ឆដ្ឋោ បរិច្ឆេទោ

៦. ភូមិបុគ្គលចិត្តប្បវត្តិកថា

២៣២. កាមសុគតិយំ ហោន្តិ, មហាបាកា យថារហំ;

មហគ្គតវិបាកា ច, យថាសន្ធិវវត្ថិតា.

២៣៣. វោដ្ឋព្ពកាមបុញ្ញានិ, វិយុត្តានិ ច ទិដ្ឋិយា;

ឧទ្ធច្ចសហិតញ្ចេតិ, ហោន្តិ សព្ពត្ថ ចុទ្ទស.

២៣៤. សន្តីរណមនោធាតុ-ចក្ខុសោតមនា បន;

ទស ចិត្តានិ ជាយន្តិ, សព្ពត្ថារូបវជ្ជិតេ.

២៣៥. ទិដ្ឋិគតសម្បយុត្តា, វិចិកិច្ឆាយុតា តថា;

បញ្ច សព្ពត្ថ ជាយន្តិ, សុទ្ធាវាសវិវជ្ជិតេ.

២៣៦. ទោសមូលទ្វយញ្ចេវ, ឃានាទិត្តយមានសា;

អដ្ឋ សព្ពត្ថ ជាយន្តិ, មហគ្គតវិវជ្ជិតេ.

២៣៧. ចតុត្ថារុប្បជវនំ, អនាគាមិផលាទយោ;

មហាក្រិយា ច ជាយន្តិ, តេរសាបាយវជ្ជិតេ.

២៣៨. ហេដ្ឋារុប្បជវា ទ្វេ ទ្វេ, ឆាបាយុបរិវជ្ជិតេ;

សិតរូបជវា ហោន្តិ, អរូបាបាយវជ្ជិតេ.

២៣៩. សោតាបត្តិផលាទីនិ, សុទ្ធាបាយវិវជ្ជិតេ;

បឋមានុត្តរំ សុទ្ធា-បាយារូបវិវជ្ជិតេ.

២៤០. អវត្ថាភូមិភូតត្តា, ន គយ្ហន្តិ អនុត្តរា;

ឯកវោការភូមិ ច, រូបមត្តា ន គយ្ហតិ.

២៤១. សភុម្មា សព្ពភុម្មា ច, ឯកទ្វិត្តយវជ្ជិតា;

តថារូបសុទ្ធាវាស-ព្រហ្មាបាយវសាតិ ច.

២៤២. មានសា បញ្ច កោដ្ឋាសា, សត្តរស ចតុទ្ទស;

ឆត្តិំសតេកវីសា ច, ឯកញ្ចេវ យថាក្កមំ.

២៤៣. អដ្ឋារសាបិ ហោន្តេតេ, នវធាបិ បុនេកធា;

ចតុធា តិវិធា ចេវ, ឯកធាតិ ច ភេទតោ.

២៤៤. តេរសាបិ ច កោដ្ឋាសា, ភវន្តេកតិភូមកា;

ឆសត្តេកាទសសត្ត-រសភូមកមានសា.

២៤៥. ឯកទ្វយតិចតុក្កបញ្ចកាធិកវីសជា;

ឆព្ពីសតិំសជា ចេតិ, យថានុក្កមតោ ភវេ.

២៤៦. ចត្តារិ បុន ចត្តារិ, ឯកមដ្ឋដ្ឋ ចេកកំ;

ចត្តារេកាទស ទ្វេ ទ្វេ, សត្ត តេវីស ចុទ្ទស.

២៤៧. ក្រិយាជវមហាបាកា, លោកុត្តរមហគ្គតា;

ទ្វេបញ្ញាស ន លព្ភន្តិ, ចតុរាបាយភូមិយំ.

២៤៨. កាមាវចរទេវេសុ, ឆសុ ភុម្មេ ច មានវេ;

កាមសុគតិយំ នត្ថិ, នវ បាកា មហគ្គតា.

២៤៩. ទោសមូលមហាបាកា, ឃានាទិត្តយមានសា;

នត្ថារូបវិបាកា ច, វីសតី រូបភូមិយំ.

២៥០. កង្ខាទិដ្ឋិយុតា បញ្ចារូបបាកា ចតុព្ពិធា;

បញ្ចាទោនុត្តរា ចេវ, សុទ្ធាវាសេ ន លព្ភរេ.

២៥១. អាទាវជ្ជនមគ្គា ច, បដិឃារូបមានសា;

កាមបាកា សិតារូបេ, តេចត្តាលីស នត្ថិ តេ.

២៥២. សត្តតិំស បរិត្តា ច, លព្ភន្តាបាយភូមិយំ;

មានសាសីតិ លព្ភន្តិ, កាមសុគតិយំ បន.

២៥៣. ឯកូនសត្តតិ រូបេ, សុទ្ធេ បញ្ញាស បញ្ច ច;

ឆចត្តាលីស អារុប្បេ, នត្ថាសញ្ញីសុ កិញ្ចិបិ.

២៥៤. ឥត្ថមេកទ្វិតិចតុបញ្ចភុម្មានិ សោឡស;

ទស បញ្ចទសេវាថ, ចតុត្តិំស ចតុទ្ទស.

២៥៥. អបាយាហេតុកានំ តុ, មហាបាកក្រិយាជវេ;

ហិត្វា សេសបរិត្តានិ, ចិត្តានិ បន លព្ភរេ.

២៥៦. ទ្វិហេតុកាហេតុកានំ, សេសានំ កាមមានសា;

លព្ភន្តិ បន ហិត្វាន, ញាណបាកក្រិយាជវេ.

២៥៧. តិហេតុកានំ សត្តានំ, តត្ថ តត្ថូបបត្តិយំ;

តត្ថ តត្ថូបបន្នានំ, លព្ភមានានិ លព្ភរេ.

២៥៨. តិហេតុកានំ សព្ពេបិ, មានសាបាយបាណិនំ;

សត្តតិំសាវសេសានំ, ឯកតាលីស និទ្ទិសេ.

២៥៩. បុថុជ្ជនាន សេក្ខានំ, ន សន្តិ ជវនក្រិយា;

ន សន្តិ វីតរាគានំ, បុញ្ញាបុញ្ញានិ សព្ពថា.

២៦០. កង្ខាទិដ្ឋិយុតា បញ្ច, សេក្ខានំ នត្ថិ មានសា;

ទោសមូលទ្វយញ្ចាបិ, នត្ថានាគាមិនោ បន.

២៦១. វវត្ថិតារិយេស្វេវ, យថាសកមនុត្តរា;

មគ្គដ្ឋានំ សកោ មគ្គោ, នត្ថញ្ញំ កិញ្ចិ សព្ពថា.

២៦២. បុថុជ្ជនានំ ទ្វិន្នម្បិ, ផលដ្ឋានំ យថាក្កមំ;

តតិយស្ស ផលដ្ឋស្ស, ចតុត្ថស្ស ច សម្ភវា.

២៦៣. តេសដ្ឋិ ចេវ ចិត្តានិ, លព្ភន្តេកូនសដ្ឋិ ច;

សត្តបញ្ញាស ចិត្តានិ, តេបញ្ញាស ច សព្ពថា.

២៦៤. ចតុបញ្ញាស បញ្ញាស, បញ្ញាសទ្វយហីនកា;

កាមេសុ តេសំ សម្ភោន្តិ, ចតុតាលីស ចក្កមា.

២៦៥. តេចត្តាលីស ចេកូនចត្តាលីស យថាក្កមំ;

ភវន្តេកូនតាលីស, បញ្ចត្តិំស ច រូបិសុ.

២៦៦. សត្តវីស ច តេវីស, តេវីស ច យថាក្កមំ;

អារុប្បេសុបិ លព្ភន្តិ, តេសមដ្ឋារសេវ ច.

២៦៧. បុថុជ្ជនា ច ចត្តារោ, អបាយាហេតុកាទយោ;

អរិយា ចេវ អដ្ឋាតិ, ទ្វាទសន្នំ វសា សិយុំ.

២៦៨. ឆព្ពិធា ចិត្តកោដ្ឋាសា, ឯកបុគ្គលិកា តថា;

ចតុបញ្ចឆសត្តដ្ឋ-បុគ្គលដ្ឋាតិ ចក្កមា.

២៦៩. ឆព្ពីស ចុទ្ទសេវាថ, តេរស ទ្វេ ច មានសា;

ទស សត្តាធិកា ចេវ, បុន សត្តាធិកា ទសាតិ.

ឥតិ ចិត្តវិភាគេ ភូមិបុគ្គលចិត្តប្បវត្តិកថា និដ្ឋិតា.

ឆដ្ឋោ បរិច្ឆេទោ.