២. ទុតិយោ បរិច្ឆេទោ

ខន្ធត្តយសង្ខេបោ

៧៣. វេទនានុភវោ តេធា, សុខទុក្ខមុបេក្ខយា;

ឥដ្ឋានិដ្ឋានុភវនមជ្ឈានុភវលក្ខណា.

៧៤. កាយិកំ មានសំ ទុក្ខំ, សុខោបេក្ខា ច វេទនា;

ឯកំ មានសមេវេតិ, បញ្ចធិន្ទ្រិយភេទតោ.

៧៥. យថា តថា វា សញ្ញាណំ, សញ្ញា សតិនិពន្ធនំ;

ឆធា ឆទ្វារសម្ភូតផស្សជានំ វសេន សា.

៧៦. សង្ខារា ចេតនា ផស្សោ,

មនក្ការាយុ សណ្ឋិតិ;

តក្កោ ចារោ ច វាយាមោ,

បីតិ ឆន្ទោធិមោក្ខកោ.

៧៧. សទ្ធា សតិ ហិរោត្តប្បំ, ចាគោ មេត្តា មតិ បុន;

មជ្ឈត្តតា ច បស្សទ្ធី, កាយចិត្តវសា ទុវេ.

៧៨. លហុតា មុទុកម្មញ្ញបាគុញ្ញមុជុតា តថា;

ទយា មុទា មិច្ឆាវាចា, កម្មន្តាជីវសំវរោ.

៧៩. លោភោ ទោសោ ច មោហោ ច, ទិដ្ឋិ ឧទ្ធច្ចមេវ ច;

អហិរីកំ អនោត្តប្បំ, វិចិកិច្ឆិតមេវ ច.

៨០. មានោ ឥស្សា ច មច្ឆេរំ, កុក្កុច្ចំ ថិនមិទ្ធកំ;

ឥតិ ឯតេវ បញ្ញាស, សង្ខារក្ខន្ធសញ្ញិតា.

៨១. ព្យាបារោ ចេតនា ផស្សោ, ផុសនំ សរណំ តហិំ;

មនក្ការោ បាលនាយុ, សមាធិ អវិសារតា.

៨២. អារោបនានុមជ្ជដ្ឋា, តក្កចារា បនីហនា;

វីរិយំ បីននា បីតិ, ឆន្ទោ តុ កត្តុកាមតា.

៨៣. អធិមោក្ខោ និច្ឆយោ សទ្ធា,

បសាទោ សរណំ សតិ;

ហិរី បាបជិគុច្ឆា ហិ,

ឱត្តប្បំ តស្ស ភីរុតា.

៨៤. អលគ្គោ ច អចណ្ឌិក្កំ, ចាគោ មេត្តា មតិ បន;

យាថាវពោធោ មជ្ឈត្តំ, សមវាហិតលក្ខណំ.

៨៥. ឆ យុគានិ កាយចិត្តទរគារវថទ្ធតា-

អកម្មញ្ញត្តគេលញ្ញកុដិលានំ វិនោទនា.

៨៦. តានុទ្ធតាទិថិនាទិទិដ្ឋាទីនំ យថាក្កមំ;

សេសកាទិអសទ្ធាទិមាយាទីនំ វិបក្ខិនោ.

៨៧. ទុក្ខាបនយនកាមា, ទយា មោទា បមោទនា;

វចីទុច្ចរិតាទីនំ, វិរាមោ វិរតិត្តយំ.

៨៨. លោភោ ទោសោ ច មោហោ ច,

គេធចណ្ឌមនន្ធនា;

កមេន ទិដ្ឋិ ទុគ្គាហោ,

ឧទ្ធច្ចំ ភន្តតំ មតំ.

៨៩. អហិរីកមលជ្ជត្តំ, អនោត្តប្បមតាសតា;

សំសយោ វិចិកិច្ឆា ហិ, មានោ ឧន្នតិលក្ខណោ.

៩០. បរស្សកសម្បត្តីនំ,

ឧសូយា ច និគូហនា;

ឥស្សាមច្ឆេរកា តាបោ,

កតាកតស្ស សោចនា.

៩១. ថិនំ ចិត្តស្ស សង្កោចោ, អកម្មញ្ញត្តតា បន;

មិទ្ធមិច្ចេវមេតេសំ, លក្ខណញ្ច នយេ ពុធោ.

៩២. វេទនាទិសមាធន្តា, សត្ត សព្ពគសញ្ញិតា;

តក្កាទិអធិមោក្ខន្តា, ឆ បកិណ្ណកនាមកា.

៩៣. សទ្ធាទយោ វិរមន្តា, អរណា បញ្ចវីសតិ;

លោភាទិមិទ្ធកន្តានិ, សរណានិ ចតុទ្ទស.

៩៤. ឥស្សាមច្ឆេរកុក្កុច្ចទោសា កាមេ ទយា មុទា;

កាមេ រូបេ ច សេសា ឆ-ចត្តាលីស តិធាតុជា.

៩៥. ឆន្ទនិច្ឆយមជ្ឈត្តមនក្ការា សឧទ្ធវា;

ទយាទី បញ្ច មានាទី, ឆ យេវាបន សោឡស.

៩៦. ឆន្ទាទី បញ្ច និយតា, តត្ថេកាទស នេតរា;

អហិរីកមនោត្តប្បំ, លោកនាសនកំ ទ្វយំ.

៩៧. ឯតេ ទ្វេ មោហុទ្ធច្ចាតិ, ចត្តារោ បាបសព្ពគា;

លោកបាលទុកំ វុត្តំ, ហិរិឱត្តប្បនាមកំ.

៩៨. អារម្មណូបនិជ្ឈានា, ឈានង្គា តក្កចារកា;

បីតិ ឯកគ្គតា ចេតិ, សត្ត វិត្តិត្តយេន វេ.

៩៩. សទ្ធា សតិ មតេកគ្គ-ធិតិ លោកវិនាសកា;

បាលកា នវ ចេតានិ, ពលានិ អវិកម្បតោ.

១០០. ឯត្ថ សទ្ធាទិបញ្ចាយុ, កត្វាត្រ ចតុធា មតិំ;

វេទនាហិ ទ្វិសត្តេតេ, ឥន្ទ្រិយានាធិបច្ចតោ.

១០១. មនរូបិន្ទ្រិយេហេតេ, សព្ពេ ឥន្ទ្រិយនាមកា;

ពាវីសតិ ភវន្តាយុទ្វយំ កត្វេកសង្គហំ.

១០២. ទិដ្ឋីហេកគ្គតាតក្កសតីវិរតិយោ បថា;

អដ្ឋ និយ្យានតោ អាទិចតុរោ ភិត្វាន ទ្វាទស.

១០៣. ផស្សោ ច ចេតនា ចេវ,

ទ្វេវេត្ថាហារណត្តតោ;

អាហារា មនវោជាហិ,

ភវន្តិ ចតុរោថវា.

១០៤. ហេតុ មូលដ្ឋតោ បាបេ,

លោភាទិត្តយមីរិតំ;

កុសលាព្យាកតេ ចាបិ,

អលោភាទិត្តយំ តថា.

១០៥. ទិដ្ឋិលោភទុសា កម្មបថាបាយស្ស មគ្គតោ;

តព្ពិបក្ខា សុគតិយា, តយោតិ ឆ បថីរិតា.

១០៦. បស្សទ្ធាទិយុគានិ ឆ, វគ្គត្តា យុគឡានិ តុ;

ឧបការា សតិ ធី ច, ពហូបការភាវតោ.

១០៧. ឱឃាហរណតោ យោគា,

យោជនេនាភវគ្គតោ;

សវនេនាសវា ទិដ្ឋិ-

មោហេជេត្ថ ទុធា លុភោ.

១០៨. ទឡ្ហគ្គាហេន ទិដ្ឋេជា, ឧបាទានំ តិធា តហិំ;

ទិដ្ឋិ ទោសេន តេ គន្ថា, គន្ថតោ ទិដ្ឋិហ ទ្វិធា.

១០៩. បញ្ចាវរណតោ កាម-កង្ខាទោសុទ្ធវំ តបោ;

ថិនមិទ្ធញ្ច មោហេន, ឆ វា នីវរណានិថ.

១១០. កត្វា តាបុទ្ធវំ ឯកំ, ថិនមិទ្ធញ្ច វុច្ចតិ;

កិច្ចស្សាហារតោ ចេវ, វិបក្ខស្ស ច លេសតោ.

១១១. ទិដ្ឋេជុទ្ធវទោសន្ធ-

កង្ខាថិនុណ្ណតី ទស;

លោកនាសយុគេនេតេ,

កិលេសា ចិត្តក្លេសតោ.

១១២. លោភទោសមូហមាន-ទិដ្ឋិកង្ខិស្សមច្ឆរា;

សំយោជនានិ ទិដ្ឋេជា, ភិត្វា ពន្ធនតោ ទុធា.

១១៣. តានិ មោហុទ្ធវំមានកង្ខាទោសេជទិដ្ឋិយោ;

ទុធាទិដ្ឋិ តិធា លោភំ, ភិត្វា សុត្តេ ទសីរិតា.

១១៤. ទិដ្ឋិលោភមូហមានទោសកង្ខា តហិំ ទុធា;

កត្វា លោភមិមេ សត្តានុសយា សមុទីរិតា.

១១៥. ទិដ្ឋិ ឯវ បរាមាសោ, ញេយ្យោ ឯវំ សមាសតោ;

អត្ថោ សង្ខារក្ខន្ធស្ស, វុត្តោ វុត្តានុសារតោ.

ឥតិ សច្ចសង្ខេបេ ខន្ធត្តយសង្ខេបោ នាម

ទុតិយោ បរិច្ឆេទោ.