បន្នរសមោ បរិច្ឆេទោ

១៥. រាសិសង្គហកថា

៥១៣. តេត្តិំស ចេវ ទ្វត្តិំស, ឯកតិំស ច តិំស ច;

ឯកទ្វត្តិំសហីនា ច, តិំស ធម្មានវជ្ជកេ.

៥១៤. ទស ធម្មា តុ សាវជ្ជេ, ឆបញ្ចចតុរាធិកា;

ឯកាទស ទស នវ, សត្តធាហេតុកេ បន.

៥១៥. ឥត្ថំ ចុទ្ទសធា ភិន្នា, កោដ្ឋាសា តុ សរូបតោ;

វិភត្តា តេហិ យុត្តា ច, ចិត្តុប្បាទា យថាក្កមំ.

៥១៦. តិកដ្ឋកា បញ្ចវីស, ទស បញ្ចាធិកា នវ;

អដ្ឋារសេតិ សត្តេតេ, អនវជ្ជា តថេតរេ.

៥១៧. ទ្វេ ចត្តារោ ឆឡេកំ ទ្វេ,

បញ្ចាថ ទសធាបរេ;

សាវជ្ជាហេតុកា ចេតិ,

កោដ្ឋាសា ហោន្តិ ចុទ្ទស.

៥១៨. នវ ចាបិ ឆ ចត្តារោ, ចតុបញ្ចឆសត្តកា;

នវ ទ្វេ ទ្វេ តថេកោ ច, យេវាបនកសង្គហា.

៥១៩. តេហិ យុត្តា បនដ្ឋាថ, វីសេកតិំស មានសា;

ទ្វេ ទ្វេ ទ្វេ តីណិ ចេកំ ទ្វេ, អដ្ឋ ទស យថាក្កមំ.

៥២០. សត្តតិំសកតោ យាវ, ឯកតិំសានវជ្ជកេ;

តិកដ្ឋកាទិកេ សត្ត, ឋិតា និយតសង្គហា.

៥២១. បាបេសុ វីស ចេកូន-វីសដ្ឋារស សោឡស;

ចតុធា ទ្វីសុ ចតូសុ, ចតូសុ ទ្វីសុ ចដ្ឋិតា.

៥២២. ឯកទ្វិបញ្ចទសសុ, ច ទ្វិធាហេតុកេសុ ច;

តិកទ្វេកាធិកា ធម្មា, ទសដ្ឋ ច យថាក្កមំ.

៥២៣. បញ្ចទ្វេកទ្វិភិបញ្ច, កោដ្ឋាសា និយតា ឋិតា;

តេហិ យុត្តា បនដ្ឋាថ, វីស ទ្វេ ទ្វេ តិកេកកា.

៥២៤. បុព្ពាបរទ្វយាបុញ្ញេ, កាមបាកេ អហេតុកេ;

បញ្ចមានុត្តរារុប្បេ, នត្ថានិយតសម្ភវោ.

៥២៥. ឆត្តិំសមានសេស្វេវ, លព្ភន្តានិយតា ន វា;

តេបញ្ញាសាវសេសា តុ, សព្ពេ និយតយោគិនោ.

៥២៦. និយតានិយតេ កត្វា, លព្ភន្តោភយថា តថា;

សរូបយេវោភយកា, តិវិធេវំ តុ សង្គហា.

៥២៧. ញេយ្យា វុត្តានុសារេន, តេហិ យុត្តាវ មានសា;

តតោ បុន វិភាវេយ្យ, សព្ពសង្គាហិកំ នយំ.

៥២៨. ឯកូនតាលីសកតោ, យាវេកត្តិំសកា ឋិតា;

នវធា អនវជ្ជេសុ, តេហិ យុត្តា ច មានសា.

៥២៩. ទ្វេ ចត្តារោ ទសេវាថ, តិកបញ្ចាធិកា ទស;

តេវីស កមតោ សត្ត, ទ្វេ ច បញ្ចទសាបរេ.

៥៣០. ទ្វេ ច ទ្វេ តិកទ្វេ ទ្វេកា, សាវជ្ជេសុ ច សោឡស;

ឯកូនវីស វីសាថ, វីសេកទ្វិតយាធិកា.

៥៣១. អហេតុកេ បនដ្ឋាថ, ទសេកទ្វិតយាធិកា;

ទសបញ្ច ទ្វិកេកាតិ, ភវន្តេកូនវីសតិ.

៥៣២. លព្ភមានានុសារេន, ធម្មានំ បន សង្គហោ;

សក្កា វុត្តនយេនេវ, វិញ្ញាតុំ បន វិញ្ញុនាតិ.

ឥតិ ចេតសិកវិភាគេ រាសិសង្គហកថា និដ្ឋិតា.

បន្នរសមោ បរិច្ឆេទោ.