៥. បញ្ចមោ បរិច្ឆេទោ

និព្ពានបញ្ញត្តិបរិទីបនោ

៣០៤. រាគាទីនំ ខយំ វុត្តំ, និព្ពានំ សន្តិលក្ខណំ;

សំសារទុក្ខសន្តាបតត្តស្សាលំ សមេតវេ.

៣០៥. ខយមត្តំ ន និព្ពានំ, សគម្ភីរាទិវាចតោ;

អភាវស្ស ហិ កុម្មានំ, លោមស្សេវ ន វាចតា.

៣០៦. ខយោតិ វុច្ចតេ មគ្គោ, តប្បាបត្តា ឥទំ ខយំ;

អរហត្តំ វិយុប្បាទ-វយាភាវា ធុវញ្ច តំ.

៣០៧. សង្ខតំ សម្មុតិញ្ចាបិ, ញាណមាលម្ព នេវ ហិ;

ឆិន្ទេ មលេ តតោ វត្ថុ, ឥច្ឆិតព្ពមសង្ខតំ.

៣០៨. បត្តុកាមេន តំ សន្តិំ, ឆព្ពិសុទ្ធិំ សមាទិយ;

ញាណទស្សនសុទ្ធី តុ, សាធេតព្ពា ហិតត្ថិនា.

៣០៩. ចេតនាទិវិធា សីល-សុទ្ធិ តត្ថ ចតុព្ពិធា;

សោបចារសមាធី តុ, ចិត្តសុទ្ធីតិ វុច្ចតេ.

៣១០. សម្បាទេត្វាទិទ្វេសុទ្ធិំ, នមនា នាមំ តុ រុប្ប-

តោ រូបំ នត្ថិ អត្តាទិវត្ថូតិ ច វវត្ថបេ.

៣១១. មណិន្ធនាតបេ អគ្គិ, អសន្តោបិ សមាគមេ;

យថា ហោតិ តថា ចិត្តំ, វត្ថាលម្ពាទិសង្គមេ.

៣១២. បង្គុលន្ធា យថា គន្តុំ, បច្ចេកមសមត្ថកា;

យន្តិ យុត្តា យថា ឯវំ, នាមរូបវ្ហយា ក្រិយា.

៣១៣. ន នាមរូបតោ អញ្ញោ, អត្តាទិ ឥតិ ទស្សនំ;

សោធនត្តា ហិ ទុទ្ទិដ្ឋិំ, ទិដ្ឋិសុទ្ធីតិ វុច្ចតិ.

៣១៤. អវិជ្ជាតណ្ហុបាទាន-កម្មេនាទិម្ហិ តំ ទ្វយំ;

រូបំ កម្មាទិតោ នាមំ, វត្ថាទីហិ បវត្តិយំ.

៣១៥. សទា សព្ពត្ថ សព្ពេសំ, សទិសំ ន យតោ តតោ;

នាហេតុនាញ្ញោ អត្តាទិនិច្ចហេតូតិ បស្សតិ.

៣១៦. ឯវំ តីរយតេ កង្ខា, យាយ បញ្ញាយ បច្ចយេ;

ទិដ្ឋត្តា សុទ្ធិ សា កង្ខាតរណំ ឥតិ វុច្ចតិ.

៣១៧. បត្តញ្ញាតបរិញ្ញោ សោ, អត្រដ្ឋោ យតតេយតិ;

តីរណវ្ហបរិញ្ញាយ, វិសុទ្ធត្ថំ សទាទរោ.

៣១៨. តិកាលាទិវសា ខន្ធេ, សមាសេត្វា កលាបតោ;

អនិច្ចា ទុក្ខានត្តាតិ, អាទោ ឯវំ វិបស្សតិ.

៣១៩. ខន្ធានិច្ចា ខយដ្ឋេន, ភយដ្ឋេន ទុខាវ តេ;

អនត្តាសារកដ្ឋេន, ឥតិ បស្សេ បុនប្បុនំ.

៣២០. អាការេហិ អនិច្ចាទិចត្តាលីសេហិ សម្មសេ;

លក្ខណានំ វិភូតត្ថំ, ខន្ធានំ បន សព្ពសោ.

៣២១. ឯវញ្ចាបិ អសិជ្ឈន្តេ, នវធា និសិតិន្ទ្រិយោ;

សត្តកទ្វយតោ សម្មា, រូបារូបេ វិបស្សយេ.

៣២២. រូបមាទាននិក្ខេបា, វយោវុទ្ធត្តគាមិតោ;

សម្មសេវន្នជាទីហិ, ធម្មតារូបតោបិ ច.

៣២៣. នាមំ កលាបយមតោ, ខណតោ កមតោបិ ច;

ទិដ្ឋិមាននិកន្តីនំ, បស្សេ ឧគ្ឃាដនាទិតោ.

៣២៤. អវិជ្ជាតណ្ហាកម្មន្ន-ហេតុតោ រូបំ ឧព្ភវេ;

វិនាហារំ សផស្សេហិ, វេទនាទិត្តយំ ភវេ.

៣២៥. តេហិយេវ វិនា ផស្សំ,

នាមរូបាធិកេហិ តុ;

ចិត្តំ ហេតុក្ខយា សោ សោ,

វេតិ វេ តស្ស តស្ស តុ.

៣២៦. ហេតុតោទយនាសេវំ, ខណោទយវយេនបិ;

ឥតិ បញ្ញាសាការេហិ, បស្សេ បុនូទយព្ពយំ.

៣២៧. យោគិស្សេវំ សមារទ្ធឧទយព្ពយទស្សិនោ;

បាតុភោន្តិ ឧបក្លេសា, សភាវា ហេតុតោបិ ច.

៣២៨. តេ ឱភាសមតុស្សាហបស្សទ្ធិសុខុបេក្ខនា;

សតិ បីតាធិមោក្ខោ ច, និកន្តិ ច ទសីរិតា.

៣២៩. តណ្ហាទិដ្ឋុន្នតិគ្គាហវត្ថុតោ តិំសធា តេ ច;

តទុប្បន្នេ ចលេ ពាលោ, អមគ្គេ មគ្គទស្សកោ.

៣៣០. វិបស្សនា បថោក្កន្តា, តទាសិ មតិមាធុនា;

ន មគ្គោ គាហវត្ថុត្តា, តេសំ ឥតិ វិបស្សតិ.

៣៣១. ឧបក្លេសេ អនិច្ចាទិ-វសគេ សោទយព្ពយេ;

បស្សតោ វីថិនោក្កន្តទស្សនំ វុច្ចតេ បថោ.

៣៣២. មគ្គាមគ្គេ វវត្ថេត្វា, យា បញ្ញា ឯវមុដ្ឋិតា;

មគ្គាមគ្គិក្ខសង្ខាតា, សុទ្ធិ សា បញ្ចមី ភវេ.

៣៣៣. បហានវ្ហបរិញ្ញាយ, អាទិតោ សុទ្ធិសិទ្ធិយា;

តីរណវ្ហបរិញ្ញាយ, អន្តគោ យតតេធុនា.

៣៣៤. ជាយតេ នវញាណី សា, វិសុទ្ធិ កមតោទយ-

ព្ពយាទី ឃដមានស្ស, នវ ហោន្តិ បនេត្ថ ហិ.

៣៣៥. សន្តតីរិយតោ ចេវ, ឃនេនាបិ ច ឆន្នតោ;

លក្ខណានិ ន ខាយន្តេ, សំកិលិដ្ឋា វិបស្សនា.

៣៣៦. តតោត្រ សម្មសេ ភិយ្យោ, បុនទេវុទយព្ពយំ;

តេនានិច្ចាទិសម្បស្សំ, បដុតំ បរមំ វជេ.

៣៣៧. អាវដ្ដេត្វា យទុប្បាទដ្ឋិតិអាទីហិ បស្សតោ;

ភង្គេវ តិដ្ឋតេ ញាណំ, តទា ភង្គមតី សិយា.

៣៣៨. ឯវំ បស្សយតោ ភង្គំ, តិភវោ ខាយតេ យទា;

សីហាទិវ ភយំ ហុត្វា, សិយា លទ្ធា ភយិក្ខណា.

៣៣៩. សាទីនវា បតិដ្ឋន្តេ, ខន្ធាទិត្តឃរំ វិយ;

យទា តទា សិយា លទ្ធា, អាទីនវានុបស្សនា.

៣៤០. សង្ខារាទីនវំ ទិស្វា, រមតេ ន ភវាទិសុ;

មតិ យទា តទា លទ្ធា, សិយា និព្ពិទបស្សនា.

៣៤១. ញាណំ មុច្ចិតុកាមំ តេ, សព្ពភូសង្ខតេ យទា;

ជាលាទីហិ ច មច្ឆាទី, តទា លទ្ធា ចជ្ជមតិ.

៣៤២. សង្ខារេ អសុភានិច្ចទុក្ខតោនត្តតោ មតិ;

បស្សន្តី ចត្តុមុស្សុក្កា, បដិសង្ខានុបស្សនា.

៣៤៣. វុត្តាត្រ បដុភាវាយ, សព្ពញាណបវត្តិយា;

មីនសញ្ញាយ សប្បស្ស, គាហលុទ្ទសមោបមា.

៣៤៤. អត្តត្តនិយតោ សុញ្ញំ, ទ្វិធា ‘‘នាហំ ក្វចា’’ទិនា;

ចតុធា ឆព្ពិធា ចាបិ, ពហុធា បស្សតោ ភុសំ.

៣៤៥. អាវដ្ដតិគ្គិមាសជ្ជ,

ន្ហារូវ មតិ សង្ខតំ;

ចត្តភរិយោ យថា ទោសេ,

តថា តំ សមុបេក្ខតេ.

៣៤៦. តាវ សាទីនវានម្បិ, លក្ខណេ តិដ្ឋតេ មតិ;

ន បស្សេ យាវ សា តីរំ, សាមុទ្ទសកុណី យថា.

៣៤៧. សង្ខារុបេក្ខាញាណាយំ, សិខាបត្តា វិបស្សនា;

វុដ្ឋានគាមិនីតិ ច, សានុលោមាតិ វុច្ចតិ.

៣៤៨. បត្វា មោក្ខមុខំ សត្ត, សាធេតិរិយបុគ្គលេ;

ឈានង្គាទិប្បភេទេ ច, បាទកាទិវសេន សា.

៣៤៩. អនិច្ចតោ ហិ វុដ្ឋានំ, យទិ យស្សាសិ យោគិនោ;

សោធិមោក្ខស្ស ពាហុល្លា, តិក្ខសទ្ធិន្ទ្រិយោ ភវេ.

៣៥០. ទុក្ខតោនត្តតោ តញ្ចេ, សិយា ហោន្តិ កមេន តេ;

បស្សទ្ធិវេទពាហុល្លា, តិក្ខេកគ្គមតិន្ទ្រិយា.

៣៥១. បញ្ញាធុរត្តមុទ្ទិដ្ឋំ, វុដ្ឋានំ យទិនត្តតោ;

សទ្ធាធុរត្តំ សេសេហិ, តំ វិយាភិនិវេសតោ.

៣៥២. ទ្វេ តិក្ខសទ្ធសមថា, សិយុំ សទ្ធានុសារិនោ;

អាទោ មជ្ឈេសុ ឋានេសុ, ឆសុ សទ្ធាវិមុត្តកា.

៣៥៣. ឥតរោ ធម្មានុសារីទោ, ទិដ្ឋិប្បត្តោ អនន្តកេ;

បញ្ញាមុត្តោភយត្ថន្តេ, អឈានិឈានិកា ច តេ.

៣៥៤. តិក្ខសទ្ធស្ស ចន្តេបិ, សទ្ធាមុត្តត្តមីរិតំ;

វិសុទ្ធិមគ្គេ មជ្ឈស្ស, កាយសក្ខិត្តមដ្ឋសុ.

៣៥៥. វុត្តំ មោក្ខកថាយំ យំ, តិក្ខបញ្ញារហស្ស តុ;

ទិដ្ឋិបត្តត្តំ ហេតញ្ច, តញ្ច នត្ថាភិធម្មិកេ.

៣៥៦. តេ សព្ពេ អដ្ឋមោក្ខានំ, លាភី ចេ ឆសុ មជ្ឈសុ;

កាយសក្ខី សិយុំ អន្តេ, ឧភតោភាគមុត្តកា.

៣៥៧. អនុលោមានិ ចត្តារិ, តីណិ ទ្វេ វា ភវន្តិ ហិ;

មគ្គស្ស វីថិយំ មន្ទមជ្ឈតិក្ខមតិព្ពសា.

៣៥៨. វិសុទ្ធិមគ្គេ ចត្តារិ, បដិសិទ្ធានិ សព្ពថា;

ឯវមដ្ឋសាលិនិយា, វុត្តត្តា ឯវមីរិតំ.

៣៥៩. ភវង្គាសន្នទោសោបិ, នប្បនាយ ថិរត្តតោ;

សុទ្ធិំ បដិបទាញាណទស្សនេវំ លភេ យតិ.

៣៦០. អាវជ្ជំ វិយ មគ្គស្ស, ឆដ្ឋសត្តមសុទ្ធិនំ;

អន្តរា សន្តិមារព្ភ, តេហិ គោត្រភុ ជាយតេ.

៣៦១. សំយោជនត្តយច្ឆេទី, មគ្គោ ឧប្បជ្ជតេ តតោ;

ផលានិ ឯកំ ទ្វេ តីណិ, តតោ វុត្តមតិក្កមា.

៣៦២. តថា ភាវយតោ ហោតិ, រាគទោសតនូករំ;

ទុតិយោ តប្ផលំ តម្ហា, សកទាគាមិ តប្ផលី.

៣៦៣. ឯវំ ភាវយតោ រាគទោសនាសករុព្ភវេ;

តតិយោ តប្ផលំ តម្ហា, តប្ផលដ្ឋោនាគាមិកោ.

៣៦៤. ឯវំ ភាវយតោ សេសទោសនាសករុព្ភវេ;

ចតុត្ថោ តប្ផលំ តម្ហា, អរហា តប្ផលដ្ឋកោ.

៣៦៥. កតកិច្ចោ ភវច្ឆេទោ, ទក្ខិណេយ្យោបធិក្ខយា;

និព្ពុតិំ យាតិ ទីបោវ, សព្ពទុក្ខន្តសញ្ញិតំ.

៣៦៦. ឯវំ សិទ្ធា សិយា សុទ្ធិ, ញាណទស្សនសញ្ញិតា;

វុត្តំ ឯត្តាវតា សច្ចំ, បរមត្ថំ សមាសតោ.

៣៦៧. សច្ចំ សម្មុតិ សត្តាទិអវត្ថុ វុច្ចតេ យតោ;

ន លព្ភាលាតចក្កំវ, តំ ហិ រូបាទយោ វិនា.

៣៦៨. តេន តេន បការេន, រូបាទិំ ន វិហាយ តុ;

តថា តថាភិធានញ្ច, គាហញ្ច វត្តតេ តតោ.

៣៦៩. លព្ភតេ បរិកប្បេន, យតោ តំ ន មុសា តតោ;

អវុត្តាលម្ពមិច្ចាហុ, បរិត្តាទីស្វវាចតោ.

៣៧០. បាបកល្យាណមិត្តោយំ, សត្តោតិ ខន្ធសន្តតិ;

ឯកត្តេន គហេត្វាន, វោហរន្តីធ បណ្ឌិតា.

៣៧១. បថវាទិ វិយេកោបិ, បុគ្គលោ ន យតោ តតោ;

កុទិដ្ឋិវត្ថុភាវេន, បុគ្គលគ្គហណំ ភវេ.

៣៧២. ឯតំ វិសយតោ កត្វា, សង្ខាទីហិ បទេហិ តុ;

អវិជ្ជមានបញ្ញត្តិ, ឥតិ តញ្ញូហិ ភាសិតា.

៣៧៣. បញ្ញត្តិ វិជ្ជមានស្ស, រូបាទិវិសយត្តតោ;

កាយំ បញ្ញត្តិ ចេ សុដ្ឋុ, វទតោ សុណ សច្ចតោ.

៣៧៤. សវិញ្ញត្តិវិការោ ហិ, សទ្ទោ សច្ចទ្វយស្ស តុ;

បញ្ញាបនត្តា បញ្ញត្តិ, ឥតិ តញ្ញូហិ ភាសិតា.

៣៧៥. បច្ចុប្បន្នាទិអាលម្ពំ, និរុត្តិបដិសម្ភិទា-

ញាណស្សាតិ ឥទញ្ចេវំ, សតិ យុជ្ជតិ នាញ្ញថា.