ឆព្ពិសតិមោ បរិច្ឆេទោ

២៦. វុដ្ឋានវិសុទ្ធិកថា

១០១៩. តស្សេវំ បដិបន្នស្ស, សិខាបត្តា វិបស្សនា;

វុដ្ឋានគាមិនី នាម, យទា ហោតិ តទា បន.

១០២០. បរិកម្មោបចារានុលោមគោត្រភុតោ បរំ;

មគ្គោ តតោ ផលំ ហោតិ, ភវង្គា បច្ចវេក្ខណា.

១០២១. បរិកម្មោបចារានុលោមសង្ខាតគោចរា;

មគ្គស្សាវជ្ជនំ ហុត្វា, និព្ពានេ ហោតិ គោត្រភុ.

១០២២. ចតុត្ថំ បញ្ចមំ វាថ, ឆដ្ឋំ វាបិ យថារហំ;

អប្បេតិ មគ្គជវនំ, និព្ពានេ សកិមេវ តំ.

១០២៣. តតោ ផលានិ តីណិ ទ្វេ, ឯកំ វាថ យថាក្កមំ;

មគ្គាវសេសនិរោធមគ្គវុដ្ឋានវីថិយំ.

១០២៤. តតោ ភវង្គបាតោវ,

តំ ឆេត្វា បច្ចវេក្ខណា;

តិស្សោ បញ្ចវិធា ហោន្តិ,

យថាយោគំ តថា ហិ ច.

១០២៥. មគ្គំ ផលញ្ច និព្ពានំ, អវស្សំ បច្ចវេក្ខតិ;

ហីនេ កិលេសេ សេសេ ច, បច្ចវេក្ខតិ វា ន វា.

១០២៦. តតោ ច បុន សង្ខារេ, វិបស្សន្តោ យថា បុរេ;

អប្បេតិ អនុបុព្ពេន, សេសមគ្គផលានិ ច.

១០២៧. តត្ថ វុច្ចន្តិ និព្ពាន-ផលមគ្គវិបស្សនា;

សុញ្ញតា ចានិមិត្តា ច, តថាបណិហិតានិ ច.

១០២៨. សុញ្ញតាវិបស្សនាទិនាមេន ហិ វិបស្សតិ;

វិមោក្ខមុខភូតាតិ, តិវិធា ភាជិតា តថា.

១០២៩. សុញ្ញតាទិកនាមេន, វិមោក្ខា តិវិធា មតា;

និព្ពានផលមគ្គា ច, សមាបត្តិសមាធយោ.

១០៣០. តត្ថេវ បឋមភូមិំ, បត្តោ អរិយបុគ្គលោ;

សត្តក្ខត្តុបរមោ សោ, សោតាបន្នោតិ វុច្ចតិ.

១០៣១. បត្តោ ទុតិយភូមិញ្ច, សកទាគាមិនាមកោ;

សកិមេវ ឥមំ លោកំ, អាគន្ត្វា ហោតិ មានុសំ.

១០៣២. បត្តោ តតិយភូមិញ្ច, អនាគាមីតិ វុច្ចតិ;

ព្រហ្មលោកា អនាគន្ត្វា, ឥធកាមោបបត្តិយា.

១០៣៣. បត្តោ ចតុត្ថភូមិញ្ច, អរហា អគ្គបុគ្គលោ;

ទិដ្ឋេវ ធម្មេ ទុក្ខគ្គិំ, និព្ពាបេតីតិ វុច្ចតិ.

១០៣៤. ឥតិ មគ្គផលដ្ឋានំ, វសា អរិយបុគ្គលា;

ទ្វិធាបិ ចតុធា យុគ្គា, អដ្ឋ ហោន្តិ វិភាគតោ.

១០៣៥. ឧភតោភាគវិមុត្ត-

វិភាគាទិវសា បន;

វិភត្តា ហោន្តិ សត្តេតេ,

យថាយោគំ តថា ហិ ច.

១០៣៦. សទ្ធាធុរស្សានិច្ចតោ, វុដ្ឋានំ ទុក្ខតោបិ ច;

បញ្ញាធុរស្សានត្តតោ, ឥតិ ទីបេន្តិ បណ្ឌិតា.

១០៣៧. សទ្ធានុសារិ អាទិម្ហិ, មជ្ឈេ សទ្ធាវិមុត្តកោ;

អន្តេ បញ្ញាវិមុត្តោវ, តស្មា សទ្ធាធុរោ សិយា.

១០៣៨. ធម្មានុសារិ អាទិម្ហិ, ទិដ្ឋិប្បត្តោ តតោបរិ;

អន្តេ បញ្ញាវិមុត្តោវ, ហោតិ បញ្ញាធុរោបិ ច.

១០៣៩. សមថយានិកា ចេវ, រូបានុត្តរបាទកា;

វិបស្សនាយានិកា ច, សព្ពេ សុក្ខវិបស្សកា.

១០៤០. ធុរវុដ្ឋានភេទេន, ហោន្តិ បញ្ចេវ សព្ពថា;

អារុប្បបាទកា ចាបិ, អាទិម្ហិ ទុវិធា តថា.

១០៤១. ឆសុ ឋានេសុ មជ្ឈកេ, កាយសក្ខីតិ ភាជិតា;

ឧភតោភាគវិមុត្តោ, អរហត្តេ បតិដ្ឋិតោ.

១០៤២. ឥត្ថំ វុត្តយានធុរ-វុដ្ឋានានំ វិភាគតោ;

មគ្គប្ផលភូមិយោ ច, សត្តដ្ឋារិយបុគ្គលា.

១០៤៣. តត្ថ ចានុត្តរញាណំ, សច្ចានំ បដិវេធកំ;

សមុច្ឆេទប្បហានេន, ក្លេសានុសយសោធនំ.

១០៤៤. ចតុមគ្គវិភាគេន, វុដ្ឋានន្តិ បកិត្តិតំ;

ញាណទស្សនវិសុទ្ធិ, នាម ហោតិ តថាបិ ច.

១០៤៥. មគ្គោ ច បរិជានាតិ, ទុក្ខំ តេភូមកំ តថា;

យថាយោគំ បជហតិ, តណ្ហាសមុទយម្បិ ច.

១០៤៦. និរោធំ សច្ឆិករោតិ, មគ្គសច្ចមនុត្តរំ;

ភាវនាវីថិមោតិណ្ណោ, ភាវេតីតិ បវុច្ចតិ.

១០៤៧. ទិដ្ឋិគ្គតវិចិកិច្ឆា-សីលព្ពតមសេសតោ;

អបាយគមនីយញ្ច, រាគទោសាទិកត្តយំ.

១០៤៨. តទេកដ្ឋេ កិលេសេ ច, សហជាតប្បហានតោ;

បជហាតិ សោតាបត្តិ-មគ្គោ បឋមភូមិកោ.

១០៤៩. តទេកដ្ឋេ បជហតិ, រាគទោសាទិកេបិ ច;

ថូលេ តុ សកទាគាមិ-មគ្គោ ទុតិយភូមិកោ.

១០៥០. បជហាតិ អនាគាមិ-មគ្គោ និរវសេសតោ;

កាមរាគព្យាបាទេ ច, តទេកដ្ឋេ ច សម្ភវា.

១០៥១. រូបារូបរាគមានុ-ទ្ធច្ចាវិជ្ជាតិ បញ្ចកំ;

អគ្គមគ្គោ បជហតិ, ក្លេសេ សេសេ ច សព្ពថា.

១០៥២. ឥតិ សច្ចបដិវេធំ, ក្លេសក្ខយផលាវហំ;

មគ្គញាណំ បកាសេន្តិ, វិសុទ្ធិំ សត្តមំ ពុធា.

១០៥៣. ឆព្ពិសុទ្ធិកមេនេវំ, សព្ពថាយ វិសុទ្ធិយា;

សត្តមាយានុបត្តព្ពំ, និព្ពានន្តិ បវុច្ចតិ.

១០៥៤. ក្លេសក្ខយករំ តាណំ, សំសារាតិក្កមំ បរំ;

បារិមំ តីរមភយំ, សព្ពសង្ខារនិស្សដំ.

១០៥៥. តេនម្មទនិម្មទនំ, បិបាសវិនយាទិនា;

ក្លេសសំសារសង្ខារ-បដិបក្ខនិទស្សិតំ.

១០៥៦. អជរាមរមច្ចន្ត-មនុប្បាទមសង្ខតំ;

អនុត្តរមសង្ខារំ, អនន្តមតុលញ្ច តំ.

១០៥៧. បរមត្ថមនោបម្មំ, សន្តិ អប្បដិមំ សុខំ;

និរោធសច្ច និព្ពានំ, ឯកន្តំ អមតំ បទំ.

១០៥៨. សោបាទិសេសនិព្ពាន-ធាតុ ចេវ តថាបរា;

អនុបាទិសេសា ចេតិ, ទុវិធា បរិយាយតោ.

១០៥៩. សុញ្ញតំ ចានិមិត្តញ្ច, តថាបណិហិតន្តិ ច;

អត្តាទិគាហាភាវេន, តិវិធាបិ ច ភាជិតំ.

១០៦០. ក្លេសសំសារសង្ខារ-បច្ចនីកវិភាគតោ;

ភវក្ខយាទិភេទេហិ, ពហុធាបិ បវុច្ចតិ.

១០៦១. តទេវមច្ចុតំ ធម្មំ, លោកុត្តរមកាលិកំ;

វានាភាវា វានាតីតោ, ‘‘និព្ពាន’’ន្តិ បកិត្តិតំ.

ឥតិ និព្ពានវិភាគេ វុដ្ឋានវិសុទ្ធិកថា និដ្ឋិតា.

ឆព្ពីសតិមោ បរិច្ឆេទោ.

និដ្ឋិតោ ច សព្ពថាបិ និព្ពានវិភាគោ.