ទ្វាវីសតិមោ បរិច្ឆេទោ

២២. បកិណ្ណកកថា

៨៤៤. ឥត្ថំ រូបានមុប្បត្តិំ, ទីបេត្វា ទានិ វុច្ចតិ;

បវត្តិកោសល្លត្ថាយ, តត្ថេវេតំ បកិណ្ណកំ.

៨៤៥. ទុវិធា សន្ធិយោ តត្ថ, មិស្សាមិស្សវិភាគតោ;

តិវិធាបិ ចេកចតុ-បញ្ចវោការភេទតោ.

៨៤៦. រូបមត្តា អសញ្ញីនំ, នាមាភាវា អមិស្សិតា;

នាមមត្តា អរូបីនំ, រូបាភាវាតិ ច ទ្វិធា.

៨៤៧. កាមាវចរិកា ចេវ, រូបាវចរិកាតិ ច;

ទុវិធា មិស្សិតា ចេតិ, ភវន្តិ ច ចតុព្ពិធា.

៨៤៨. ឯកច្ចតុវោការា ច, អមិស្សា បញ្ច សន្ធិយោ;

ឆព្ពីសតិវិធា មិស្សា, បញ្ចវោការសន្ធិយោ.

៨៤៩. ឥត្ថំ ភូមិប្បភេទេន, ឯកតិំសវិធាបិ ច;

សន្តតិរាសិភេទេន, សិយុំ តិំសវិធា កថំ.

៨៥០. រូបសន្តតិសីសានំ,

រាសយោ សត្តវីសតិ;

វុត្តា កាមេ វសា តេសំ,

សត្តកា កាមសន្ធិយោ.

៨៥១. វេទនាសញ្ញាសង្ខារ-វិញ្ញាណក្ខន្ធសង្គហា;

សព្ពត្ថាបិ ចតស្សោវ, នាមសន្តតិយោ សិយុំ.

៨៥២. ឥច្ចុភិន្នំ វសា ហោន្តិ, តត្ថេកាទសកាទយោ;

សន្តតិរាសយោ បុព្ពេ, វិភត្តា សត្តកាទយោ.

៨៥៣. ឯកាទសកទសក-នវដ្ឋសត្តកា សិយុំ;

ឆក្កេន សទ្ធិំ វិញ្ញេយ្យា, តស្មា តត្ថ ឆ សង្គហា.

៨៥៤. អដ្ឋ សន្តតិយោ ហោន្តិ, រូបលោកេន មិស្សិតា;

អដ្ឋកោ រាសិ តត្ថេកោ, តស្មា សន្តតិ វុច្ចតិ.

៨៥៥. ជីវិតនវកោ ត្វេកោ, អសញ្ញី បដិសន្ធិយំ;

អរូបីនំ ចតស្សោបិ, នាមសន្តតិយោ សិយុំ.

៨៥៦. ឥច្ចេកកចតុក្កានំ, វសេន ទ្វេ អមិស្សិតា;

អដ្ឋវីសញ្ច មិស្សាតិ, តិំសេវ ហោន្តិ សន្ធិយោ.

៨៥៧. ឯកុប្បាទនិរោធា ច, អមិស្សា តត្ថ រាសយោ;

មិស្សិតានំ វិភាគោយំ, យថាយោគំ កថីយតិ.

៨៥៨. ឧប្បាទដ្ឋិតិភង្គានំ, វសា តីណិ ខណានិបិ;

សមានានេវ នាមានំ, ឯកចិត្តក្ខណំ មតំ.

៨៥៩. តុល្យមុប្បាទភង្គានំ, រូបានម្បិ ខណទ្វយំ;

ឯកូនបញ្ញាសមត្តំ, ឋិតិក្ខណមុទីរិតំ.

៨៦០. នាមរូបានមុប្បាទោ, ភង្គោបិ ហិ សមោ មតោ;

ទន្ធំ ហិ វត្តិកំ រូបំ, នាមំ តុ លហុវត្តិកំ.

៨៦១. តថា ហិ រូបេ តិដ្ឋន្តេ, ចិត្តុប្បាទា តុ សោឡស;

ឧប្បជ្ជិត្វា បវត្តិត្វា, ភិជ្ជន្តិ ច លហុំ លហុំ.

៨៦២. តស្មា ហិ ឯកបញ្ញាស-ខណរូបក្ខណំ តថា;

សត្តរសចិត្តក្ខណំ, តិខណន្តិ ច វុច្ចតិ.

៨៦៣. ចិត្តក្ខណំ ហិ តិណ្ណន្នំ, តត្ថ វិញ្ញត្តិកទ្វយំ;

លក្ខណត្តយរូបំ តុ, សលក្ខណវវត្ថិតំ.

៨៦៤. តស្មា ហិត្វា ទ្វយញ្ចេតំ, ពាវីសតិវិធម្បិ ច;

រូបំ នាម ចតុក្កញ្ច, សលក្ខណនិយាមិតំ.

៨៦៥. ឯកុប្បាទនិរោធា ច, តត្ថ តុល្យក្ខណា មតា;

អតុល្យក្ខណធម្មានំ, សិយា ភេទំ យថារហំ.

៨៦៦. បដិសន្ធិក្ខណេ ជាតំ, តស្មា រូបំ តតោ បរំ;

សត្តរសមចិត្តស្ស, ភង្គេន សហ ភិជ្ជតិ.

៨៦៧. តស្ស ឋិតិក្ខណេ ជាតំ, រូបម្បិ ច តតោ បរំ;

អដ្ឋារសមចិត្តស្ស, ឧប្បាទេ បន ភិជ្ជតិ.

៨៦៨. តស្ស ភង្គក្ខណេ ជាតំ, រូបម្បិ ច តតោ បរំ;

អដ្ឋារសមចិត្តស្ស, ឋិតិកាលេសុ ភិជ្ជតិ.

៨៦៩. តថា ទុតិយចិត្តស្ស, ឧប្បាទម្ហិ សមុដ្ឋិតំ;

អដ្ឋារសមចិត្តស្ស, ភង្គេន សហ ភិជ្ជតិ.

៨៧០. ឥតិ វុត្តនិយាមេន, សជាតិក្ខណតោ បរំ;

ឋត្វា ឯកូនបញ្ញាស, ខណានិ បុន ភិជ្ជតិ.

៨៧១. តស្មា ឯកូនបញ្ញាស, កលាបា សហ វត្តរេ;

ឯកោ ជាយតិ ឯកោ ច, ភិជ្ជតីតិ ច សព្ពថា.

៨៧២. ឯកសន្តតិសម្ពន្ធា, កលាបា សហ កម្មជា;

យថានុបុព្ពឃដិតា, ឯកបញ្ញាស លព្ភរេ.

៨៧៣. សត្តវីស បនិច្ចេវំ, កាមេ ទ្វេ រូបភូមិយំ;

រូបសន្តតិសីសានំ, រាសយោ សត្តកាទយោ.

៨៧៤. ឯកូនតិំស សព្ពេបិ, កម្មជាតា យថារហំ;

ឯកបញ្ញាស ឃដិកា, បវត្តន្តិ ខណេ ខណេ.

៨៧៥. តត្ថ សន្ធិក្ខណេ ជាតំ, សត្តរសមចេតសោ;

ឧប្បាទេ ភិជ្ជតិច្ចេវំ, វុត្តោ អដ្ឋកថានយោ.

៨៧៦. តំ នយំ បដិពាហិត្វា, ចិត្តេន សហ ភិជ្ជតិ;

ចិត្តេន សហ ជាតន្តិ, វុត្តមាចរិយេន ហិ.

៨៧៧. អានាបានតក្កចារា, ឯកុប្បាទនិរោធកា;

វុត្តា ហិ យមកេ កាយវចីសង្ខារនាមកា.

៨៧៨. ចិត្តុប្បាទក្ខណេ ជាតា, ឧតុ តស្ស ឋិតិក្ខណេ;

រូបំ ជនេតិ តត្ថាបិ, ឧតុ ភង្គក្ខណេបិ ច.

៨៧៩. អនុបុព្ពក្កមេនេវំ, ជាតំ រូបំ តថាបរំ;

អដ្ឋារសមឧប្បាទដ្ឋិតិអាទីសុ ភិជ្ជតិ.

៨៨០. ឥត្ថំ កលាបា ឃដិតា, ឧតុជាហារជាបិ ច;

ឯកសន្តតិសម្ពន្ធា, ឯកបញ្ញាស លព្ភរេ.

៨៨១. កលាបា ចិត្តជា យស្មា, ឧប្បាទក្ខណសម្ភូតា;

ឃដិកា សហ លព្ភន្តិ, តស្មា សត្តរសេវ តេ.

៨៨២. សព្ពេបិ រូបជនកា, ចិត្តុប្បាទេ យថាសកំ;

ជនេន្តិ ឋិតិភង្គេសុ, ន ជនេន្តីតិ កេចនា.

៨៨៣. កុសលាព្យាកតាទីនំ, ឯកុប្បាទនិរោធតា;

ធម្មានំ យមកេ វុត្តា, ឥតិ បាឡិ វទន្តិ ច.

៨៨៤. កុសលាទិកសម្ពន្ធា, តត្ថ តត្ថ ហិ ទេសិតា;

ឥតិ វត្វា បុរេ វុត្តំ, ឥច្ឆន្តាចរិយា នយំ.

៨៨៥. ឥច្ចេវំ ចតុសម្ភូតា, រូបសន្តតិរាសយោ;

រូបានិ ច កលាបា ច, ឯកាពទ្ធា យថារហំ.

៨៨៦. សុត្តបវត្តមត្តានំ, សម្ពុទ្ធានម្បិ បាណិនំ;

យាវ មរណកាលាបិ, បវត្តន្តិ និរន្តរំ.

៨៨៧. អាយុក្ខយា ច មរណំ, តថា កម្មក្ខយា សិយា;

ឧភិន្នំ វា ខយា ចាថ, ឧបច្ឆេទកកម្មុនា.

៨៨៨. ចតុធាបិ មរន្តស្ស, តស្សេវំ តុ យថារហំ;

សត្តរសចិត្តក្ខណមត្តសេសម្ហិ ជីវិតេ.

៨៨៩. ឧបរិច្ចុតិចិត្តស្ស, សត្តរសមចេតសោ;

ឋិតិកាលមុបាទាយ, ន តុ ជាយតិ កម្មជំ.

៨៩០. តស្សុប្បាទក្ខណេ ជាតំ,

រូបញ្ច ចុតិយា សហ;

ភិជ្ជតីតិ មតោ នាម,

តតោ ហោតិ ស បុគ្គលោ.

៨៩១. ចិត្តជាហារជញ្ចាបិ, ន ជាយតិ តតោ បរំ;

ឧតុសម្ភវរូបំ តុ, អវសិស្សតិ វា ន វា.

៨៩២. តតោ វុត្តនយេនេវ, មតសត្តោ យថារហំ;

មិស្សាមិស្សាហិ សន្ធីហិ, បុនទេវោបបជ្ជតិ.

៨៩៣. តតោ វុត្តនយេនេវ, ឯកូនតិំស កម្មជា;

តេសមុដ្ឋានិកា បញ្ច, ចតុត្តិំស សមិស្សិតា.

៨៩៤. កលាបា រាសយោ ហោន្តិ, សត្តវីសតិភូមិសុ;

ឥតិ សព្ពបការេន, រូបធម្មា បកាសិតាតិ.

ឥតិ រូបវិភាគេ បកិណ្ណកកថា និដ្ឋិតា.

ទ្វាវីសតិមោ បរិច្ឆេទោ.

និដ្ឋិតោ ច សព្ពថាបិ រូបវិភាគោ.