៤. ចតុត្ថោ បរិច្ឆេទោ

វិញ្ញាណក្ខន្ធបកិណ្ណកនយសង្ខេបោ

១៩២. ឯកធាទិនយោទានិ, បដុវឌ្ឍាយ យោគិនំ;

វុច្ចតេ វិសយគ្គាហា, សព្ពមេកវិធំ មនំ.

១៩៣. ឯកាសីតិ តិភូមដ្ឋំ, លោកិយំ សុត្តរញ្ច តំ;

សេសំ លោកុត្តរំ អដ្ឋ, អនុត្តរញ្ចិតី ទ្វិធា.

១៩៤. លោកបាកក្រិយាហេតូ, ចេកហេតូតិ សត្តហិ;

តិំស នាធិបតិ សាធិ-បតិ សេសាតិបី ទ្វិធា.

១៩៥. ឆន្ទចិត្តីហវីមំសា-ស្វេកេន មតិមា យុតំ;

វិនា វីមំសមេកេន, ញាណហីនមនំ យុតំ.

១៩៦. បរិត្តានប្បមាណានិ, មហគ្គតមនានិតិ;

តិធា ឆនវ ចដ្ឋ ច, តិនវា ច យថាក្កមំ.

១៩៧. ទ្វិបញ្ច ចិត្តំ វិញ្ញាណំ, តិស្សោ ហិ មនោធាតុយោ;

ឆសត្តតិ មនោញាណ-ធាតូតិ តិវិធា បុន.

១៩៨. ឯការម្មណចិត្តានិ, អនភិញ្ញំ មហគ្គតំ;

អមលំ បញ្ចវិញ្ញាណំ, នវបញ្ច ភវន្តិមេ.

១៩៩. បញ្ចាលម្ពំ មនោធាតុ, សាភិញ្ញំ កាមធាតុជំ;

សេសំ ឆារម្មណំ តំ ហិ, តេចត្តាលីស សង្ខ្យតោ.

២០០. កាមបាកទុសា ចាទិ-មគ្គោ ចាទិក្រិយា ទុវេ;

រូបា សព្ពេតិរូបេ ន, តេចត្តាលីស ហោន្តិមេ.

២០១. វិនាវ រូបេនារុប្ប-វិបាកា ចតុរោ សិយុំ;

ទ្វេចត្តាលីស សេសានិ, វត្តន្តុភយថាបិ ច.

២០២. ចតុធាបិ អហេត្វេកទ្វិហេតុកតិហេតុតោ;

អដ្ឋារស ទ្វេ ពាវីស, សត្តចត្តាលិសំ ភវេ.

២០៣. កាមេ ជវា សវោដ្ឋព្ពា, អភិញ្ញាទ្វយមេវ ច;

រូបិរិយាបថវិញ្ញត្តិករាមេ ចតុរដ្ឋកា.

២០៤. ឆព្ពីសតិ ជវា សេសា, ករា រូបិរិយាបថេ;

ទ្វិបញ្ចមនវជ្ជានិ, កាមរូបផលានិ ច.

២០៥. អាទិក្រិយាតិ ចេកូន-វីស រូបករា ឥមេ;

សេសា ចុទ្ទស ភិន្នាវចុតិ សន្ធិ ន តីណិបិ.

២០៦. ឯកកិច្ចាទិតោ បញ្ច-វិធា តត្ថេកកិច្ចកា;

ទ្វិបញ្ចចិត្តំ ជវនំ, មនោធាតុដ្ឋសដ្ឋិមេ.

២០៧. ទ្វិកិច្ចាទីនិ វោដ្ឋព្ពំ, សុខតីរំ មហគ្គតេ;

បាកា កាមមហាបាកា, សេសា តីរា យថាក្កមំ.

២០៨. ទស្សនំ សវនំ ទិដ្ឋំ, សុតំ ឃាយនកាទិកំ;

តយំ មុតំ មនោធាតុត្តយំ ទិដ្ឋំ សុតំ មុតំ.

២០៩. ទិដ្ឋំ សុតំ មុតំ ញាតំ, សាភិញ្ញំ សេសកាមិកំ;

វិញ្ញាតារម្មណំ សេសមេវំ ឆព្ពិធមីរយេ.

២១០. សត្តធា សត្តវិញ្ញាណធាតូនំ តុ វសា ភវេ;

វុច្ចតេទានិ តស្សេវ, អនន្តរនយក្កមោ.

២១១. បុញ្ញេស្វាទិទ្វយា កាមេ, រូបបុញ្ញមនន្តកំ;

តប្បាទកុត្តរានន្តំ, ភវង្គញ្ចាទិតីរណំ.

២១២. ទុតិយន្តទ្វយា តីរំ, ភវង្គំ តតិយទ្វយា;

តេ អនន្តាមលំ បុញ្ញំ, មជ្ឈត្តញ្ច មហគ្គតំ.

២១៣. សព្ពវារេ សយញ្ចេតិ, តេបញ្ញាស តិសត្ត ច;

តេត្តិំស ច ភវន្តេតេ, រូបេសុ បន បុញ្ញតោ.

២១៤. តប្បាកា ច មតិយុត្ត-កាមបាកា សយំ ទស;

អារុប្បបុញ្ញតោ តេ ច, សកោ បាកោ សយំ បុន.

២១៥. អធោបាកា ច អន្តម្ហា, តតិយញ្ច ផលន្តិមេ;

ទសេកទ្វិតិបញ្ចាហិ, មគ្គា ចេកំ សកំ ផលំ.

២១៦. លោភមូលេកហេតូហិ, អន្តកាមសុភា វិយ;

សត្ត ទោសទ្វយា កាម-ភវង្គបេក្ខវា សយំ.

២១៧. មហាបាកតិហេតូហិ, សាវជ្ជា សព្ពសន្ធិយោ;

កាមច្ចុតីហិ សេសាហិ, សាវជ្ជា កាមសន្ធិយោ.

២១៨. កាមច្ចុតិ ច វោដ្ឋព្ពំ, សយញ្ច សុខតីរតោ;

បដិច្ឆា តីរណានិ ទ្វេ, ឥតរា សកតីរណំ.

២១៩. សកំ សកំ បដិច្ឆំ តុ, វិញ្ញាណេហិ ទ្វិបញ្ចហិ;

រូបបាកេហិ សាវជ្ជា, សន្ធិយោហេតុវជ្ជិតា.

២២០. អរូបបាកេស្វាទិម្ហា, កាមបាកា តិហេតុកា;

អន្តាវជ្ជម្បិ ចារុប្ប-បាកា ច នវ ហោន្តិមេ.

២២១. ទុតិយាទីហិ តេយេវ, អធោបាកំ វិនា វិនា;

ផលា តិហេតុកា បាកា, សយញ្ចេតិ ចតុទ្ទស.

២២២. ទ្វិបញ្ចាទិក្រិយា ហាសា, សយញ្ចារុប្បវជ្ជិតា;

ញាណយុត្តភវង្គាតិ, ទស វោដ្ឋព្ពតោ បន.

២២៣. កាមេ ជវា ភវង្គា ច, កាមរូបេ សយម្បិ វា;

នវបញ្ច សហេតាទិ-កិរិយទ្វយតោ បន.

២២៤. សយំ ភវង្គមតិមា, រូបេ សាតក្រិយាបិ ច;

តប្បាទកន្តិមញ្ចេតិ, ពាវីស តតិយា បន.

២២៥. តេ ច បាកា សយញ្ចន្តេ, ផលំ មជ្ឈា មហគ្គតា;

ក្រិយាតិ វីសតិ ហោន្តិ, សេសទ្វីហិ ទុកេហិ តុ.

២២៦. វុត្តបាកា សយញ្ចេតិ, ចុទ្ទសេវំ ក្រិយាជវា;

តទារម្មណំ មុញ្ចិត្វា, បដ្ឋាននយតោ នយេ.

២២៧. អថ សាតក្រិយា សាតំ, សេសំ សេសក្រិយាបិ ច;

តទាលម្ពំ យថាយោគំ, វទេ អដ្ឋកថានយា.

២២៨. មហគ្គតា ក្រិយា សព្ពា, សកបុញ្ញសមា តហិំ;

អន្តា ផលន្តិមំ ហោតិ, អយមេវ វិសេសតា.

២២៩. ឥមស្សានន្តរា ធម្មា, ឯត្តកាតិ បកាសិតា;

ឥមំ បនេត្តកេហីតិ, វុច្ចតេយំ នយោធុនា.

២៣០. ទ្វីហិ កាមជវា តីហិ, រូបារូបា ចតូហិ តុ;

មគ្គា ឆហិ ផលាទិ ទ្វេ, សេសា ទ្វេ បន សត្តហិ.

២៣១. ឯកម្ហា ទស បញ្ចហិ, បដិច្ឆា សុខតីរណំ;

កាមេ ទោសក្រិយាហីន-ជវេហិ គហតោ សកា.

២៣២. កាមេ ជវា ក្រិយាហីនា, តទាលម្ពា សវោដ្ឋព្ពា;

សគហញ្ចេតិ តេត្តិំសចិត្តេហិ បរតីរណា.

២៣៣. កាមបុញ្ញសុខីតីរកណ្ហវោដ្ឋព្ពតោ ទ្វយំ;

មហាបាកន្តិមំ ហោតិ, អនារុប្បចុតីហិ ច.

២៣៤. សត្តតិំស បនេតានិ, ឯត្ថ ហិត្វា ទុសទ្វយំ;

ឯតេហិ បញ្ចតិំសេហិ, ជាយតេ ទុតិយទ្វយំ.

២៣៥. សុខតីរាទិ សត្តេតេ, ក្រិយតោ ចាបិ សម្ភវា;

ញេយ្យា សេសានិ ចត្តារិ, ភវង្គេន ច លព្ភរេ.

២៣៦. មគ្គវជ្ជា សវោដ្ឋព្ពសុខិតីរជវាខិលា;

ចុតីតិ នវកដ្ឋាហិ, តតិយទ្វយមាទិសេ.

២៣៧. ឯតេហិ ទោសវជ្ជេហិ, សត្តតីហិតរទ្វយំ;

រូបបាកា វិនារុប្បបាកាហេតុទុហេតុកេ.

២៣៨. តេហេវេកូនសដ្ឋីហិ, ហោន្តិរុប្បាទិកំ វិនា;

ហាសាវជ្ជេ ជវេ រូបេ, អដ្ឋឆក្កេហិ តេហិ តុ.

២៣៩. សាធោបាកេហិ តេហេវ, ទុតិយាទីនិ អត្តនា;

អធោធោជវហីនេហិ, ឯកេកូនេហិ ជាយរេ.

២៤០. សុខតីរភវង្គានិ, សយញ្ចាតិ តិសត្តហិ;

អន្តាវជ្ជំ អនារុប្បភវង្គេហិ បនេតរំ.

២៤១. វុត្តានន្តរសង្ខាតោ, នយោ ទានិ អនេកធា;

បុគ្គលាទិប្បភេទាបិ, បវត្តិ តស្ស វុច្ចតេ.

២៤២. បុថុជ្ជនស្ស ជាយន្តេ, ទិដ្ឋិកង្ខាយុតានិ វេ;

សេក្ខស្សេវាមលា សត្ត, អនន្តានិតរស្ស តុ.

២៤៣. អន្តាមលំ អនាវជ្ជក្រិយា ចេកូនវីសតិ;

កុសលាកុសលា សេសា, ហោន្តិ សេក្ខបុថុជ្ជនេ.

២៤៤. ឥតរានិ បនាវជ្ជទ្វយំ បាកា ច សាសវា;

តិណ្ណន្នម្បិ សិយុំ ឯវំ, បញ្ចធា សត្តភេទតោ.

២៤៥. កាមេ សោឡស ឃានាទិត្តយំ ទោសមហាផលា;

រូបារូបេ សបាកោតិ, បញ្ចវីសតិ ឯកជា.

២៤៦. កាមបាកា ច សេសាទិមគ្គោ អាទិក្រិយា ទុវេ;

រូបេ ជវាតិ ពាវីស, ទ្វិជា សេសា តិធាតុជា.

២៤៧. វិត្ថារោបិ ច ភូមីសុ, ញេយ្យោ កាមសុភាសុភំ;

ហាសវជ្ជមហេតុញ្ច, អបាយេ សត្តតិំសិមេ.

២៤៨. ហិត្វា មហគ្គតេ បាកេ, អសីតិ សេសកាមិសុ;

ចក្ខុសោតមនោធាតុ, តីរណំ វោដ្ឋព្ពម្បិ ច.

២៤៩. ទោសហីនជវា សោ សោ, បាកោ រូបេ អនារិយេ;

បញ្ចសដ្ឋិ ឆសដ្ឋី តុ, បរិត្តាភាទីសុ តីសុ.

២៥០. អាទិបញ្ចាមលា កង្ខាទិដ្ឋិយុត្តេ វិនា តហិំ;

តេយេវ បញ្ចបញ្ញាស, ជាយរេ សុទ្ធភូមិសុ.

២៥១. អាទិមគ្គទុសាហាសរូបហីនជវា សកោ;

បាកោ វោដ្ឋព្ពនញ្ចាតិ, តិតាលីសំ សិយុំ នភេ.

២៥២. អធោធោមនវជ្ជា តេ,

បាកោ ចេវ សកោ សកោ;

ទុតិយាទីសុ ជាយន្តេ,

ទ្វេ ទ្វេ ឩនា តតោ តតោ.

២៥៣. អរូបេស្វេកមេកស្មិំ, រូបេស្វាទិត្តិកេបិ ច;

តិកេ ច តតិយេ ឯកំ, ទ្វេ ហោន្តិ ទុតិយត្តិកេ.

២៥៤. អន្តិមំ រូបបាកំ តុ, ឆសុ វេហប្ផលាទិសុ;

កាមសុគតិយំយេវ, មហាបាកា បវត្តរេ.

២៥៥. ឃាយនាទិត្តយំ កាមេ, បដិឃទ្វយមេវ ច;

សត្តរសេសុ បឋមំ, អមលំ មានវាទិសុ.

២៥៦. អរិយាបាយវជ្ជេសុ, ចតុរោទិប្ផលាទិកា;

អបាយារុប្បវជ្ជេសុ, ហាសរូបសុភក្រិយំ.

២៥៧. អបាយុទ្ធត្តយំ ហិត្វា, ហោតាកាសសុភក្រិយំ;

តថាបាយុទ្ធទ្វេ ហិត្វា, វិញ្ញាណកុសលក្រិយំ.

២៥៨. ភវគ្គាបាយវជ្ជេសុ, អាកិញ្ចញ្ញសុភក្រិយំ;

ទិដ្ឋិកង្ខាយុតា សុទ្ធេ, វិនា សព្ពាសុ ភូមិសុ.

២៥៩. អមលានិ ច តីណន្តេ,

ភវគ្គេ ច សុភក្រិយា;

មហាក្រិយា ច ហោន្តេតេ,

តេរសេវានបាយិសុ.

២៦០. អនារុប្បេ មនោធាតុ, ទស្សនំ សវតីរណំ;

កាមេ អនិដ្ឋសំយោគេ, ព្រហ្មានំ បាបជំ ផលំ.

២៦១. វោដ្ឋព្ពំ កាមបុញ្ញញ្ច, ទិដ្ឋិហីនំ សឧទ្ធវំ;

ចុទ្ទសេតានិ ចិត្តានិ, ជាយរេ តិំសភូមិសុ.

២៦២. ឥន្ទ្រិយានិ ទុវេ អន្តទ្វយវជ្ជេស្វហេតុសុ;

តីណិ កង្ខេតរាហេតុបាបេ ចត្តារិ តេរស.

២៦៣. ឆ ញាណហីនេ តព្ពន្តសាសវេ សត្ត និម្មលេ;

ចត្តាលីសេ បនដ្ឋេវំ, ញេយ្យមិន្ទ្រិយភេទតោ.