វីសតិមោ បរិច្ឆេទោ

២០. កលាបកថា

៧៥៤. ឥតិ វុត្តប្បការេន, សព្ពំ រូបម្បិ បិណ្ឌិតំ;

សហវុត្តិនិយាមេន, ឯកវីសវិធំ កថំ.

៧៥៥. កម្មំ ចិត្តោតុកាហារសមុដ្ឋានា យថាក្កមំ;

នវ ឆ ចតុរោ ទ្វេ ច, កលាបា ឯកវីសតិ.

៧៥៦. ជីវិតញ្ចាវិនិព្ភោគ-រូបានិ ច យថាក្កមំ;

ចក្ខាទិកេហិ យោជេត្វា, ទសកា អដ្ឋ ទីបិតា.

៧៥៧. ចក្ខុសោតឃានជិវ្ហាទសកា ច ចតុព្ពិធា;

កាយិត្ថិបុម្ភាវវត្ថុទសកា ច តថាបរេ.

៧៥៨. ជីវិតេនាវិនិព្ភោគរូបានិ នវកន្តិ ច;

នវេតេ កម្មជា នាម, កលាបា សមុទីរិតា.

៧៥៩. អវិនិព្ភោគរូបានិ, សុទ្ធដ្ឋកមថាបរំ;

កាយវិញ្ញត្តិនវកំ, កាយវិញ្ញត្តិយា សហ.

៧៦០. វចីវិញ្ញត្តិទសកំ, សទ្ទេន សហវុត្តិតោ;

លហុតាទេកាទសកំ, តិណ្ណន្នំ សហ សម្ភវា.

៧៦១. កាយវិញ្ញត្តិលហុតាទីហិ ទ្វាទសកំ ភវេ;

វចីវិញ្ញត្តិលហុតាទីហិ តេរសកំ តថា.

៧៦២. ឥតិ ចិត្តសមុដ្ឋានា, កលាបា ឆ បកាសិតា;

រូបាការវិការម្បិ, សង្គហេត្វា យថារហំ.

៧៦៣. សុទ្ធដ្ឋកំ តុ បឋមំ, សទ្ទេន នវកំ ភវេ;

លហុតាទេកាទសកំ, លហុតាទីហិ តីហិបិ.

៧៦៤. សទ្ទេន លហុតាទីហិ, តថា ទ្វាទសកន្តិ ច;

កលាបា ឧតុសម្ភូតា, ចតុធាវ បកិត្តិតា.

៧៦៥. សុទ្ធដ្ឋកញ្ច បឋមំ, អាហារជមថាបរំ;

លហុតាទេកាទសកំ, ឥតិ ទ្វេ ឱជជា មតា.

៧៦៦. កលាបានំ បរិច្ឆេទលក្ខណត្តា វិចក្ខណា;

ន កលាបង្គមិច្ចាហុ, អាកាសំ លក្ខណានិ ច.

៧៦៧. តត្ថ ចេកូននវុតិ, តេសដ្ឋិ ច យថាក្កមំ;

តាលីសេកូនវីសា ច, កលាបង្គានិ តានិ ច.

៧៦៨. លក្ខណាកាសរូបានិ, កលាបេសុ តហិំ តហិំ;

បញ្ច បញ្ចេតិ រូបានិ, តិសតំ សោឡសាធិកំ.

៧៦៩. អគហីតគ្គហណេន, អដ្ឋវីសវិធានិបិ;

រូបកោដ្ឋាសនាមេន, បញ្ចវីសតិ ភាវយេ.

៧៧០. ភូតត្តយំ តុ ផោដ្ឋព្ពំ, កត្វាបចយសន្តតិំ;

ជាតិមេកញ្ច កត្វា វា, វិនាថ ហទយំ តហិំ.

៧៧១. ធម្មសង្គណិយំ ហេតំ, រូបកណ្ឌេ សរូបតោ;

វត្ថុរូបំ ន និទ្ទិដ្ឋំ, បដ្ឋានេ ទេសិតំ តុ តំ.

៧៧២. ទ្វេ សទ្ទនវកា ចេវ,

តយោ សុទ្ធដ្ឋកាបិ ច;

ទ្វេ ទ្វេ ចិត្តោតុសម្ភូតា,

ឯកោ អាហារជោតិ ច.

៧៧៣. តេសមុដ្ឋានិកា បញ្ច, កម្មជានិ នវេតិ ច;

រូបរូបវសេនេតេ, កលាបា ចុទ្ទសេរិតា.

៧៧៤. ទសកេស្វេវ សង្គយ្ហ, ជីវិតនវកំ តហិំ;

ភាវទ្ទសកមេកំ វា, កត្វា វត្ថុំ វិនា តថា.

៧៧៥. សទ្ទា ចិត្តោតុជា ទ្វេវ, តេសមុដ្ឋានិកា តយោ;

សុទ្ធដ្ឋកា ច សត្តេវ, កម្មជា ទសកានិ ច.

៧៧៦. ឆន្នវូតិវិធំ តត្ថ, រូបំ ភាសន្តិ បណ្ឌិតា;

អគហីតគ្គហណេន, អដ្ឋារសវិធំ ភវេ.

៧៧៧. តេសមេវ កលាបានំ, សត្តកច្ឆក្កបញ្ចកា;

ចតុក្កា ច តិកទ្វិកា, ឯកកា ច យថារហំ.

៧៧៨. ទ្វេ សត្ត នវ ឆ តយោ, តយោបិ ច យថាក្កមំ;

ចត្តារោតិ ចតុត្តិំស, សហវុត្តិករាសយោ.

៧៧៩. ចក្ខុសោតឃានជិវ្ហា-កាយវត្ថុវសា សិយុំ;

ឥត្ថិបុម្ភាវទសកសហិតា សត្តកា ទ្វិធា.

៧៨០. ចក្ខុសោតឃានហីនា, បច្ចេកំ ទ្វេ សភាវកា;

អភាវតោ ភាវហីនោ, ឥត្ថំ ឆក្កាបិ សត្តធា.

៧៨១. ចក្ខុសោតវិហីនា ច,

ចក្ខុឃានវិហីនកា;

សោតឃានវិហីនា ច,

សភាវា ទ្វេ តយោ តយោ.

៧៨២. ចក្ខាទេកេកតោ ហីនា,

តិវិធាបិ អភាវតោ;

ឥច្ចេវំ បញ្ចកា នាម,

នវកា រាសយោ សិយុំ.

៧៨៣. ចក្ខាទិត្តយហីនាវ, ឯកតោ ទ្វេ សភាវកា;

ចក្ខាទិត្តយតោ ទ្វីហិ, តយោ ហីនា អភាវកា.

៧៨៤. រូបលោកេ ចក្ខុសោត-វត្ថុជីវិតនវកា;

ចត្តារោវ កលាបាតិ, ចតុក្កា ឆ យថារហំ.

៧៨៥. ជិវ្ហាកាយវត្ថុវសា,

អភាវោ ទ្វេ សភាវកា;

កាយភាវវត្ថុវសា,

ឥតិ ហោន្តិ តយោ តិកា.

៧៨៦. កាយវត្ថុវសេនេកោ, ទ្វេ ច ចិត្តោតុសម្ភវា;

សទ្ទនវកដ្ឋកាតិ, ទុកា ច តិវិធា សិយុំ.

៧៨៧. ជីវិតនវកញ្ចេកំ, តេសមុដ្ឋានិកានិ ច;

សុទ្ធដ្ឋកានិ តីណីតិ, ចត្តារោ ឯកកា សិយុំ.

៧៨៨. ចតុត្តិំស បនិច្ចេតេ, សន្ធិយញ្ច បវត្តិយំ;

រូបរូបកលាបានំ, រាសយោ ហោន្តិ សម្ភវា.

៧៨៩. សត្តតិ សដ្ឋិមិច្ចេវមាទិនា ច យថារហំ;

កលាបរាសិរូបានិ, តត្ថ តត្ថ វិភាវយេ.

៧៩០. សោឡស បញ្ចទសេតិអាទិភេទវសាបិ ច;

អគហីតគ្គហណេន, តត្ថ តត្ថ វិនិទ្ទិសេ.

៧៩១. ចតុចត្តាលីសសតំ, កលាបា ហោន្តិ បិណ្ឌិតា;

ឆព្ពីស តត្ថ រូបានិ, សហស្សញ្ច ចតុស្សតំ.

៧៩២. ឥច្ចាបាយចតុក្កេ ច, កាមេ សុគតិសត្តកេ;

រូបេ ច បញ្ចទសកេ, អសញ្ញាបាយភូមិយំ.

៧៩៣. ចតុកោដ្ឋាសិកេស្វេវ, សត្តវីសវិធេសុបិ;

ជាតិដ្ឋានេសុ សត្តានំ, សន្ធិយញ្ច បវត្តិយំ.

៧៩៤. ឥន្ទ្រិយពទ្ធសន្តានេ, តថានិន្ទ្រិយកម្ហិ ច;

ពហិសង្ខារសន្តានេ, មតកាយេ ច សម្ភវា.

៧៩៥. លព្ភមានកលាបា ច, កលាបានញ្ច រាសយោ;

តត្ថ វិត្ថារសង្ខេបា, រូបានំ គណនាបិ ច.

៧៩៦. ឯត្ថ រូបា អវុត្តា ហិ, យថាវុត្តានុសារតោ;

វិត្ថារេត្វាន វិញ្ញេយ្យា, សព្ពថាបិ ច វិញ្ញុនាតិ.

ឥតិ រូបវិភាគេ កលាបកថា និដ្ឋិតា.

វីសតិមោ បរិច្ឆេទោ.