ឯកវីសតិមោ បរិច្ឆេទោ

២១. ឧប្បត្តិកថា

៧៩៧. អដ្ឋវីសតិ រូបានិ, កលាបា ចេកវីសតិ;

វុត្តា ចេត្តាវតា តេសំ, ឧប្បាទោ ទានិ និយ្យតេ.

៧៩៨. អណ្ឌជា ជលាពុជា ច, សំសេទជោបបាតិកា;

ឥច្ចុប្បត្តិបភេទេន, ចតស្សោ យោនិយោ មតា.

៧៩៩. ភុម្មវជ្ជេសុ ទេវេសុ,

បេតេ និជ្ឈាមតណ្ហិកេ;

និរយេសុ ច សម្ភោតិ,

យោនេកាវោបបាតិកា.

៨០០. ភុម្មទេវេ មនុស្សេសុ,

តិរច្ឆានាសុរេ តថា;

បេតេសុ ចាវសេសេសុ,

ចតស្សោបិ ច យោនិយោ.

៨០១. តត្ថណ្ឌជា ជលាពុជា, គព្ភសេយ្យសមុគ្គមោ;

សំសេទជោបបាតិកា, ឱបបាតិកនាមកា.

៨០២. តត្ថ សម្បុណ្ណាយតនោ, គព្ភសេយ្យសមុគ្គមោ;

អភាវោ ទ្វេ សភាវា ច, ឥត្ថិបុម្ភាវមិស្សិតា.

៨០៣. បរិបុណ្ណាបរិបុណ្ណោ, ឱបបាតិកនាមកោ;

អភាវោ ទ្វេ សភាវា ច, ចតុរាបាយភូមិយំ.

៨០៤. សម្បុណ្ណាយតនោវេសោ,

កាមេ សុគតិយំ បន;

អាទិកប្បេ អភាវោ ច,

ទ្វេ សភាវា តតោ បរំ.

៨០៥. អបរិបុណ្ណាយតនោ, អភាវោ ច មហគ្គតេ;

ឥច្ចេវំ ទសធា ហោន្តិ, សព្ពា សន្ធិសមុគ្គមា.

៨០៦. តត្ថេវ ទសធា ភិន្នេ, អត្តភាវសមុគ្គមេ;

សន្ធិយញ្ច បវត្តេ ច, រូបុប្បត្តិំ វិភាវយេ.

៨០៧. តត្ថាភាវកសត្តានំ, គព្ភសេយ្យសមុគ្គមេ;

កាយវត្ថុវសា ទ្វេវ, ទសកា ហោន្តិ កម្មជា.

៨០៨. រូបសន្តតិសីសានិ, ទ្វេ ច រូបានិ វីសតិ;

អគហីតគ្គហណេន, តត្ថេកាទស និទ្ទិសេ.

៨០៩. តតោ បរំ បវត្តិម្ហិ, វឌ្ឍមានស្ស ជន្តុនោ;

ចក្ខុទសកាទយោ ច, ចត្តារោ ហោន្តិ សម្ភវា.

៨១០. ឥច្ចាភាវកសត្តានំ, ឆឡេវុត្តមកោដិយា;

ហេដ្ឋិមកោដិយា ទ្វេវ, គព្ភសេយ្យសមុគ្គមេ.

៨១១. ចក្ខុសោតឃានវសា, តត្ថ តិទ្វេកហីនកា;

ឯកោ តយោ តយោ ចេវ, សិយុំតិចតុបញ្ចកា.

៨១២. ឱបបាតិកសង្ខាតេ, អភាវកសមុគ្គមេ;

ជិវ្ហាកាយវត្ថុវសា, តយោ ហេដ្ឋិមកោដិយា.

៨១៣. ឧត្តមកោដិយា ហោន្តិ, ឆឡេវោភិន្នមន្តរេ;

ចតុក្កបញ្ចកា តត្ថ, ទ្វេកហីនា តយោ តយោ.

៨១៤. ឆក្កាទយោ អភាវានំ,

ឥច្ចេវំ បញ្ចសង្គហា;

ឯកោ តយោ តយោ ចេកោ,

ឯកោតិ ច យថាក្កមំ.

៨១៥. សភាវកានំ ទ្វិន្នម្បិ, ទុវិធា សត្តកាទយោ;

ភាវាទិកា យថាវុត្តា, នវធា នវធា សិយុំ.

៨១៦. សត្តេវុត្តមតោ ហេដ្ឋា, តិចតុក្កា តទន្តរេ;

ចតុក្កបញ្ចកច្ឆក្កា, បញ្ចឆក្កាបិ ច ទ្វិធា.

៨១៧. តិណ្ណន្នម្បិ វសេនេវ, សត្តកច្ឆក្កបញ្ចកា;

ចតុក្កតិកទុក្កា ច, ឆ កោដ្ឋាសា យថារហំ.

៨១៨. ទ្វេ សត្ត ច នវ បញ្ច, តយោ ចេកោ យថាក្កមំ;

រូបសន្តតិសីសានំ, រាសយោ សត្តវីសតិ.

៨១៩. កម្មជាតា យថាយោគំ, បវត្តន្តិ ខណេ ខណេ;

កាមាវចរសត្តានំ, បដិសន្ធិបវត្តិយំ.

៨២០. តត្ថ សន្តតិសីសានិ, រូបានិ ច យថារហំ;

បុព្ពេ វុត្តនយេនេវ, សព្ពត្ថាបិ វិនិទ្ទិសេ.

៨២១. សីតុណ្ហោតុសមញ្ញាតា,

តេជោធាតុ ឋិតិក្ខណេ;

ភូតា សន្ធិក្ខណេ រូបំ,

ជនេតិ ឧតុជដ្ឋកំ.

៨២២. បដិសន្ធិមតិក្កម្ម, ចិត្តំ ចិត្តជមដ្ឋកំ;

ភវង្គាទិមុបាទាយ, ជនេតុប្បត្តិយំ បន.

៨២៣. ភុត្តាហារោ ឋិតិប្បត្តោ, មាតរា ច សយម្បិ ច;

សរីរានុគតោ ហុត្វា, ជនេតាហារជដ្ឋកំ.

៨២៤. ឥតិ សុទ្ធដ្ឋកានិ ច, តេសមុដ្ឋានិកាបរេ;

សទ្ទវិញ្ញត្តិលហុតា, សម្ភវេ សម្ភវន្តិ ច.

៨២៥. ឥត្ថំ ចតុសមុដ្ឋានា, កលាបា កាមភូមិយំ;

យាវជីវំ បវត្តន្តិ, ទីបជាលាវ សន្តតិ.

៨២៦. ចក្ខុសោតវត្ថុវសា, ទសកា ច តយោ បរំ;

ជីវិតនវកញ្ចេវ, រូបាវចរភូមិយំ.

៨២៧. ហោន្តិ សន្ធិបវត្តីសុ, ចត្តារោ កម្មជា សទា;

បុព្ពេ វុត្តនយេនេវ, បវត្តេ ឧតុចិត្តជា.

៨២៨. ជីវិតនវកញ្ចេកំ, បដិសន្ធិបវត្តិយំ;

បវត្តេ ឧតុជញ្ចេតិ, ទ្វេធាសញ្ញីនមុទ្ទិសេ.

៨២៩. ឥច្ចុប្បត្តិកមំ ញត្វា, វិភាវេយ្យ តតោ បរំ;

កលាបានញ្ច រូបានំ, សម្ភវាសម្ភវម្បិ ច.

៨៣០. ឥន្ទ្រិយពទ្ធសន្តានេ, សព្ពេ សម្ភោន្តិ សម្ភវា;

កលាបា ចេវ រូបានិ, តថា សន្តតិរាសយោ.

៨៣១. ពហិទ្ធា មតកាយេ ច, នោបលព្ភន្តិ កម្មជា;

ចិត្តោជជា កលាបា ច, ឧតុជា លហុតាទយោ.

៨៣២. តថា សុទ្ធដ្ឋកសទ្ទ-នវកញ្ចោតុ សព្ពថា;

កលាបា តត្ថ លព្ភន្តិ, ទ្វេ ច រូបានិ ឧទ្ទិសេ.

៨៣៣. តេសមុដ្ឋានិកា សព្ពេ, កលាបា នត្ថិ សន្ធិយំ;

ឧប្បាទកាលេ សព្ពត្ថ, ជរតានិច្ចតាបិ ច.

៨៣៤. កលាបា កម្មជា សន្តិ, ជាតិរូបញ្ច សន្ធិយំ;

រូបានិ ច កលាបា ច, សព្ពេបិ ច បវត្តិយំ.

៨៣៥. សន្តិ សព្ពានិ រូបានិ, កាមេសុ ចតុសម្ភវា;

ជីវិតនវកំ ហិត្វា, កលាបា ហោន្តិ វីសតិ.

៨៣៦. ទសកេស្វេវ គហិតំ, វិសុំ កាមេ ន លព្ភតិ;

ជីវិតនវកំ នាម, រូបលោកេ វិសុំ សិយា.

៨៣៧. អាហារជកលាបា ច, ភាវា ទ្វេ ចាទិកប្បិកេ;

អាទិកាលេ ន លព្ភន្តិ, បច្ឆា លព្ភន្តិ កេចិបិ.

៨៣៨. ឃានជិវ្ហាកាយភាវ-ទសកា រូបភូមិយំ;

អាហារជកលាបា ច, ន លព្ភន្តេវ សព្ពថា.

៨៣៩. ចក្ខុសោតវត្ថុសទ្ទា, កលាបា ចិត្តជាបិ ច;

អសញ្ញិភូមិយំ បុព្ពេ, វុត្តាបិ ច ន លព្ភរេ.

៨៤០. កលាបា សត្ត រូបានិ, បញ្ច រូបេស្វសញ្ញិសុ;

នត្ថេកាទស រូបានិ, កលាបេកូនវីសតិ.

៨៤១. តស្មា តេវីស រូបានិ, កលាបា បន ចុទ្ទស;

តេសមុដ្ឋានិកា សន្តិ, រូបាវចរភូមិយំ.

៨៤២. សត្តរសេវ រូបានិ, កលាបា ទ្វេ ទ្វិសម្ភវា;

អសញ្ញីនំ តុ សម្ភោន្តិ, នត្ថារូបេសុ កិញ្ចិបិ.

៨៤៣. ឧប្បត្តិក្កមមិច្ចេវំ, សម្ភវាសម្ភវម្បិ ច;

កលាបានញ្ច រូបានំ, យថាយោគំ វិភាវយេតិ.

ឥតិ រូបវិភាគេ ឧប្បត្តិកថា និដ្ឋិតា.

ឯកវីសតិមោ បរិច្ឆេទោ.