារេ, ទានំ សីលញ្ច ភាវនំ;

កាមបុញ្ញេហិ កត្វាន, កាមសុគតិយំ សិយុំ.

១៩៨. បរិត្តំ មជ្ឈិមំ ឈានំ, បណីតញ្ច យថាក្កមំ;

ភាវេត្វា តិវិធា ហោន្តិ, តីសុ ភូមីសុ យោគិនោ.

១៩៩. វេហប្ផលេសុ ជាយន្តិ, ភាវេត្វា បញ្ចមំ តថា;

សញ្ញាវិរាគតញ្ចេវ, ភាវេត្វាសញ្ញិភូមិយំ.

២០០. សុទ្ធាវាសេសុ ជាយន្តិ, អនាគាមិកបុគ្គលា;

អារុប្បានិ ច ភាវេត្វា, អរូបេសុ យថាក្កមំ.

២០១. លោកុត្តរំ តុ ភាវេត្វា, យថាសកមនន្តរំ;

សមាបត្តិក្ខណេ ចេវ, អប្បេតិ ផលមានសំ.

២០២. អបាយម្ហា ចុតា សត្តា, កាមធាតុម្ហិ ជាយរេ;

សព្ពដ្ឋានេសុ ជាយន្តិ, កាមសុគតិតោ ចុតា.

២០៣. ចុតា ជាយន្តិ រូបម្ហា, សព្ពត្ថាបាយវជ្ជិតេ;

កាមសុគតិយំ ហោន្តិ, អរូបាសញ្ញតោ ចុតា.

២០៤. តថារូបចុតា ហោន្តិ, តត្ថេវោបរិមេវ ច;

វដ្ដមូលសមុច្ឆេទា, និព្ពាយន្តិ អនាសវា.

២០៥. សុទ្ធាវាសេស្វនាគាមិ-បុគ្គលាវោបបជ្ជរេ;

កាមធាតុម្ហិ ជាយន្តិ, អនាគាមិវិវជ្ជិតា.

២០៦. ហេដ្ឋុបបត្តិព្រហ្មានំ, អរិយានំ ន កត្ថចិ;

អសញ្ញសត្តាបាយេសុ, នត្ថេវារិយបុគ្គលា.

២០៧. វេហប្ផលេ អកនិដ្ឋេ, ភវគ្គេ ច បតិដ្ឋិតា;

ន បុនាញ្ញត្ថ ជាយន្តិ, សព្ពេ អរិយបុគ្គលា.

២០៨. ឆសុ ទេវេស្វនាគាមី, វីតរាគា ន តិដ្ឋរេ;

ន ចិរដ្ឋាយិនោ តត្ថ, លោកិយាបិ ច យោគិនោ.

២០៩. គិហិលិង្គេ ន តិដ្ឋន្តិ, មនុស្សេសុ អនាសវា;

បព្ពជ្ជាយញ្ច ភុម្មេ ច, ព្រហ្មត្តេបិ ច តិដ្ឋរេ.

២១០. យានិ បញ្ញាស វស្សានិ,

មនុស្សានំ ស បិណ្ឌិតោ;

ឯកោ រត្តិទិវោ តេន,

មាសេកោ តិំស រត្តិយោ.

២១១. ទ្វាទសមាសិយោ វស្សោ, តេន បញ្ចសតំ ភវេ;

ចាតុមហារាជិកានំ, បមាណមិទមាយុនោ.

២១២. តំ នវុតិវស្សសត-សហស្សំ បន បិណ្ឌិតំ;

គណនាយ មនុស្សានំ, ចតុភាគូបរូបរិ.

២១៣. យំ មនុស្សវស្សសតំ, តទេកោ ទិវសោ កតោ;

តេន វស្សសហស្សាយុ, តាវតិំសេសុ ទេសិតោ.

២១៤. កោដិត្តយំ សដ្ឋិសតសហស្សញ្ចាធិកំ ភវេ;

គណនាយ មនុស្សានំ, តាវតិំសេសុ បិណ្ឌិតំ.

២១៥. អាយុប្បមាណមិច្ចេវំ, ទេវានមុបរូបរិ;

ទ្វិក្ខត្តុំ ទ្វិគុណំ កត្វា, ចតុភាគមុទាហដំ.

២១៦. គណនាយ មនុស្សានំ, តត្ថ ចុទ្ទស កោដិយោ;

ចត្តាលីសសតសហស្សាធិកា យាមភូមិយំ.

២១៧. តុសិតានំ បកាសេន្តិ, សត្តបញ្ញាស កោដិយោ;

សដ្ឋិសតសហស្សានិ, វស្សានិ អធិកានិ ច.

២១៨. និម្មានរតិទេវានំ, ទ្វិសតំ តិំស កោដិយោ;

ចត្តាលីសវស្សសតសហស្សានិ ច សព្ពថា.

២១៩. នវកោដិសតញ្ចេកវីសតិវស្សកោដិយោ;

សដ្ឋិវស្សសតសហស្សាធិកា វសវត្តិសុ.

២២០. កប្បស្ស តតិយោ ភាគោ, ឧបឌ្ឍញ្ច យថាក្កមំ;

កប្បេកោ ទ្វេ ច ចត្តារោ, អដ្ឋ កប្បា ច សោឡស.

២២១. ទ្វត្តិំស ចតុសដ្ឋី ច, នវសុ ព្រហ្មភូមិសុ;

វេហប្ផលា អសញ្ញី ច, បញ្ចកប្បសតាយុកា.

២២២. កប្បសហស្សំ ទ្វេ ចត្តារិ, អដ្ឋ សោឡស ចក្កមា;

សហស្សានិ ច កប្បានំ, សុទ្ធាវាសានមុទ្ទិសេ.

២២៣. វីសកប្បសហស្សានិ, ចត្តាលីសញ្ច សដ្ឋិ ច;

ចតុរាសីតិសហស្សា, កប្បា ចារុប្បកេ កមា.

២២៤. អាយុប្បមាណនិយមោ, នត្ថិ ភុម្មេ ច មានវេ;

វស្សានំ គណនា នត្ថិ, ចតុរាបាយភូមិយំ.

២២៥. បុថុជ្ជនារិយា ចេតិ, ទុវិធា ហោន្តិ បុគ្គលា;

តិហេតុកាទិភេទេន, តិវិធា ច បុថុជ្ជនា.

២២៦. មគ្គដ្ឋា ច ផលដ្ឋា ច,

អដ្ឋេវារិយបុគ្គលា;

អាទិតោ សត្ត សេក្ខា ច,

អសេក្ខោ ចារហាបរោ.

២២៧. អហេតុកាវ លព្ភន្តិ, សត្តា ទុគ្គតិយំ បន;

តិហេតុកាវ លព្ភន្តិ, រូបារូបេ សចិត្តកា.

២២៨. កាមាវចរទេវេសុ, អហេតុកវិវជ្ជិតា;

វិនិបាតាសុរេ ចេវ, មានវេ ច តយោបិ ច.

២២៩. អរិយា នាម លព្ភន្តិ, អសញ្ញាបាយវជ្ជិតេ;

បុថុជ្ជនា តុ លព្ភន្តិ, សុទ្ធាវាសវិវជ្ជិតេ.

២៣០. សុទ្ធាវាសមបាយញ្ច, ហិត្វាសញ្ញិភវំ តិធា;

សោតាបន្នាទយោ ទ្វេបិ, សេសដ្ឋានេសុ លព្ភរេ.

២៣១. ឥតិ សព្ពប្បភេទេន, ភូមិបុគ្គលសង្គហំ;

ញត្វា វិញ្ញូ វិភាវេយ្យ, តត្ថ ចិត្តានិ សម្ភវាតិ.

ឥតិ ចិត្តវិភាគេ ភូមិបុគ្គលកថា និដ្ឋិតា.

បញ្ចមោ បរិច្ឆេទោ.