៣. តតិយោ បរិច្ឆេទោ

ចិត្តបវត្តិបរិទីបនោ

១១៦. ចិត្តំ វិសយគ្គាហំ តំ, បាកាបាកទតោ ទុធា;

កុសលាកុសលំ បុព្ពំ, បរមព្យាកតំ មតំ.

១១៧. កុសលំ តត្ថ កាមាទិភូមិតោ ចតុធា សិយា;

អដ្ឋ បញ្ច ចត្តារិ ច, ចត្តារិ កមតោ កថំ.

១១៨. សោមនស្សមតិយុត្តមសង្ខារមនមេកំ;

សសង្ខារមនញ្ចេកំ, តថា ហីនមតិទ្វយំ.

១១៩. តថោបេក្ខាមតិយុត្តំ, មតិហីនន្តិ អដ្ឋធា;

កាមាវចរបុញ្ញេត្ថ, ភិជ្ជតេ វេទនាទិតោ.

១២០. ទានំ សីលញ្ច ភាវនា, បត្តិទានានុមោទនា;

វេយ្យាវច្ចាបចាយញ្ច, ទេសនា សុតិ ទិដ្ឋិជុ.

១២១. ឯតេស្វេកមយំ ហុត្វា, វត្ថុំ និស្សាយ វា ន វា;

ទ្វារហីនាទិយោនីនំ, គតិយាទិប្បភេទវា.

១២២. តិកាលិកបរិត្តាទិគោចរេស្វេកមាទិយ;

ឧទេតិ កាលមុត្តំ វា, មតិហីនំ វិនាមលំ.

១២៣. ឆគោចរេសុ រូបាទិបញ្ចកំ បញ្ច គោចរា;

សេសំ រូបមរូបញ្ច, បញ្ញត្តិ ឆដ្ឋគោចរោ.

១២៤. ញាណយុត្តវរំ តត្ថ, ទត្វា សន្ធិំ តិហេតុកំ;

បច្ឆា បច្ចតិ បាកានំ, បវត្តេ អដ្ឋកេ ទុវេ.

១២៥. តេសុយេវ និហីនំ តុ, ទត្វា សន្ធិំ ទុហេតុកំ;

ទេតិ ទ្វាទស បាកេ ច, បវត្តេ ធីយុតំ វិនា.

១២៦. ឯវំ ធីហីនមុក្កដ្ឋំ, សន្ធិយញ្ច បវត្តិយំ;

ហីនំ បនុភយត្ថាបិ, ហេតុហីនេវ បច្ចតិ.

១២៧. កាមសុគតិយំយេវ, ភវភោគទទំ ឥទំ;

រូបាបាយេ បវត្តេវ, បច្ចតេ អនុរូបតោ.

១២៨. វិតក្កចារបីតីហិ, សុខេកគ្គយុតំ មនំ;

អាទិ ចារាទិបីតាទិសុខាទីហិ បរំ តយំ.

១២៩. ឧបេក្ខេកគ្គតាយន្តមារុប្បញ្ចេវមង្គតោ;

បញ្ចធា រូបបុញ្ញំ តុ, ហោតារម្មណតោ បន.

១៣០. អាទិស្សាសុភមន្តស្សុ-

បេក្ខា មេត្តាទយោ តយោ;

អាទោ ចតុន្នំ បញ្ចន្នំ,

សស្សាសកសិណានិ តុ.

១៣១. នភតម្មនតស្សុញ្ញតច្ចិត្តចតុគោចរេ;

កមេនាតិក្កមារុប្បបុញ្ញំ ហោតិ ចតុព្ពិធំ.

១៣២. អមលំ សន្តិមារព្ភ, ហោតិ តំ មគ្គយោគតោ;

ចតុធា បាទកជ្ឈានភេទតោ បុន វីសតិ.

១៣៣. ទិដ្ឋិកង្ខានុទំ អាទិ, កាមទោសតនូករំ;

បរំ បរំ តទុច្ឆេទី, អន្តំ សេសកនាសកំ.

១៣៤. ឯវំ ភូមិត្តយំ បុញ្ញំ, ភាវនាមយមេត្ថ ហិ;

បឋមំ វត្ថុំ និស្សាយ, ទុតិយំ ឧភយេនបិ.

១៣៥. តតិយេ អាទិ និស្សាយ,

សេសា និស្សាយ វា ន វា;

ហោន្តិ អាទិទ្វយំ តត្ថ,

សាធេតិ សកភូភវំ.

១៣៦. សាធេតានុត្តរំ សន្តិំ, អភិញ្ញា បនិធេវ តុ;

ឈានូទយផលត្តា ន, ផលទានាបិ សម្ភវា.

១៣៧. នាញ្ញភូផលទំ កម្មំ, រូបបាកស្ស គោចរោ;

សកម្មគោចរោយេវ, ន ចញ្ញោយមសម្ភវោ.

១៣៨. បាបំ កាមិកមេវេកំ, ហេតុតោ តំ ទ្វិធា បុន;

មូលតោ តិវិធំ លោភ-ទោសមោហវសា សិយា.

១៣៩. សោមនស្សកុទិដ្ឋីហិ, យុត្តមេកមសង្ខរំ;

សសង្ខារមនញ្ចេកំ, ហីនទិដ្ឋិទ្វយំ តថា.

១៤០. ឧបេក្ខាទិដ្ឋិយុត្តម្បិ, តថា ទិដ្ឋិវិយុត្តកំ;

វេទនាទិដ្ឋិអាទីហិ, លោភមូលេវមដ្ឋធា.

១៤១. សទុក្ខទោសាសង្ខារំ, ឥតរំ ទោសមូលកំ;

មោហមូលម្បិ សោបេក្ខំ, កង្ខុទ្ធច្ចយុតំ ទ្វិធា.

១៤២. តត្ថ ទោសទ្វយំ វត្ថុំ, និស្សាយេវិតរេ បន;

និស្សាយ វា ន វា ហោន្តិ, វធាទិសហិតា កថំ.

១៤៣. ផរុស្សវធព្យាបាទា, សទោសេន សលោភតោ;

កុទិដ្ឋិមេថុនាភិជ្ឈា, សេសា កម្មបថា ទ្វិភិ.

១៤៤. សន្ធិំ ចតូស្វបាយេសុ, ទេតិ សព្ពត្ថ វុត្តិយំ;

បច្ចតេ គោចរំ តស្ស, សកលំ អមលំ វិនា.

១៤៥. អព្យាកតំ ទ្វិធា បាក-ក្រិយា តត្ថាទិ ភូមិតោ;

ចតុធា កាមបាកេត្ថ, បុញ្ញបាកាទិតោ ទុធា.

១៤៦. បុញ្ញបាកា ទ្វិធាហេតុ-សហេតូតិ ទ្វិរដ្ឋកា;

អហេតូ បញ្ច ញាណានិ, គហណំ តីរណា ឧភោ.

១៤៧. កាយញាណំ សុខី តត្ថ, សោមនស្សាទិ តីរណំ;

សោបេក្ខានិ ឆ សេសានិ, សបុញ្ញំវ សហេតុកំ.

១៤៨. កេវលំ សន្ធិភវង្គ-តទាលម្ពចុតិព្ពសា;

ជាយតេ សេសមេតស្ស, បុព្ពេ វុត្តនយា នយេ.

១៤៩. មនុស្សវិនិបាតីនំ, សន្ធាទិ អន្តតីរណំ;

ហោតិ អញ្ញេន កម្មេន, សហេតុបិ អហេតុនំ.

១៥០. បាបជា បុញ្ញជាហេតុ-សមា តីរំ វិនាទិកំ;

សទុក្ខំ កាយវិញ្ញាណំ, អនិដ្ឋារម្មណា ឥមេ.

១៥១. តេ សាតគោចរា តេសុ, ទ្វិដ្ឋានំ អាទិតីរណំ;

បញ្ចដ្ឋានាបរា ទ្វេ តេ, បរិត្តវិសយាខិលា.

១៥២. សម្បដិច្ឆទ្វិបញ្ចន្នំ, បញ្ច រូបាទយោ តហិំ;

បច្ចុប្បន្នាវ សេសានំ, បាកានំ ឆ តិកាលិកា.

១៥៣. រូបារូបវិបាកានំ, សព្ពសោ សទិសំ វទេ;

សកបុញ្ញេន សន្ធាទិ-សកិច្ចត្តយតំ វិនា.

១៥៤. សមានុត្តរបាកាបិ, សកបុញ្ញេន សព្ពសោ;

ហិត្វា មោក្ខមុខំ តំ ហិ, ទ្វិធា មគ្គេ តិធា ផលេ.

១៥៥. ក្រិយា តិធាមលាភាវា,

ភូមិតោ តត្ថ កាមិកា;

ទ្វិធា ហេតុសហេតូតិ,

តិធាហេតុ តហិំ កថំ.

១៥៦. អាវជ្ជហសិតាវជ្ជា, សោបេក្ខសុខុបេក្ខវា;

បញ្ចឆកាមាវចរា, សកលារម្មណា ច តេ.

១៥៧. សហេតុរូបរូបា ច, សកបញ្ញំវារហតោ;

វុត្តិយា ន ផលេ បុប្ផំ, យថា ឆិន្នលតា ផលំ.

១៥៨. អនាសេវនយាវជ្ជ-ទ្វយំ បុថុជ្ជនស្ស ហិ;

ន ផលេ វត្តមានម្បិ, មោឃបុប្ផំ ផលំ យថា.

១៥៩. តិសត្ត ទ្វិឆ ឆត្តិំស, ចតុបញ្ច យថាក្កមំ;

បុញ្ញំ បាបំ ផលំ ក្រិយា, ឯកូននវុតីវិធំ.

១៦០. សន្ធិ ភវង្គមាវជ្ជំ, ទស្សនាទិកបញ្ចកំ;

គហតីរណវោដ្ឋព្ព-ជវតគ្គោចរំ ចុតិ.

១៦១. ឥតិ ឯសំ ទ្វិសត្តន្នំ, កិច្ចវុត្តិវសាធុនា;

ចិត្តប្បវត្តិ ឆទ្វារេ, សង្ខេបា វុច្ចតេ កថំ.

១៦២. កាមេ សរាគិនំ កម្ម-និមិត្តាទិ ចុតិក្ខណេ;

ខាយតេ មនសោយេវ, សេសានំ កម្មគោចរោ.

១៦៣. ឧបដ្ឋិតំ តមារព្ភ, បញ្ចវារំ ជវោ ភវេ;

តទាលម្ពំ តតោ តម្ហា, ចុតិ ហោតិ ជវេហិ វា.

១៦៤. អវិជ្ជាតណ្ហាសង្ខារ-សហជេហិ អបាយិនំ;

វិសយាទីនវច្ឆាទិ-នមនក្ខិបកេហិ តុ.

១៦៥. អប្បហីនេហិ សេសានំ, ឆាទនំ នមនម្បិ ច;

ខិបកា បន សង្ខារា, កុសលាវ ភវន្តិហ.

១៦៦. កិច្ចត្តយេ កតេ ឯវំ, កម្មទីបិតគោចរេ;

តជ្ជំ វត្ថុំ សហុប្បន្នំ, និស្សាយ វា ន វា តហិំ.

១៦៧. តជ្ជា សន្ធិ សិយា ហិត្វា, អន្តរត្តំ ភវន្តរេ;

អន្តរត្តំ វិនា ទូរេ, បដិសន្ធិ កថំ ភវេ.

១៦៨. ឥហេវ កម្មតណ្ហាទិ-ហេតុតោ បុព្ពចិត្តតោ;

ចិត្តំ ទូរេ សិយា ទីប-បដិឃោសាទិកំ យថា.

១៦៩. នាសញ្ញា ចវមានស្ស, និមិត្តំ ន ចុតី ច យំ;

ឧទ្ធំ សន្ធិនិមិត្តំ កិំ, បច្ចយោបិ កនន្តរោ.

១៧០. បុព្ពភវេ ចុតិ ទានិ, កាមេ ជាយនសន្ធិយា;

អញ្ញចិត្តន្តរាភាវា, ហោតានន្តរការណំ.

១៧១. ភវន្តរកតំ កម្មំ, យមោកាសំ លភេ តតោ;

ហោតិ សា សន្ធិ តេនេវ, ឧបដ្ឋាបិតគោចរេ.

១៧២. យស្មា ចិត្តវិរាគត្តំ, កាតុំ នាសក្ខិ សព្ពសោ;

តស្មា សានុសយស្សេវ, បុនុប្បត្តិ សិយា ភវេ.

១៧៣. បញ្ចទ្វារេ សិយា សន្ធិ, វិនា កម្មំ ទ្វិគោចរេ;

ភវសន្ធានតោ សន្ធិ, ភវង្គំ តំ តទង្គតោ.

១៧៤. តមេវន្តេ ចុតិ តស្មិំ, គោចរេ ចវនេន តុ;

ឯកសន្តតិយា ឯវំ, ឧប្បត្តិដ្ឋិតិភេទកា.

១៧៥. អថញ្ញារម្មណាបាថ-គតេ ចិត្តន្តរស្ស ហិ;

ហេតុសង្ខ្យំ ភវង្គស្ស, ទ្វិក្ខត្តុំ ចលនំ ភវេ.

១៧៦. ឃដ្ដិតេ អញ្ញវត្ថុម្ហិ, អញ្ញនិស្សិតកម្បនំ;

ឯកាពទ្ធេន ហោតីតិ, សក្ខរោបមយា វទេ.

១៧៧. មនោធាតុក្រិយាវជ្ជំ, តតោ ហោតិ សកិំ ភវេ;

ទស្សនាទិ សកទ្វារ-គោចរោ គហណំ តតោ.

១៧៨. សន្តីរណំ តតោ តម្ហា, វោដ្ឋព្ពញ្ច សកិំ តតោ;

សត្តក្ខត្តុំ ជវោ កាមេ, តម្ហា តទនុរូបតោ.

១៧៩. តទាលម្ពទ្វិកំ តម្ហា, ភវង្គំតិមហន្តរិ;

ជវា មហន្តេ វោដ្ឋព្ពា, បរិត្តេ និតរេ មនំ.

១៨០. វោដ្ឋព្ពស្ស បរិត្តេ តុ, ទ្វត្តិក្ខត្តុំ ជវោ វិយ;

វទន្តិ វុត្តិំ តំ បាឋេ, អនាសេវនតោ ន ហិ.

១៨១. និយមោបិធ ចិត្តស្ស, កម្មាទិនិយមោ វិយ;

ញេយ្យោ អម្ពោបមាទីហិ, ទស្សេត្វា តំ សុទីបយេ.

១៨២. មនោទ្វារេតរាវជ្ជំ, ភវង្គម្ហា សិយា តតោ;

ជវោកាមេ វិភូតេ តុ, កាមវ្ហេ វិសយេ តតោ.

១៨៣. កាមីនំ តុ តទាលម្ពំ, ភវង្គំ តុ តតោ សិយា;

អវិភូតេ បរិត្តេ ច, ភវង្គំ ជវតោ ភវេ.

១៨៤. អវិភូតេ វិភូតេ ច, បរិត្តេ អបរិត្តកេ;

ជវាយេវ ភវង្គំ តុ, ព្រហ្មានំ ចតុគោចរេ.

១៨៥. មហគ្គតំ បនារព្ភ, ជវិតេ ទោសសំយុតេ;

វិរុទ្ធត្តា ភវង្គំ ន, កិំ សិយា សុខសន្ធិនោ.

១៨៦. ឧបេក្ខាតីរណំ ហោតិ, បរិត្តេនាវជ្ជំ កថំ.

និយមោ ន វិនាវជ្ជំ, មគ្គតោ ផលសម្ភវា.