ឯកូនវីសតិមោ បរិច្ឆេទោ

១៩. បភេទកថា

៧០៦. អដ្ឋវីសវិធម្បេតំ, រូបំ ទានិ យថារហំ;

ភូតរូបាទិភេទេហិ, វិភជេយ្យ វិចក្ខណោ.

៧០៧. បថវាទិកមិទន្តិ, ភូតរូបំ ចតុព្ពិធំ;

ឧបាទារូបមញ្ញំ តុ, ចតុវីសតិវិធំ ភវេ.

៧០៨. បញ្ចវិធម្បិ ចក្ខាទិរូបមជ្ឈត្តិកំ មតំ;

តេវីសតិវិធំ សេសំ, ពាហិរន្តិ បវុច្ចតិ.

៧០៩. រូបសទ្ទគន្ធរសផោដ្ឋព្ពា សត្ត បញ្ចធា;

បញ្ចប្បសាទវិសយា, បញ្ចារម្មណនាមកា.

៧១០. ឯកវីសតិវិធំ សេសំ, ធម្មារម្មណសង្គហំ;

មនោវិញ្ញាណវិញ្ញេយ្យំ, មនោទ្វារស្ស គោចរំ.

៧១១. បសាទា វិសយា ចេវ, បញ្ចកា ទ្វេបិ សម្ភវា;

ទ្វាទសាបិ សរូបេន, ទសាយតនធាតុយោ.

៧១២. យទេទំ បន សព្ពម្បិ, រូបំ សប្បដិឃំ មតំ;

តទេវោឡារិកំ នាម, សន្តិកេតិ បវុច្ចតិ.

៧១៣. សេសមប្បដិឃំ នាម, ធម្មាយតនធាតុ ច;

សុខុមញ្ចេវ រូបញ្ច, រូបំ សោឡសធា ឋិតំ.

៧១៤. ឆព្ពិធា វត្ថុរូបំ តុ, បសាទហទយម្បិ ច;

អវត្ថុរូបំ សេសំ តុ, ទ្វាវីសតិវិធំ ភវេ.

៧១៥. បសាទា ចេវ វិញ្ញត្តិ, ទ្វាររូបំ តុ សត្តធា;

សេសំ អទ្វាររូបំ តុ, ឯកវីសវិធម្បិ ច.

៧១៦. បសាទា ភាវយុគឡំ, ជីវិតញ្ចេតិ អដ្ឋធា;

ឥន្ទ្រិយរូបមញ្ញំ តុ, វីសធានិន្ទ្រិយំ សិយា.

៧១៧. វណ្ណោ គន្ធោ រសោ ឱជា, ភូតរូបន្តិ អដ្ឋធា;

អវិនិព្ភោគមិតរំ, វិនិព្ភោគំ តុ វីសធា.

៧១៨. អវិនិព្ភោគរូបានិ, សទ្ទវត្ថិន្ទ្រិយានិ ច;

និប្ផន្នំ អដ្ឋារសធា, រូបរូបន្តិ វេទិតំ.

៧១៩. បរិច្ឆេទោ បនាកាសោ, វិញ្ញត្តិលហុតាទយោ;

វិការា លក្ខណា ចេវ, រូបស្សុបចយាទយោ.

៧២០. ទសធាបិ អនិប្ផន្នំ, នត្ថេតំ បរមត្ថតោ;

រូបស្សេតន្តិ កត្វាន, រូបមិច្ចេវ វុច្ចតិ.

៧២១. រូបាយតនមេវេកំ, សនិទស្សនមីរិតំ;

អនិទស្សនមញ្ញំ តុ, សត្តវីសតិវិធម្បិ ច.

៧២២. កម្មជំ បនុបាទិន្នំ, អនុបាទិន្នកាបរំ;

តិវិធំ ចិត្តជញ្ចេវ, ឧតុជាហារជន្តិ ច.

៧២៣. ចក្ខុសម្ផស្សវត្ថូតិ, ចក្ខុធាតុ បកិត្តិតា;

ន វត្ថុ តស្ស សេសំ តុ, សត្តវីសតិវិធំ ភវេ.

៧២៤. សោតសម្ផស្សវត្ថាទិ-វសា ច ទុវិធា តថា;

តិវិធា ច វិភាវេយ្យ, យថាសម្ភវតោ កថំ.

៧២៥. សនិទស្សនរូបញ្ច, វណ្ណោ សប្បដិឃម្បិ ច;

អនិទស្សនមញ្ញំ តុ, ថូលំ សប្បដិឃំ ភវេ.

៧២៦. អនិទស្សនរូបញ្ច, សេសមប្បដិឃម្បិ ច;

សោឡសាតិ ច សព្ពម្បិ, រូបំ តិវិធមុទ្ទិសេ.

៧២៧. អបត្តគាហកំ នាម, ចក្ខុសោតទ្វយំ បន;

សម្បត្តគាហកំ នាម, ឃានាទិត្តយមីរិតំ.

៧២៨. អគាហកមតោ សេសំ, តេវីសតិវិធំ ភវេ;

កិញ្ចិ សារម្មណំ នាម, ន គយ្ហតីតិ សព្ពថា.

៧២៩. ឧបាទា អជ្ឈត្តិកំ រូបំ, ឧបាទា ពាហិរំ តថា;

នោបាទា ពាហិរញ្ចេតិ, ឯវម្បិ តិវិធំ ភវេ.

៧៣០. អជ្ឈត្តិកមុបាទិន្នំ, ពាហិរញ្ច តថាបរំ;

អនុបាទិន្នកញ្ចេតិ, ឯវមាទិវសាបិ ច.

៧៣១. ទិដ្ឋំ រូបំ សុតំ សទ្ទោ, គន្ធាទិ តិវិធំ មុតំ;

វិញ្ញាតមញ្ញវិញ្ញេយ្យំ, មនសាតិ ចតុព្ពិធំ.

៧៣២. រូបរូបំ បរិច្ឆេទោ, វិការោ លក្ខណំ កមា;

អដ្ឋារសេកកំ បញ្ច, ចតុក្កន្តិ ច តំ តថា.

៧៣៣. ទ្វារញ្ច ហោតិ វត្ថុ ច, ន វត្ថុ ទ្វារមេវ តុ;

ន ទ្វារំ វត្ថុមេវាថ, នោភយន្តិ ច និទ្ទិសេ.

៧៣៤. ឧបាទា អនុបាទិន្នំ, អនុបាទិន្នកំ តថា;

នោបាទា ទុវិធញ្ចេតិ, ចតុទ្ធេវម្បិ ទេសិតំ.

៧៣៥. សប្បដិគ្ឃមុបាទា ច, រូបមប្បដិឃំ តថា;

នោបាទា ទុវិធញ្ចេតិ, ចតុទ្ធា ឯវមាទិតោ.

៧៣៦. ឯកាទសេកជរូបំ, ហទយិន្ទ្រិយនវកំ;

កម្មជំ ចិត្តជញ្ចេវ, តថា វិញ្ញត្តិកំ ទ្វយំ.

៧៣៧. សទ្ទោ ចិត្តោតុជោ តស្មា, រូបមេកំ ទ្វិជំ មតំ;

ចិត្តោតាហារសម្ភូតំ, លហុតាទិត្តយំ តិជំ.

៧៣៨. នវាកាសាវិនិព្ភោគា, កម្មាទិចតុសម្ភវា;

អថ លក្ខណរូបន្តិ, រូបមេវំ តុ បញ្ចធា.

៧៣៩. នវាកាសាវិនិព្ភោគា, នវ វត្ថិន្ទ្រិយានិ ច;

អដ្ឋារសវិធំ រូបំ, កម្មជំ ហោតិ បិណ្ឌិតំ.

៧៤០. សទ្ទាកាសាវិនិព្ភោគា, វិញ្ញត្តិលហុតាទយោ;

បញ្ចទសវិធំ រូបំ, ចិត្តសម្ភវមុទ្ទិសេ.

៧៤១. សទ្ទាកាសាវិនិព្ភោគា, លហុតាទិត្តយន្តិ ច;

ឧតុសម្ភវមីរេន្តិ, រូបំ តេរសធា ឋិតំ.

៧៤២. បរិច្ឆេទាវិនិព្ភោគា, លហុតាទិត្តយម្បិ ច;

ឯវមាហារជំ នាម, រូបំ ទ្វាទសធា ឋិតំ.

៧៤៣. ជាតិ ជរា ច មរណំ, ន កុតោចិបិ ជាយតិ;

ឯវម្បិ បញ្ចធា ហោតិ, រូបជាតិវិភាគតោ.

៧៤៤. បញ្ចវីសតិវិធំ កម្មំ, កាមរូបវវត្ថិតំ;

ជនេតិ កម្មជំ រូបំ, កាមរូបភវទ្វយេ.

៧៤៥. បញ្ចវិញ្ញាណមារុប្ប-វិបាកា សព្ពសន្ធិយោ;

ចុតិ ខីណាសវស្សេតិ, សោឡសេតេ វិវជ្ជយេ.

៧៤៦. បញ្ចសត្តតិ សេសានិ, ចិត្តានិមានិ សម្ភវា;

ជនេន្តិ ចិត្តជំ រូបំ, បញ្ចវោការភូមិយំ.

៧៤៧. ជនេភិ ឧតុជំ រូបំ, តេជោធាតុ ភវទ្វយេ;

កាមភូមិយមោជា តុ, ជនេតាហារជំ តថា.

៧៤៨. កម្មំ ជនេតិ រូបានិ, អត្តជានិ ខណេ ខណេ;

ចិត្តមុប្បាទកាលម្ហិ, ឧប្បាទានន្តរំ បរំ.

៧៤៩. ឧតុសម្ភវមីរេន្តិ, រូបំ តេរសធា ឋិតំ;

បរិច្ឆេទាវិនិព្ភោគា, លហុតាទិត្តយម្បិ ច.

៧៥០. សន្ធិយម្បិ កម្មជំ តុ, បវត្តេបិ ច សម្ភវា;

ជនេតិ រូបំ សេសានិ, បវត្តេ, ន តុ សន្ធិយំ.

៧៥១. ឥន្ទ្រិយពទ្ធសន្តានេ, កម្មាទិ តិវិធម្បិ ច;

ជនេតិ រូបំ មតកេ, ពាហិរេ តុ យថារហំ.

៧៥២. ឥតិ កម្មាទយោ រូបំ, ជនេន្តិ ច យថាសកំ;

សេសានម្បិ ច រូបានំ, បច្ចយា ហោន្តិ សម្ភវា.

៧៥៣. ឥតិ រូបវិភាគញ្ច, ជាតិភេទញ្ច សម្ភវា;

ជនកាទិប្បភេទញ្ច, រូបានំ តត្ថ ទីបយេតិ.

ឥតិ រូបវិភាគេ បភេទកថា និដ្ឋិតា.

ឯកូនវីសតិមោ បរិច្ឆេទោ.