១៣. តេរសមោ បរិច្ឆេទោ

និស្សន្ទផលវិភាគោ

១៧៩២. វិបស្សនាយ និស្សន្ទមិតិ វុត្តមិតោ បរំ;

សច្ចានំ បដិវេធាទិំ, បវក្ខាមិ យថាក្កមំ.

១៧៩៣. បរិញ្ញា ច បហានញ្ច, សច្ឆិកិរិយា ច ភាវនា;

ឥតិ ទុក្ខាទិសច្ចេសុ, កិច្ចមាហុ ចតុព្ពិធំ.

១៧៩៤. តំ សព្ពំ មគ្គកាលម្ហិ, ករិស្សតិ តតោ បរំ;

បដិបស្សទ្ធកិច្ចត្តា, កតំ ហោតិ ផលេ កថំ.

១៧៩៥. ឆិន្នតាលោ ផលស្សេវ, ឆិន្នានុសយមូលកា;

ខន្ធា នាលមធិដ្ឋានំ, វិបល្លាសបវត្តិយា.

១៧៩៦. អច្ចន្តបដិបក្ខត្តា, ចតុមគ្គបវត្តិយា;

បរំ ក្លេសា ន ជាយន្តិ, ទឌ្ឍពីជង្កុរំ យថា.

១៧៩៧. និយ្យានដ្ឋវិសេសេន, អញ្ញមញ្ញស្ស បច្ចយោ;

មគ្គោវ មគ្គំ ភាវេតិ, ជាយមានោថ វា បុន.

១៧៩៨. មគ្គប្បវត្តិសន្តានេ, ភាវនាតិ បវុច្ចតិ;

វត្តមានេន តំ កិច្ចំ, និប្ផាទិតមសេសតោ.

១៧៩៩. ឥតិ តីណិបិ សច្ចានិ, កិច្ចតោ បដិវិជ្ឈតិ;

និព្ពានំ សច្ឆិកុព្ពន្តោ, មគ្គោ ឯកក្ខណេ សហ.

១៨០០. កិច្ចប្បវត្តិតោ ចេត្ថ, បដិវេធោតិ វុច្ចតិ;

តញ្ច សាធេតិ មគ្គោយំ, និយ្យន្តោ សន្តិគោចរោ.

១៨០១. បរិច្ចជិត្វា សង្ខារេ, មគ្គស្សារព្ភ និព្ពុតិំ,

និយ្យានមេវ សច្ចេសុ, កិច្ចសាធនមីរិតំ.

១៨០២. មគ្គោ ឯវ ហិ និយ្យាតិ, សេសា តស្សោបការកា;

អប្បេន្តា ឈានធម្មា ច, ពុជ្ឈន្តា ពោធិបក្ខិយា.

១៨០៣. តស្មា តស្សេវ វុដ្ឋានំ, បកាសេន្តិ វិសេសតោ;

ខន្ធេហិ ច កិលេសេហិ, វិមោក្ខត្តយតោ កថំ.

១៨០៤. កត្វានាភិនិវេសំ តុ, យត្ថ តត្ថ យថា តថា;

ភូមិធម្មំ បរិគ្គយ្ហ, វិបស្សិត្វា តតោ បរំ.

១៨០៥. យតោ កុតោចិ វុដ្ឋានំ, យទិ ហោតិ អនិច្ចតោ;

ហុត្វាធិមោក្ខពហុលោ, សទ្ធិន្ទ្រិយវិសេសតោ.

១៨០៦. អនិមិត្តវិមោក្ខេន, និយ្យន្តោ សត្តបុគ្គលោ;

សទ្ធានុសារី បឋមេ, មជ្ឈេ សទ្ធាវិមុត្តកោ.

១៨០៧. អន្តេ បញ្ញាវិមុត្តោតិ, តមីរេន្តិ តថាគតា;

សង្ខារេ ទុក្ខតោ ទិស្វា, វុដ្ឋហន្តោ ស បុគ្គលោ.

១៨០៨. បស្សទ្ធិពហុលោ ហុត្វា, សមាធិន្ទ្រិយលាភតោ;

តថេវាប្បណិហិតេន, និយ្យន្តោ តិវិធោ ភវេ.

១៨០៩. អនត្តតោ វុដ្ឋហិត្វា, វេទពាហុល្យយោគតោ;

សុញ្ញតេនាថ និយ្យន្តោ, បញ្ញិន្ទ្រិយវិសេសតោ.

១៨១០. ធម្មានុសារី បឋមេ, ទិដ្ឋិប្បត្តោ តតោ បរំ;

អន្តេ បញ្ញាវិមុត្តោតិ, តម្បិ ទីបេន្តិ បណ្ឌិតា.

១៨១១. អានេញ្ជបាទកជ្ឈាន-នាមកាយវិសេសតោ;

សច្ឆិកត្វាន និព្ពានំ, មជ្ឈេ ឆ កាយសក្ខិនោ.

១៨១២. អរូបតោ ច មគ្គេន, អានេញ្ជេន ច រូបតោ;

វិមុត្តោ ឧភតោភាគ-វិមុត្តោ អរហា ភវេ.

១៨១៣. តិវិមោក្ខមុខីភូតា, ឥតិ វុដ្ឋានសាធិកា;

សត្តបុគ្គលភេទញ្ច, សម្បាទេតិ វិបស្សនា.

១៨១៤. អធិមុច្ចតិ សទ្ធា ច, យថាវត្ថុសភាវតោ;

ញេយ្យធម្មេសុ សព្ពត្ថ, បញ្ញា ច បដិវិជ្ឈតិ.

១៨១៥. តស្មា សទ្ធា ច បញ្ញា ច, វត្ថុនិច្ឆយលក្ខណា;

វត្ថុប្បតិដ្ឋិតា ចាយំ, តិលក្ខណវិបស្សនា.

១៨១៦. តស្មា សទ្ធាធុរោ យោគី, ទិស្វោឡារិកលក្ខណំ;

តតោ បរមនត្តាតិ, សុខុមេ អធិមុច្ចតិ.

១៨១៧. តស្សេវមធិមុត្តស្ស, សទ្ធា វា បន កេវលា;

សមាធិន្ទ្រិយាធិកា ច, វុដ្ឋានឃដិកា ភវេ.

១៨១៨. ថូលលក្ខណមោហាយ, បញ្ញាធុរេ វិបស្សតោ;

ធម្មសភាវមាហច្ច, សុខុមំ បដិវិជ្ឈតិ.

១៨១៩. តស្មា សទ្ធាធុរស្សេវ, វុដ្ឋានទ្វយមាទិតោ;

អន្តេ សទ្ធានុគតស្ស, បញ្ញា សុបរិបូរតិ.

១៨២០. បញ្ញាធុរស្ស សេសន្តិ, កេចិ អាចរិយា បន;

ធុរសំសន្ទនំ នាម, វុដ្ឋានេសុ វិភាវយុំ.

១៨២១. សត្តក្ខត្តុបរមោ ច,

កោលំកោលោ តថាបរោ;

ឯកពីជីតិ តិវិធោ,

សោតាបន្នោ បវុច្ចតិ.

១៨២២. សកិំទេវ ឥមំ លោកំ, អាគន្ត្វា បុន បុគ្គលោ;

សកទាគាមិនាមេន, ទុតិយោបិ បកាសិតោ.

១៨២៣. អន្តរាបរិនិព្ពាយី, ឧបហច្ចាបរោ តថា;

អសង្ខារំ សសង្ខារំ, ឧទ្ធំសោតោតិ បញ្ចធា.

១៨២៤. អនាគាមី ច តតិយោ, ចតុត្ថោ អរហាតិ ច;

ឥត្ថំ ផលដ្ឋា ចត្តារោ, មគ្គដ្ឋា ច តតោបរេ.

១៨២៥. ភាវនាបរិយាយេន, បដិវេធានុរូបតោ;

ចត្តារោ ច យុគា ហោន្តិ, អដ្ឋ ចារិយបុគ្គលា.

១៨២៦. ទិដ្ឋិកង្ខា បហីយន្តិ, អាទិមគ្គេន សព្ពថា;

អបាយគមនីយម្បិ, បាបមញ្ញំ បហីយតិ.

១៨២៧. សកទាគាមិមគ្គេន, ខីយន្តោឡារិកា តថា;

អនាគាមិកមគ្គេន, កាមទោសាវ សព្ពថា.

១៨២៨. អរហត្តេន សព្ពេបិ, ក្លេសា ខីយន្តិ សព្ពថា;

ក្លេសហានិ យថាយោគ-មិតិ ញេយ្យា វិភាវិនា.

១៨២៩. បដិសម្ភិទា ចតស្សោ, អត្ថេ ធម្មេ និរុត្តិយំ;

បដិភានេ ច ភាសន្តិ, ញាណំ ភេទគតំ ពុធា.

១៨៣០. ហេតុប្ផលញ្ច និព្ពានំ, ភាសិតត្ថោ តថាបរោ;

បាកាក្រិយាតិ បញ្ចេតេ, អត្ថនាមេន ភាសិតា.

១៨៣១. ហេតុ ចារិយមគ្គោ ច, ភាសិតញ្ច តថាបរំ;

កុសលាកុសលញ្ចេតិ, បញ្ច ធម្មោ បកាសិតោ.

១៨៣២. តត្ថេវំ ទសធា ភេទេ, អត្ថធម្មេ យថារហំ;

យោ វោហារោ សភាវេន, សា និរុត្តីតិ សម្មតា.

១៨៣៣. តំតំគោចរកិច្ចាទិ-ភេទភិន្នំ តហិំ តហិំ;

បវត្តមានំ យំ ញាណំ, បដិភានំ តមីរិតំ.

១៨៣៤. បុព្ពយោគោ ពាហុស្សច្ចំ,

ទេសភាសា តថាគមោ;

បរិបុច្ឆា ចាធិគមោ,

និស្សយោ មិត្តសម្បទា.

១៨៣៥. ឥច្ចូបនិស្សយំ លទ្ធា, ភិជ្ជតិ បដិសម្ភិទា;

អសេក្ខភូមិយំ វាថ, សេក្ខភូមិយមេវ វា.

១៨៣៦. សរស្សតោ អាគមតោ, តថាលម្ពណតោបិ ច;

នាមុប្បត្តិំ បកាសេន្តិ, ផលស្ស តិវិធំ ពុធា.

១៨៣៧. តិធា តតោ សមាបត្តិ, សោតាបត្តិផលាទិកា;

សុញ្ញតា ចានិមិត្តា ច, តថាប្បណិហិតាតិ ច.

១៨៣៨. តញ្ច វុត្តនយេនេវ, សមាបជ្ជិតុមិច្ឆតោ;

វិបស្សន្តស្ស សង្ខារេ, ផលមប្បេតិ អត្តនោ.

១៨៣៩. និរោធំ តុ សមាបត្តិំ, រូបារូបស្ស លាភកោ;

សមាបជ្ជតានាគាមី, អរហា ច យថា តថា.

១៨៤០. រូបារូបសមាបត្តិំ, សមាបជ្ជ យថាក្កមំ;

វុដ្ឋហិត្វា វិបស្សន្តោ, តត្ថ តត្ថេវ សង្ខតេ.

១៨៤១. យុគនន្ធំ បវត្តេត្វា, សមថញ្ច វិបស្សនំ;

យាវាកិញ្ចញ្ញាយតន-មិត្ថំ បត្វា តតោ បរំ.

១៨៤២. អធិដ្ឋេយ្យមធិដ្ឋាយ, កត្វាភោគំ យថារហំ;

មគ្គារូបសមាបត្តិំ, សមាបជ្ជតិ បណ្ឌិតោ.

១៨៤៣. តតោ និរោធំ ផុសតិ, ចិត្តុប្បាទទ្វយា បរំ;

តស្សេវំ មនសាភាវោ, និរោធោតិ បវុច្ចតិ.

១៨៤៤. ផលចិត្តសមុប្បាទា, វុដ្ឋានំ តស្ស ទីបិតំ;

តតោ ភវង្គំ ឆេត្វាន, បច្ចវេក្ខតិ ពុទ្ធិមា.

១៨៤៥. ឥច្ចានេកគុណាធារំ, បញ្ញាភាវនមុត្តមំ;

ភាវេយ្យ មតិមា យោគី, បត្ថេន្តោ ហិតមត្តនោ.

១៨៤៦. ឥត្ថំ សុសម្បាទិតសីលចិត្ត-

បញ្ញាវិសុទ្ធី បដិបាទយន្តា;

បត្វាន សម្ពោធិមបេតសោកា,

បាលេន្តិ សោត្ថិំ បរមំ ចិរាយ.

១៨៤៧. តេ បត្តិបត្តា បរមប្បតីតា,

បក្ខាលិតក្លេសមលា មហេសី;

អច្ចន្តវោទាតគុណោទិតត្តា,

លោកស្ស ហោន្តុត្តមទក្ខិណេយ្យា.

ឥតិ នាមរូបបរិច្ឆេទេ និស្សន្ទផលវិភាគោ នាម

តេរសមោ បរិច្ឆេទោ.

និដ្ឋិតោ ច សព្ពថាបិ វិបស្សនាវិភាគោ.

និគមនកថា

១៨៤៨. ឯត្តាវតា បដិញ្ញាតោ, បវក្ខាមីតិ អាទិតោ;

នាមរូបបរិច្ឆេទោ, បរិនិដ្ឋាបិតោ មយា.

១៨៤៩. តេរសេវ បរិច្ឆេទា, វិភត្តា សត្ត សាធិកា;

នាមរូបបរិច្ឆេទេ, ភាណវារា បកាសិតា.

១៨៥០. អភិធម្មបរមត្ថា, សមថោ ច វិបស្សនា;

វិសុំ វិសុំ វិភត្តាតិ, វិភាគេត្ថ តិធា មតា.

១៨៥១. សោយំ វិជ្ជាវិមោក្ខា ច, ហទយេសុ វិភាវិនំ;

វល្លភត្តមធិដ្ឋាយ, សាសនេត្ថ គវេសិនំ.

១៨៥២. មនោគតតមុទ្ធំសី, រវិរំសីវ បណ្ឌិតោ;

ទស្សេតុ ចិរមាលោកំ, សទ្ធម្មរតនាលយេ.

១៨៥៣. បណ្ឌិច្ចំ បរមត្ថេសុ, បាដវំ បដិបត្តិយំ;

បត្ថយន្តេន ភិក្ខូន-មិត្ថំ សុគតសាសនេ.

១៨៥៤. នាមរូបបរិច្ឆេទ-មសំកិណ្ណមនាកុលំ;

កុព្ពតា ហិតកាមេន, សុកតេន កតេន មេ.

១៨៥៥. មហាមេរុនិភំ គេហំ, មហាចេតិយភូសិតំ;

មហាវិហារមារុឡ្ហ-មហាពោធិមហុស្សវំ.

១៨៥៦. អលង្កាតុំ បហោន្តាលំ, ចិរកាលំ តបោធនា;

លង្កាទីបស្សលង្ការំ, កលង្កាបគតាលយំ.

១៨៥៧. នាមរូបបរិច្ឆេទោ,

អន្តរាយំ វិនា យថា;

និដ្ឋិតោយំ តថា លោកេ,

និដ្ឋន្តជ្ឈាសយា សុភា.

ឥតិ អនុរុទ្ធាចរិយេន វិរចិតំ

នាមរូបបរិច្ឆេទបករណំ និដ្ឋិតំ.