២៥. វិបស្សនាវុទ្ធិកថា

៩៨១. សីលចិត្តទិដ្ឋិកង្ខាវិតរណវិសុទ្ធិយោ;

បត្វា កលាបតោ តាវ, សម្មសេយ្យ តតោ បរំ.

៩៨២. កលាបតោ សម្មសនំ, ឧទយព្ពយទស្សនំ;

ភង្គញាណំ ភយញាណំ, តថាទីនវនិព្ពិទា.

៩៨៣. មុច្ចិតុកម្យតាញាណំ, បដិសង្ខានុបស្សនា;

សង្ខារុបេក្ខានុលោមមិច្ចានុក្កមតោ ឋិតា.

៩៨៤. វិបស្សនាតិ ចក្ខាតា, ទសញាណបរម្បរា;

លក្ខណត្តយមាហច្ច, សង្ខារេសុ បវត្តតិ.

៩៨៥. តស្មា កលាបតោ តាវ, សម្មសេយ្យ តិលក្ខណំ;

សម្មសិត្វា អតីតាទិខន្ធាយតនធាតុយោ.

៩៨៦. អនិច្ចា តេ ខយដ្ឋេន, ខន្ធា ទុក្ខា ភយដ្ឋតោ;

អនត្តា អសារកដ្ឋេន, ឥច្ចាភិណ្ហំ វិចិន្តយំ.

៩៨៧. តស្សេវំ សម្មសន្តស្ស, ឧបដ្ឋាតិ តិលក្ខណំ;

សង្ខារេសុ តតោ យោគី, ខណសន្តតិអទ្ធតោ.

៩៨៨. បច្ចុប្បន្នាន ធម្មានំ, ឧទយញ្ច វយំ តថា;

បញ្ញាសាការភេទេហិ, អនុបស្សតិ តត្ថ ហិ.

៩៨៩. អវិជ្ជាតណ្ហាកម្មានំ, ឧទយា ច និរោធតោ;

សមុទយា និរោធា ច, បញ្ចន្នំ ទស្សិតា តថា.

៩៩០. រូបស្សាហារតោ តិណ្ណំ, ផស្សតោ នាមរូបតោ;

វិញ្ញាណស្សេតិ សព្ពេបិ, ចត្តាលីស សមិស្សិតា.

៩៩១. និព្ពត្តិលក្ខណំ ភង្គ-

លក្ខណញ្ចេត្ថ បស្សតោ;

ខណតោទយតោ ចេតិ,

សមបញ្ញាស ហោន្តិ តេ.

៩៩២. ឥតិ ខន្ធមុខេនេតេ, វិភត្តា ឧទយព្ពយា;

អាយតន្នាទិភេទេហិ, យោជេតព្ពា យថារហំ.

៩៩៣. ឧទយញ្ច វយញ្ចេវំ, បស្សតោ តស្ស យោគិនោ;

វិភូតា ហោន្តិ សង្ខារា, សមុដ្ឋាតិ តិលក្ខណំ.

៩៩៤. ពោធិបក្ខិយធម្មា ច,

តេ បស្សន្តិ វិសេសតោ;

តតោ ជាយន្តុបក្លេសា,

ទសោបក្លេសវត្ថុកា.

៩៩៥. ឱភាសោ បីតិ បស្សទ្ធិ, អធិមោក្ខោ ច បគ្គហោ;

សុខំ ញាណមុបដ្ឋានំ, ឧបេក្ខា ច និកន្តិ ច.

៩៩៦. តណ្ហាមានទិដ្ឋិគ្គាហវសេន តិវិធេបិ តេ;

អស្សាទេន្តោ ឧន្នមន្តោ, មមាយន្តោ កិលិស្សតិ.

៩៩៧. មគ្គំ ផលញ្ច និព្ពានំ, បត្តោស្មីតិ អកោវិទោ;

វេក្ខពុជ្ឈាតិ មញ្ញន្តោ, បប្បោតិ អធិមានិកោ.

៩៩៨. មគ្គាទយោ ន ហោន្តេតេ,

តណ្ហាគាហាទិវត្ថុតោ;

តណ្ហាមានទិដ្ឋិយោ ចុបក្លេសា បរិបន្ថកា.

៩៩៩. បោរាណមេវ ខន្ធានំ, ឧទយព្ពយទស្សនំ;

តិលក្ខណារម្មណតោ, មគ្គោ និព្ពានបច្ចយោ.

១០០០. ឥតិ មគ្គំ អមគ្គញ្ច, វិសោធេន្តស្ស សិជ្ឈតិ;

វិសុទ្ធិ ច មគ្គាមគ្គញាណទស្សននាមិកា.

១០០១. តថាបរា វិសុទ្ធីនំ, ឧទយព្ពយទស្សនំ;

អាទិំ កត្វា បដិបទាញាណទស្សននាមិកា.

១០០២. បច្ឆា សំក្លេសវិក្ខេបវិសុទ្ធន្តំ យថា បុរេ;

បដិបជ្ជតិ មេធាវី, ឧទយព្ពយទស្សនំ.

១០០៣. ឥតិ ខោទយព្ពយានុបស្សនាញាណវីថិយំ;

សិក្ខន្តស្សាចិរេនេវ, បរិបក្កា វិបស្សនា.

១០០៤. បហាយោទយវោហារំ, វយមេវាធិមុច្ចតោ;

ឧប្បាទាភោគមោហាយ, ភង្គមេវានុតិដ្ឋតិ.

១០០៥. តតោ និជ្ឈរធារាវ, គង្គាវារោទកំ វិយ;

ភិជ្ជមានតិណានិវ, បដិបជ្ជា សិខា វិយ.

១០០៦. បតន្តេ ច វយន្តេ ច, ភិជ្ជន្តិច្ចេវ សង្ខតេ;

បស្សតោ តស្ស ភង្គានុបស្សនាញាណមីរិតំ.

១០០៧. តតោ ភយានុបស្សនា, សភយាតិ វិបស្សតោ;

អាទីនវានុបស្សនា-ញាណំ អាទីនវាតិ ច.

១០០៨. និព្ពិទានុបស្សនា ច, និព្ពិន្ទន្តស្ស យោគិនោ;

មុច្ចិតុកម្យតាញាណំ, តតោ មុច្ចិតុមិច្ឆតោ.

១០០៩. និច្ចា ចេ ន និរុជ្ឈេយ្យ, ន ពាធេយ្យ សុខា យទិ;

វសេ វត្តេយ្យ អត្តា ចេ, តទភាវា ន តេ តថា.

១០១០. សុដ្ឋុ មុច្ចិតុមិច្ចេវំ, បដិបច្ចក្ខតោ តតោ;

បដិសង្ខានុបស្សនា-ញាណំ ជាតន្តិ វុច្ចតិ.

១០១១. សាធុកំ បដិសង្ខាយ, សង្ខារេសុ តិលក្ខណំ;

សុបរិញ្ញាតសង្ខារេ, តថេវ បដិបស្សតិ.

១០១២. អនិច្ចា ទុក្ខានត្តា ច, សង្ខារាវ ន ចាបរោ;

អត្តា វា អត្តនីយំ វា, នាហំ ន តុ មមាតិ ច.

១០១៣. តតោវ តត្ថ មជ្ឈត្តោ, នន្ទិរាគវិនិស្សដោ;

អត្តត្តនិយភាវេន, សង្ខារេស្វជ្ឈុបេក្ខតិ.

១០១៤. សង្ខារុបេក្ខាសង្ខាតំ, ញាណំ តស្ស ឥតីរិតំ;

តតោ វុដ្ឋានឃដិតំ, អនុលោមន្តិ វុច្ចតិ.

១០១៥. សុបរិញ្ញាតសង្ខារេ, សុសម្មដ្ឋតិលក្ខណេ;

ឧបេក្ខន្តស្ស តស្សេវ, សិខាបត្តា វិបស្សនា.

១០១៦. សង្ខារធម្មេ អារព្ភ, តាវ កាលំ បវត្តតិ;

តីរទស្សីវ សកុណោ, យាវ បារំ ន បស្សតិ.

១០១៧. យទា បស្សតិ និព្ពានំ, វុដ្ឋានគហិតា តទា;

វុដ្ឋានគាមិនី នាម, សានុលោមា បវុច្ចតិ.

១០១៨. ឥតិ ទ្វីហិ វិសុទ្ធីហិ, វិសុទ្ធាយ វិបស្សតោ;

វិបស្សនាបដិបទំ, បូរេតីតិ បវុច្ចតីតិ.

ឥតិ និព្ពានវិភាគេ វិបស្សនាវុទ្ធិកថា និដ្ឋិតា.

បញ្ចវីសតិមោ បរិច្ឆេទោ.