សត្តមោ បរិច្ឆេទោ

២៧០. ទ្វិហេតុកាហេតុកានំ, ន សម្បជ្ជតិ អប្បនា;

អរហត្តញ្ច នត្ថីតិ, នត្ថេវ ជវនក្រិយា.

២៧១. ញាណបាកា ន វត្តន្តិ, ជឡត្តា មូលសន្ធិយា;

ទ្វិហេតុកតទាលម្ពំ, សិយា សុគតិយំ ន វា.

២៧២. តិហេតុកានំ សត្តានំ, សមថញ្ច វិបស្សនំ;

ភាវេន្តានំ បវត្តន្តិ, ឆព្ពីសតិបិ អប្បនា.

២៧៣. អរហន្តាន សត្តានំ, ភវន្តិ ជវនក្រិយា;

យថាភូមិនិយាមេន, ញាណបាកា ច លព្ភរេ.

២៧៤. វជ្ឈា បឋមមគ្គេន, កង្ខាទិដ្ឋិយុតា បន;

បដិឃំ តតិយេនេវ, កម្មមន្តេន សាសវំ.

២៧៥. តស្មា តេសំ ន វត្តន្តិ, តានិ ចិត្តានិ សព្ពថា;

មគ្គដ្ឋានំ តុ មគ្គោវ, នាញ្ញំ សម្ភោតិ កិញ្ចិបិ.

២៧៦. អហេតុកវិបាកានិ, លព្ភមានាយ វីថិយា;

សព្ពថាបិ ច សព្ពេសំ, សម្ភវន្តិ យថារហំ.

២៧៧. បញ្ចទ្វារេ មនោទ្វារេ, ធុវមាវជ្ជនទ្វយំ;

បរិត្តបុញ្ញាបុញ្ញានិ, លព្ភន្តិ លហុវុត្តិតោ.

២៧៨. ក្រិយាជវនមប្បនា, នត្ថាបាយេសុ ការណំ;

នត្ថិ សហេតុកា បាកា, ទុគ្គតត្តា ហិ សន្ធិយា.

២៧៩. ព្រហ្មានំ បដិឃំ នត្ថិ, ឈានវិក្ខម្ភិតំ តថា;

ហេដ្ឋាឈានំ វិរត្តត្តា, ន ភាវេន្តិ អរូបិនោ.

២៨០. បុព្ពេវ ទិដ្ឋសច្ចាវ, អរិយារូបភូមកា;

តស្មាទិមគ្គោ នត្ថេត្ថ, កាយាភាវា សិតំ តថា.

២៨១. សុទ្ធាវាសាបិ បត្តាវ, ហេដ្ឋានុត្តរបញ្ចកំ;

សត្តបាបបហីនា ច, តស្មា នត្ថេត្ថ តានិ ច.

២៨២. បញ្ចទ្វារិកចិត្តានិ, ទ្វារាភាវេ ន វិជ្ជរេ;

សហេតុកវិបាកា ច, យថាភូមិវវត្ថិតា.

២៨៣. សម្ភវាសម្ភវញ្ចេវំ, ញត្វា បុគ្គលភូមិសុ;

លព្ភមានវសា តត្ថ, ចិត្តសង្គហមុទ្ទិសេ.

២៨៤. កុសលាទិប្បភេទា ច, តថា ភូមាទិភេទតោ;

វត្ថុទ្វារារម្មណតោ, ភូមិបុគ្គលតោបិ ច.

២៨៥. វិភាគោ យោ សមុទ្ទិដ្ឋោ,

ចិត្តានញ្ច តុ សម្ភវា;

ញេយ្យោ ចេតសិកានញ្ច,

សម្បយោគានុសារតោតិ.

ឥតិ ចិត្តវិភាគេ ភូមិបុគ្គលសម្ភវកថា និដ្ឋិតា.

សត្តមោ បរិច្ឆេទោ.

និដ្ឋិតោ ច ចិត្តវិភាគោ.