៣. រូបវិភាគោ

១៨. សរូបកថា

៦៥៣. តេបញ្ញាស បនិច្ចេវំ, នាមធម្មា បកាសិតា;

អដ្ឋវីសវិធំ ទានិ, រូបំ នាម កថីយតិ.

៦៥៤. បថវាបោ ច តេជោ ច, វាយោ ចេតិ ចតុព្ពិធោ;

ចក្ខុសោតឃានជិវ្ហា, កាយោតិ បន បញ្ច ច.

៦៥៥. រូបសទ្ទគន្ធរសា, ចត្តារោ ច អថាបរំ;

ឥត្ថិបុម្ភាវយុគឡំ, ជីវិតំ ហទយម្បិ ច.

៦៥៦. កាយវិញ្ញត្តិ ចេវាថ, វចីវិញ្ញត្តិ ច ទ្វយំ;

អាកាសធាតុ រូបស្ស, លហុតា មុទុតា តស្ស.

៦៥៧. កម្មញ្ញតា ឧបចយោ, សន្តតិ ជរតា បន;

អនិច្ចតា ច កពឡីការាហារោតិ សព្ពថា.

៦៥៨. អដ្ឋវីសវិធំ ហោតិ, រូបមេតំ សរូបតោ;

តស្ស លក្ខណភេទេន, សភាវញ្ច វិភាវយេ.

៦៥៩. សន្ធារណំ តុ បថវីធាតុ កក្ខឡលក្ខណា;

អាពន្ធនមាបោធាតុ, អាបគ្ឃរណលក្ខណា.

៦៦០. បរិបាចនតា តេជោធាតុ ឧណ្ហត្តលក្ខណា;

សមុទីរណតា វាយោធាតុ វិត្ថម្ភលក្ខណា.

៦៦១. សព្ពត្ថាវិនិភុត្តាបិ, អសម្មិស្សកលក្ខណា;

តំតំភាវសមុស្សន្នសម្ភារេសុបលក្ខិតា.

៦៦២. អញ្ញមញ្ញេនុបត្ថទ្ធា, សេសរូបស្ស និស្សយា;

ចតុធេវំ កលាបេសុ, មហាភូតា បវត្តរេ.

៦៦៣. ចក្ខុ សម្ភារចក្ខុម្ហិ, សត្តក្ខិបដលោចិតេ;

កណ្ហមណ្ឌលមជ្ឈម្ហិ, បសាទោតិ បវុច្ចតិ.

៦៦៤. យេន ចក្ខុបសាទេន, រូបានិ អនុបស្សតិ;

បរិត្តំ សុខុមញ្ចេតំ, ឩកាសិរសមូបមំ.

៦៦៥. សោតំ សោតពិលស្សន្តោ,

តម្ពលោមាចិតេ តថា;

អង្គុលិវេធនាការេ,

បសាទោតិ បកាសិតោ.

៦៦៦. អន្តោ អជបទដ្ឋានេ, ឃានំ ឃានពិលេ ឋិតំ;

ជិវ្ហា ជិវ្ហាយ មជ្ឈម្ហិ, ឧប្បលាការសន្និភេ.

៦៦៧. ឥច្ចេវំ បន ចត្តារោ, តំតំទេសវវត្ថិតា;

កាយប្បសាទោបាទិន្នេ, សព្ពកេតិ យថាក្កមំ.

៦៦៨. រូបាទ្យាភិឃាតារហភូតានំ វា យថារហំ;

ទដ្ឋុកាមនិទានាទិកម្មភូតានមេវ វា.

៦៦៩. បសាទលក្ខណា ភូតរូបានំ ភូតនិស្សិតា;

កប្បាសបដលស្នេហសន្និភាតិ ច វណ្ណិតា.

៦៧០. បញ្ចាបិ ជីវិតារក្ខា, រូបាទិបរិវារិតា;

ធីតរាវ កុមារាវ, កលាបន្តរវុត្តិនោ.

៦៧១. រូបំ និភាសោ ភូតានំ, សទ្ទោ និគ្ឃោសនំ តថា;

គន្ធោ ច គន្ធនំ តត្ថ, រសោ ច រសនីយតា.

៦៧២. ភូតត្តយញ្ច ផោដ្ឋព្ពំ, អាបោធាតុវិវជ្ជិតំ;

សទ្ទោ អនិយតោ តត្ថ, តទញ្ញេ សហវុត្តិនោ.

៦៧៣. ចក្ខាទិបដិហននលក្ខណា តុ យថាក្កមំ;

បញ្ចេវ បញ្ចវិញ្ញាណវីថិយា វិសយា មតា.

៦៧៤. ឥត្ថិន្ទ្រិយំ បនិត្ថិត្តំ, ឥត្ថិភាវោតិ ទេសិតោ;

បុរិសត្តំ តថាភាវោ, បុរិសិន្ទ្រិយ នាមកោ.

៦៧៥. តំ ទ្វយំ បនុបាទិន្នេ, កាយេ សព្ពត្ថ លព្ភតិ;

កលាបន្តរភិន្នញ្ច, ភិន្នសន្តានវត្តិ ច.

៦៧៦. រូបានំ កម្មជាតានំ, អនុបាលនលក្ខណំ;

ជីវិតិន្ទ្រិយរូបន្តិ, អាយុ នាម បវុច្ចតិ.

៦៧៧. មនោធាតុយា ច តថា, មនោវិញ្ញាណធាតុយា;

និស្សយលក្ខណំ វត្ថុរូបំ ហទយនិស្សិតំ.

៦៧៨. មជ្ឈេ ហទយកោសម្ហិ, អឌ្ឍប្បសតលោហិតេ;

ភូតរូបមុបាទាយ, ចក្ខាទិ វិយ វត្តតិ.

៦៧៩. អាកាសធាតុ រូបានំ, បរិច្ឆេទកលក្ខណា;

តំតំរូបកលាបានំ, បរិយន្តោតិ វុច្ចតិ.

៦៨០. ចិត្តំ សហជរូបានំ, កាយស្ស គមនាទិសុ;

សន្ថម្ភនសន្ធារណចលនស្ស តុ បច្ចយោ.

៦៨១. វាយោធាតុវិការោយំ, កាយវិញ្ញត្តិនាមកោ;

វាយោធាតាធិកានំ តុ, ភូតានមិតិ កេចនា.

៦៨២. តថា ចិត្តសមុដ្ឋិនោ, វចីឃោសប្បវត្តិយំ;

ឧបាទិន្នរូបកាយឃដ្ដនស្ស តុ បច្ចយោ.

៦៨៣. បថវីធាតុវិការោយំ, វចីវិញ្ញត្តិនាមកោ;

បថវីធាតាធិកានំ តុ, ភូតានមិតិ កេចនា.

៦៨៤. ទ្វេបិ កាយវចីកម្មទ្វារភូតា យថាក្កមំ;

តេ បន ឃដ្ដនាហេតុ-វិការាការលក្ខណា.

៦៨៥. វិញ្ញាបេតីតិ កាយេន, វាចាយ ច វិចិន្តិតំ;

សយញ្ច វិញ្ញាយតីតិ, វិញ្ញត្តីតិ បកិត្តិតា.

៦៨៦. លហុតា បន រូបានំ, អទន្ធាការលក្ខណា;

មុទុតាបិ ច រូបានំ, មទ្ទវាការលក្ខណា.

៦៨៧. កម្មញ្ញតា ច រូបានំ, យោគ្គតាការលក្ខណា;

គារវថទ្ធតា យោគ្គបដិបក្ខា យថាក្កមំ.

៦៨៨. សប្បាយមុតុមាហារំ, លភិត្វា ចិត្តសម្បទំ;

លហូ មុទុ ច កម្មញ្ញំ, យទា រូបំ បវត្តតិ.

៦៨៩. តថាបវត្តរូបស្ស, បវត្តាការភេទិតំ;

លហុតាទិត្តយម្បេតំ, សហវុត្តិ តទា ភវេ.

៦៩០. សប្បាយំ បដិវេធាយ, បដិបត្តុបការិតា;

សាការា រូបសម្បត្តិ, បញ្ញត្តាវ មហេសិនា.

៦៩១. រូបស្សោបចយោ នាម, រូបស្សាចយលក្ខណោ;

បវត្តិលក្ខណា រូបសន្តតីតិ បកាសិតា.

៦៩២. រូបមាចយរូបេន, ជាយតិច្ចុបរូបរិ;

បេក្ខតោបចយាការា, ជាតិ គយ្ហតិ យោគិនោ.

៦៩៣. អនុប្បពន្ធាការេន, ជាយតីតិ សបេក្ខតោ;

តទាយំ សន្តតាការា, ជាតិ គយ្ហតិ តស្ស តុ.

៦៩៤. ឯវមាភោគភេទេន, ជាតិរូបំ ទ្វិធា កតំ;

អត្តូបលទ្ធិភាវេន, ជាយន្តំ វាថ កេវលំ.

៦៩៥. រូបំ វិវិត្តោកាសស្ស, បូរកដ្ឋេន ចីយតិ;

អភាវា បុនភាវាយ, បវត្តំ សន្តតីតិ ច.

៦៩៦. ឯវមាការភេទាវ, សព្ពាការវរាករោ;

ជាតិរូបំ ទ្វិធាកាសិ, ជាតិរូបវិរោចនោ.

៦៩៧. ជរតា នវតាហាយា, រូបានំ បាកលក្ខណា;

អនិច្ចតន្តិ មប្បត្តិ, បរិភិជ្ជនលក្ខណា.

៦៩៨. ឥតិ លក្ខណរូបំ តុ, តិវិធំ ភិន្នកាលិកំ;

សភាវរូបធម្មេសុ, តំតំកាលោបលក្ខិតំ.

៦៩៩. យេន លក្ខីយតិ រូបំ, ភិន្នាការំ ខណេ ខណេ;

វិបស្សនានយត្ថាយ, តមិច្ចាហ តថាគតោ.

៧០០. កពឡីការោ អាហារោ,

យាបេតព្ពោជលក្ខណោ;

អាហារោ សេន្ទ្រិយជាតោ,

រូបកាយានុបាលកោ.

៧០១. ឥច្ចេវំ សបរិច្ឆេទា, សវិការា សលក្ខណា;

អកិច្ចបដិវេធាយ, ទយាបន្នេន តាទិនា.

៧០២. តត្ថ តត្ថ យថាយោគំ, ទេសិតាតិ បកាសិតា;

រូបធម្មា សរូបេន, អដ្ឋវីសតិ សព្ពថា.

៧០៣. កត្វាន ជាតិមេកំ តុ, តត្ថោបចយសន្តតិំ;

សត្តវីសតិ រូបានិ, ភវន្តីតិ វិនិទ្ទិសេ.

៧០៤. ភូតត្តយំ តុ ផោដ្ឋព្ពំ, កត្វា ឆព្ពីសធាបិ ច;

ឧភយំ ជាតិផោដ្ឋព្ពំ, គហេត្វា បញ្ចវីសតិ.

៧០៥. រូបធម្មានមិច្ចេវំ, វិភាវេយ្យ វិសារទោ;

សរូបំ នាមសង្ខេបំ, សភាវញ្ច សលក្ខណន្តិ.

ឥតិ រូបវិភាគេ សរូបកថា និដ្ឋិតា.

អដ្ឋារសមោ បរិច្ឆេទោ.