១. បឋមោ បរិច្ឆេទោ

រូបសង្ខេបោ

៣. សច្ចានិ បរមត្ថញ្ច, សម្មុតិញ្ចាតិ ទ្វេ តហិំ;

ថទ្ធភាវាទិនា ញេយ្យំ, សច្ចំ តំ បរមត្ថកំ.

៤. សន្និវេសវិសេសាទិញេយ្យំ សម្មុតិ តំ ទ្វយំ;

ភាវសង្កេតសិទ្ធីនំ, តថត្តា សច្ចមីរិតំ.

៥. បរមត្ថោ សនិព្ពានបញ្ចក្ខន្ធេត្ថ រាសិតោ;

ខន្ធត្ថោ ច សមាសេត្វា, វុត្តោតីតាទិភេទនំ.

៦. វេទនាទីសុបេកស្មិំ, ខន្ធសទ្ទោ តុ រុឡ្ហិយា;

សមុទ្ទាទេកទេសេ តុ, សមុទ្ទាទិរវោ យថា.

៧. តត្ថ សីតាទិរុប្បត្តា, រូបំ ភ្វាបានលានិលំ;

ភូតំ កថិនទវតាបចនីរណភាវកំ.

៨. ចក្ខុ សោតញ្ច ឃានញ្ច, ជិវ្ហា កាយោ បភា រវោ;

គន្ធោ រសោជា ឥត្ថី ច, បុមា វត្ថុ ច ជីវិតំ.

៩. ខំ ជាតិ ជរតា ភង្គោ, រូបស្ស លហុតា តថា;

មុទុកម្មញ្ញតា កាយវចីវិញ្ញត្តិ ភូតិកំ.

១០. ចក្ខាទី ទដ្ឋុកាមាទិហេតុកម្មជភូតិកា;

បសាទា រូបសទ្ទាទី, ចក្ខុញាណាទិគោចរា.

១១. ឱជា ហិ យាបនា ឥត្ថិបុមលិង្គាទិហេតុកំ;

ភាវទ្វយំ តុ កាយំវ, ព្យាបិ នោ សហវុត្តិកំ.

១២. និស្សយំ វត្ថុ ធាតូនំ, ទ្វិន្នំ កម្មជបាលនំ;

ជីវិតំ ឧប្បលាទីនំ, ឧទកំវ ឋិតិក្ខណេ.

១៣. ខំ រូបានំ បរិច្ឆេទោ, ជាតិអាទិត្តយំ បន;

រូបនិព្ពត្តិ បាកោ ច, ភេទោ ចេវ យថាក្កមំ.

១៤. លហុតាទិត្តយំ តំ ហិ, រូបានំ កមតោ សិយា;

អទន្ធថទ្ធតា ចាបិ, កាយកម្មានុកូលតា.

១៥. អភិក្កមាទិជនកចិត្តជស្សានិលស្ស ហិ;

វិការោ កាយវិញ្ញត្តិ, រូបត្ថម្ភាទិការណំ.

១៦. វចីភេទកចិត្តេន, ភូតភូមិវិការតា;

វចីវិញ្ញត្តុបាទិន្នឃដ្ដនស្សេវ ការណំ.

១៧. រូបមព្យាកតំ សព្ពំ, វិប្បយុត្តមហេតុកំ;

អនាលម្ពំ បរិត្តាទិ, ឥតិ ឯកវិធំ នយេ.

១៨. អជ្ឈត្តិកានិ ចក្ខាទី, បញ្ចេតេវ បសាទកា;

វត្ថុនា វត្ថុ តានេវ, ទ្វារា វិញ្ញត្តិភី សហ.

១៩. សេសំ ពាវីសតិ ចេកវីស វីសតិ ពាហិរំ;

អប្បសាទមវត្ថុំ ច, អទ្វារញ្ច យថាក្កមំ.

២០. បសាទា បញ្ច ភាវាយុ, ឥន្ទ្រិយនិន្ទ្រិយេតរំ;

វិនាបំ អាទិតោ យាវ, រសា ថូលំ ន ចេតរំ.

២១. អដ្ឋកំ អវិនិព្ភោគំ, វណ្ណគន្ធរសោជកំ;

ភូតំ តំ តុ វិនិព្ភោគមិតរន្តិ វិនិទ្ទិសេ.

២២. អដ្ឋារសាទិតោ រូបា, និប្ផន្នំ តុ ន ចេតរំ;

ផោដ្ឋព្ពមាបវជ្ជំ តុ, ភូតំ កាមេ ន ចេតរំ.

២៣. សេក្ខសប្បដិឃាសេក្ខបដិឃំ ទ្វយវជ្ជិតំ;

វណ្ណំ តទិតរំ ថូលំ, សុខុមញ្ចេតិ តំ តិធា.

២៤. កម្មជាកម្មជំនេវកម្មាកម្មជតោ តិធា;

ចិត្តោជឧតុជាទីនំ, វសេនាបិ តិធា តថា.

២៥. ទិដ្ឋំ សុតំ មុតញ្ចាបិ, វិញ្ញាតំ វត ចេតសា;

ឯកមេកញ្ច បញ្ចាបិ, វីសតិ ច កមា សិយុំ.

២៦. ហទយំ វត្ថុ វិញ្ញត្តិ, ទ្វារំ ចក្ខាទិបញ្ចកំ;

វត្ថុ ទ្វារញ្ច សេសានិ, វត្ថុ ទ្វារញ្ច នោ សិយា.

២៧. និប្ផន្នំ រូបរូបំ ខំ, បរិច្ឆេទោថ លក្ខណំ;

ជាតិអាទិត្តយំ រូបំ, វិការោ លហុតាទិកំ.

២៨. យថា សង្ខតធម្មានំ, លក្ខណំ សង្ខតំ តថា;

បរិច្ឆេទាទិកំ រូបំ, តជ្ជាតិមនតិក្កមា.

២៩. កម្មចិត្តានលាហារបច្ចយានំ វសេនិធ;

ញេយ្យា បវត្តិ រូបស្ស, បិណ្ឌានញ្ច វសា កថំ.

៣០. កម្មជំ សេន្ទ្រិយំ វត្ថុ, វិញ្ញត្តិ ចិត្តជា រវោ;

ចិត្តគ្គិជោ លហុតាទិត្តយំ ចិត្តានលន្នជំ.

៣១. អដ្ឋកំ ជាតិ ចាកាសោ, ចតុជា ជរតា ខយំ;

កុតោចិ នេវ ជាតំ តប្បាកភេទំ ហិ តំ ទ្វយំ.

៣២. ជាតិយាបិ ន ជាតត្តំ, កុតោចិដ្ឋកថានយា;

លក្ខណាភាវតោ តស្សា, សតិ តស្មិំ ន និដ្ឋិតិ.

៣៣. កម្មចិត្តានលន្នេហិ, បិណ្ឌា នវ ច សត្ត ច;

ចត្តារោ ទ្វេ ច វិញ្ញេយ្យា, សជីវេ ទ្វេ អជីវកេ.

៣៤. អដ្ឋកំ ជីវិតេនាយុនវកំ ភាវវត្ថុនា;

ចក្ខាទី បញ្ច ទសកា, កលាបា នវ កម្មជា.

៣៥. សុទ្ធដ្ឋវិញ្ញត្តិយុត្តនវកោបិ ច ទសកោ;

សុទ្ធសទ្ទេន នវកោ, លហុតាទិទសេកកោ.

៣៦. វិញ្ញត្តិលហុតាទីហិ, បុន ទ្វាទស តេរស;

ចិត្តជា ឥតិ វិញ្ញេយ្យា, កលាបា សត្ត វា ឆ វា.

៣៧. សុទ្ធដ្ឋំ សទ្ទនវកំ, លហុតាទិទសេកកំ;

សទ្ទេនលហុតាទីហិ, ចតុរោតុជកណ្ណិកា.

៣៨. សុទ្ធដ្ឋលហុតាទីហិ, អន្នជា ទ្វេតិមេ នវ;

សត្ត ចត្តារិ ទ្វេ ចេតិ, កលាបា វីសតី ទ្វិភិ.

៣៩. តយដ្ឋកា ច ចត្តារោ, នវកា ទសកា នវ;

តយោ ទ្វេកោ ច ឯកេន, ទស ទ្វីហិ ច តីហិ ច.

៤០. ចតុន្នម្បិ ច ធាតូនំ, អធិកំសវសេនិធ;

រូបភេទោថ វិញ្ញេយ្យោ, កម្មចិត្តានលន្នជោ.

៤១. កេសាទិមត្ថលុង្គន្តា, បថវំសាតិ វីសតិ;

បិត្តាទិមុត្តកន្តា តេ, ជលំសា ទ្វាទសីរិតា.

៤២. យេន សន្តប្បនំ យេន, ជីរណំ ទហនំ តថា;

យេនសិតាទិបាកោតិ, ចតុរំសានលាធិកា.

៤៣. ឧទ្ធាធោគមកុច្ឆិដ្ឋា, កោដ្ឋាសេយ្យង្គសារិ ច;

អស្សាសោតិ ច វិញ្ញេយ្យា, ឆឡំសា វាយុនិស្សិតា.

៤៤. បុព្ពមុត្តករីសញ្ចុទរិយំ ចតុរោតុជា;

កម្មា បាចគ្គិ ចិត្តម្ហា-ស្សាសោតិ ឆបិ ឯកជា.

៤៥. សេទសិង្ឃានិកស្សុ ច, ខេឡោ ចិត្តោតុសម្ភវា;

ទ្វិជា ទ្វត្តិំស កោដ្ឋាសា, សេសា ឯវ ចតុព្ភវា.

៤៦. ឯកជេស្វាទិចតូសុ, ឧតុជា ចតុរដ្ឋកា;

ជីវីតនវកោ បាចេស្សាសេ ចិត្តភវដ្ឋកោ.

៤៧. ទ្វិជេសុ មនតេជេហិ, ទ្វេ ទ្វេ ហោន្តិ បនដ្ឋកា;

សេសតេជានិលំសេសុ, ឯកេកម្ហិ តយោ តយោ.

៤៨. អដ្ឋកោជមនគ្គីហិ, ហោន្តិ អដ្ឋសុ កម្មតោ;

អដ្ឋាយុនវកា ឯវំ, ឥមេ អដ្ឋ ចតុព្ភវា.

៤៩. ចតុវីសេសុ សេសេសុ, ចតុជេសុដ្ឋកា តយោ;

ឯកេកម្ហិ ច វិញ្ញេយ្យា, បិណ្ឌា ចិត្តានលន្នជា.

៥០. កម្មជា កាយភាវវ្ហា, ទសកាបិ សិយុំ តហិំ;

ចតុវីសេសុ អំសេសុ, ឯកេកម្ហិ ទុវេ ទុវេ.

៥១. បញ្ចាបិ ចក្ខុសោតាទី, បទេសទសកា បុន;

នវកា សទ្ទសង្ខាតា, ទ្វេតិច្ចេវំ កលាបតោ.

៥២. តេបញ្ញាស ទសេកញ្ច, នវុត្តរសតានិ ច;

ទសកា នវកា ចេវ, អដ្ឋកា ច សិយុំ កមា.

៥៣. សេកបញ្ចសតំ កាយេ, សហស្សំ តំ បវត្តតិ;

បរិបុណ្ណិន្ទ្រិយេ រូបំ, និប្ផន្នំ ធាតុភេទតោ.

៥៤. ចិត្តុប្បាទេ សិយុំ រូប-ហេតូ កម្មាទយោ បន;

ឋិតិ ន បាឋេ ចិត្តស្ស, ន ភង្គេ រូបសម្ភវោ.

៥៥. ‘‘អញ្ញថត្តំ ឋិតស្សា’’តិ, វុត្តត្តាវ ឋិតិក្ខណំ;

អត្ថីតិ ចេ បពន្ធេន, ឋិតិ តត្ថ បវុច្ចតិ.

៥៦. អថ វា តិក្ខណេ កម្មំ, ចិត្តមត្តុទយក្ខណេ;

ឧតុឱជាត្តនោ ឋានេ, រូបហេតូ ភវន្តិ ហិ.

៥៧. សេយ្យស្សាទិក្ខណេ កាយ-

ភាវវត្ថុវសា តយោ;

ទសកា ហោន្តិភាវិស្ស,

វិនា ភាវំ ទុវេ សិយុំ.

៥៨. តតោ បរញ្ច កម្មគ្គិចិត្តជា តេ ច បិណ្ឌិកា;

អដ្ឋកា ច ទុវេ បុព្ពេ, វុត្តវុត្តក្ខណេ វទេ.

៥៩. កាលេនាហារជំ ហោតិ, ចក្ខាទិទសកានិ ច;

ចតុបច្ចយតោ រូបំ, សម្បិណ្ឌេវំ បវត្តតិ.

៦០. តំ សត្តរសចិត្តាយុ, វិនា វិញ្ញត្តិលក្ខណំ;

សន្តតាមរណា រូបំ, ជរាទិផលមាវហំ.

៦១. ភង្គា សត្តរសុប្បាទេ, ជាយតេ កម្មជំ ន តំ;

តទុទ្ធំ ជាយតេ តស្មា, តក្ខយា មរណំ ភវេ.

៦២. អាយុកម្មុភយេសំ វា, ខយេន មរណំ ភវេ;

ឧបក្កមេន វា កេសញ្ចុបច្ឆេទកកម្មុនា.

៦៣. ឱបបាតិកភាវិស្ស, ទសកា សត្ត កម្មជា;

កាមេ អាទោ ភវន្តគ្គិជាហិ បុព្ពេវ ភូយតេ.

៦៤. អាទិកប្បនរានញ្ច, អបាយេ អន្ធកស្ស ច;

ពធិរស្សាបិ អាទោ ឆ, បុព្ពេវេតរជា សិយុំ.

៦៥. តត្ថេវន្ធពធិរស្ស, បញ្ច ហោន្តិ អភាវិនោ;

យុត្តិយា ឥធ វិញ្ញេយ្យា, បញ្ច វា ចតុរោបិ វា.

៦៦. ចក្ខាទិត្តយហីនស្ស, ចតុរោវ ភវន្តិតិ;

វុត្តំ ឧបបរិក្ខិត្វា, គហេតព្ពំ វិជានតា.

៦៧. រូបេ ជីវិតឆក្កញ្ច, ចក្ខាទិសត្តកត្តយំ;

បញ្ច ឆ ឧតុចិត្តេហិ, បញ្ច ឆាសញ្ញិនំ ភវេ.

៦៨. បញ្ចធាត្វាទិនិយមា, បាឋេ គន្ធរសោជនំ;

នុប្បត្តិ តត្ថ ភូតានំ, អផោដ្ឋព្ពបវត្តិនំ.

៦៩. ថទ្ធុណ្ហីរណភាវោវ, នត្ថិ ធាត្វាទិកិច្ចតោ;

អញ្ញំ គន្ធាទីនំ តេសំ, តក្កិច្ចេនោបលទ្ធិតោ.

៧០. រូបេ សប្បដិឃត្តាទិ, តត្ថ រុប្បនតា វិយ;

ឃដ្ដនញ្ច រវុប្បាទស្សញ្ញត្ថស្សេវ ហេតុតា.

៧១. ឥច្ឆិតព្ពមិមេកន្តមេវំ បាឋាវិរោធតោ;

អថ វា តេហិ វិញ្ញេយ្យំ, ទសកំ នវកដ្ឋកំ.

៧២. សព្ពំ កាមភវេ រូបំ, រូបេ ឯកូនវីសតិ;

អសញ្ញីនំ ទស គន្ធរសោជាហិ ច ព្រហ្មុនំ.

ឥតិ សច្ចសង្ខេបេ រូបសង្ខេបោ នាម

បឋមោ បរិច្ឆេទោ.