សោឡសមោ បរិច្ឆេទោ

១៦. ចិត្តុប្បាទកថា

៥៣៣. ចិត្តុប្បាទេសុ ធម្មានំ, ឥតិ ញត្វា វិនិច្ឆយំ;

ចិត្តុប្បាទានមេវាថ, ញាតព្ពោ ភេទសង្គហោ.

៥៣៤. វេទនាហារតោ ចេវ, ហេតាធិបតិតោ តថា;

ឈានិន្ទ្រិយមគ្គពលា, យេវាបនបថាទិតោ.

៥៣៥. តត្ថ សុខា ច ទុក្ខា ច, អទុក្ខមសុខាតិ ច;

តិស្សោ ច វេទនា វុត្តា, សម្ភោគត្ថវិសេសតោ.

៥៣៦. សុខំ ទុក្ខំ សោមនស្សំ, ទោមនស្សមថាបរំ;

ឧបេក្ខិន្ទ្រិយមិច្ចេវំ, បញ្ចិន្ទ្រិយវិភាគតោ.

៥៣៧. កាយវិញ្ញាណយុគឡេ, សុខទុក្ខា ហិ វេទនា;

សោមនស្សំ ទោមនស្សំ, ឥតិ នាមំ លភន្តិ ន.

៥៣៨. អញ្ញត្ថ បន សព្ពត្ថ, សុខា ទុក្ខា ច វេទនា;

សោមនស្សំ ទោមនស្សំ, ឥតិ នាមំ លភន្តិ ច.

៥៣៩. អទុក្ខិ អសុខោបេក្ខា, មជ្ឈត្តាតិ ច វេទនា;

បញ្ចបញ្ញាសចិត្តេសុ, តទញ្ញេសុ បកាសិតា.

៥៤០. សុខទុក្ខិន្ទ្រិយយុត្តំ, កាយវិញ្ញាណកទ្វយំ;

ទោមនស្សិន្ទ្រិយយុត្តំ, បដិឃទ្វយមានសំ.

៥៤១. អដ្ឋារស បរិត្តានិ, ចតុក្កជ្ឈានមាទិតោ;

សោមនស្សិន្ទ្រិយយុត្តា, ទ្វាសដ្ឋិវិធ មានសា.

៥៤២. ទ្វត្តិំស ច បរិត្តានិ, តេវីស ឈានបញ្ចមា;

ហោន្តិបេក្ខិន្ទ្រិយយុត្តា, បញ្ចបញ្ញាស មានសា.

៥៤៣. សុខយុត្តា តុ តេសដ្ឋិ, ទុក្ខយុត្តា តយោ តហិំ;

អទុក្ខមសុខយុត្តា, បញ្ចបញ្ញាសុបេក្ខកា.

៥៤៤. ឱជដ្ឋមករូបញ្ច, វេទនំ សន្ធិមានសំ;

នាមរូបញ្ច កមតោ, អាហរន្តីតិ ទេសិតា.

៥៤៥. អាហារា កពឡីការោ, ផស្សោ សញ្ចេតនា តថា;

វិញ្ញាណញ្ចេតិ ចត្តារោ, ឧបត្ថម្ភា ច សម្ភវា.

៥៤៦. ចិត្តុប្បាទេសុ សព្ពត្ថ,

អាហារារូបិនោ តយោ;

កពឡីការោ អាហារោ,

កាមេ កាយានុបាលកោ.

៥៤៧. អលោភោ ច អទោសោ ច,

អមោហោ ច តថាបរោ;

លោភោ ទោសោ ច មោហោ ច,

ហេតូ ធម្មា ឆ ទេសិតា.

៥៤៨. កុសលាកុសលា ហេតូ, តយោ អព្យាកតាតិ ច;

នវទ្វាទសធា តត្ថ, វិបាកក្រិយភេទតោ.

៥៤៩. ទស បញ្ចាធិកា ហោន្តិ, ភូមិភេទា តតោ តហិំ;

បុញ្ញបាកក្រិយាភេទា, តាលីស ចតុនូនកា.

៥៥០. សន្តីរណមនោធាតុ-បញ្ចវិញ្ញាណមានសេ;

វោដ្ឋព្ពនេ ច ហសិតេ, ហេតុ នាម ន វិជ្ជតិ.

៥៥១. លោភមូលេសុ លោភោ ច,

មោហោ ច បដិឃទ្វយេ;

ទោសោ មោហោ ច លព្ភន្តិ,

មោហោ ឯកោវ មោមុហេ.

៥៥២. ញាណេន វិប្បយុត្តេសុ,

អលោភាទិទ្វយំ ភវេ;

តតោ សេសេសុ សព្ពត្ថ,

អលោភាទិតយោបិ ច.

៥៥៣. តិហេតុកា សត្តចត្តា-លីស ហោន្តិ ទ្វិហេតុកា;

ពាវីស ទ្វេកហេតុកា, អដ្ឋារស អហេតុកា.

៥៥៤. ឆន្ទោ ចិត្តញ្ច វីរិយំ, វីមំសាតិ ចតុព្ពិធា;

សហជាតាធិបា ធម្មា, វុត្តាធិបតយោ សិយុំ.

៥៥៥. យមាលម្ពំ គរុំ កត្វា, នាមធម្មា បវត្តរេ;

អារម្មណាធិបនាមេន, តទាលម្ពណមីរិតំ.

៥៥៦. តិហេតុកជវេស្វេកោ, ចតូសុបិ យថារហំ;

ទ្វិហេតុកេសុ សម្ភោតិ, វីមំសាធិបតិំ វិនា.

៥៥៧. អនុត្តរេ កាមបុញ្ញេ, តិហេតុកមហាក្រិយេ;

លោភមូលេ ច សាវជ្ជេ, លព្ភតាលម្ពណាធិបោ.

៥៥៨. តត្ថ ចានិយតា កាមេ, លព្ភមានាបិ លព្ភរេ;

មហគ្គតានុត្តរេសុ, និយតាវ យថារហំ.

៥៥៩. ក្រិយាទ្វិហេតុបដិឃេ,

នត្ថេវាលម្ពណាធិបោ;

មោមូហាហេតុកេ បាកេ,

លោកិយេ ច ន កោចិបិ.

៥៦០. ឧភយាធិបយុត្តា ច, សហជាធិបយោគិនោ;

ឧភយានិយតាធិប្បា, សហជានិយតាធិបា.

៥៦១. ឧភយវិប្បយុត្តា ច, បញ្ចធា តត្ថ មានសា;

អដ្ឋដ្ឋារស វីសំ ឆ, សត្តតិំស យថាក្កមំ.

៥៦២. បញ្ចាធិបតិយោគា ច, ចតុរាធិបយោគិនោ;

តិវិធាធិបយុត្តា ច, វិមុត្តាបិ ច សព្ពថា.

៥៦៣. សោឡសាថ សមត្តិំស, ឆឡេវាថ យថាក្កមំ;

សត្តតិំសតិវិធាតិ, ចតុធេវម្បិ និទ្ទិសេ.

៥៦៤. វីមំសាធិបយុត្តា ច, សហជាធិបយោគិនោ;

អាលម្ពាធិបយុត្តា ច, វិប្បមុត្តាបិ សព្ពថា.

៥៦៥. ចតុត្តិំស ទ្វិបញ្ញាស, អដ្ឋវីស យថាក្កមំ;

សត្តតិំសតិ ចេវេតិ, ចតុធេវម្បិ និទ្ទិសេ.

៥៦៦. សហជាធិបលទ្ធា តុ, ទ្វេបញ្ញាសេវ សព្ពថា;

អាលម្ពាធិបលទ្ធា ច, ឧភយាធិបលាភិនោ.

៥៦៧. អដ្ឋវីសេវ សព្ពេបិ, ទ្វេបញ្ញាសេវ សាធិបា;

សេសា និរាធិបា សព្ពេ, សត្តតិំសាបិ សព្ពថា.

៥៦៨. វេទនាទិវសេនេវំ, ញត្វា ភេទំ ចតុព្ពិធំ;

ឈានិន្ទ្រិយមគ្គពល-វសេនាបិ វិភាវយេ.

៥៦៩. វិតក្កហេដ្ឋិមំ ឈានំ, មនោបរំ មនិន្ទ្រិយំ;

ហេតុបរញ្ច មគ្គង្គំ, ពលំ វីរិយបច្ឆិមំ.

៥៧០. អវិតក្កេ បកតិយា, តស្មា ឈានំ ន វិជ្ជតិ;

អហេតុកេ ច មគ្គង្គំ, ពលញ្ចាវីរិយេ យថា.

៥៧១. អដ្ឋ រូបិន្ទ្រិយានេត្ថ, អគយ្ហន្តេវ សព្ពថា;

មគ្គិន្ទ្រិយពលដ្ឋេសុ, សមាធិ ច ន កង្ខិតេ.

៥៧២. កាមបុញ្ញេស្វនិយតា, វិរតីបិ អនុទ្ធតា;

បញ្ញានុត្តរចិត្តេសុ, ឥន្ទ្រិយត្តយភាជិតា.

៥៧៣. សេសា វុត្តានុសារេន, លព្ភមានជ្ឈានាទិកា;

តេហិ យុត្តា ច វិញ្ញេយ្យា, ចិត្តុប្បាទា យថាក្កមំ.

៥៧៤. សោមនស្សយុត្តា កាមេ, លោកុត្តរមហគ្គតេ;

បឋមជ្ឈានចិត្តា ច, បញ្ចឈានង្គិកា មតា.

៥៧៥. ទុក្ខុបេក្ខាយុត្តា កាមេ, បញ្ចវិញ្ញាណវជ្ជិតា;

ទុតិយជ្ឈានចិត្តា ច, ចតុឈានង្គិកា សិយុំ.

៥៧៦. ឈានង្គត្តយសំយុត្តា, តតិយជ្ឈានមានសា;

ចតុត្ថបញ្ចមារុប្បា, ឈានង្គទ្វយយោគិនោ.

៥៧៧. បញ្ចវិញ្ញាណយុគឡេ, ឈានង្គំ នត្ថិ កិញ្ចិបិ;

ឥត្ថំ ឈានានំ ភេទេន, បញ្ចធា មានសា ឋិតា.

៥៧៨. ឯកូនតិំសតិ សត្ត-តិំស ចេកាទសាបរេ;

ចតុត្តិំស ទសេវាថ, គណិកា តុ យថាក្កមំ.

៥៧៩. លោកុត្តរេសុ សព្ពេសុ, ឥន្ទ្រិយានិ នវុច្ចរេ;

តិហេតុកេសុ សព្ពេសុ, លោកិយេសុ បនដ្ឋធា.

៥៨០. ញាណេន វិប្បយុត្តេសុ, សត្តធាវ សមុទ្ធរេ;

សិតវោដ្ឋព្ពនា បុញ្ញេ, បញ្ចធាវ បកាសយេ.

៥៨១. វិចិកិច្ឆាសហគតេ, ចតុធាវ វិនិទ្ទិសេ;

តីណិន្ទ្រិយានិ វុត្តានិ, សេសាហេតុកមានសេ.

៥៨២. អដ្ឋ ចេកូនតាលីស, ទ្វាទស វាថ តេរស;

ឯកញ្ច សោឡស ចេតិ, ឆព្ពិធា តត្ថ សង្គហោ.

៥៨៣. បឋមានុត្តរំ ឈានំ, អដ្ឋមគ្គង្គិកំ មតំ;

សត្តមគ្គង្គិកំ នាម, សេសំ ឈានមនុត្តរំ.

៥៨៤. លោកិយំ បឋមំ ឈានំ, តថា កាមេ តិហេតុកំ;

បញ្ចមគ្គង្គិកា នាម, ចិត្តុប្បាទា បកាសិតា.

៥៨៥. សេសំ មហគ្គតំ ឈានំ, សម្បយុត្តា ច ទិដ្ឋិយា;

ញាណេន វិប្បយុត្តា ច, ចតុមគ្គង្គិកា មតា.

៥៨៦. ទោសមូលទ្វយញ្ចេវ, ឧទ្ធច្ចសហិតំ តថា;

ទិដ្ឋិយា វិប្បយុត្តា ច, មគ្គង្គត្តយយោគិនោ.

៥៨៧. វិចិកិច្ឆាសម្បយុត្តោ, វុត្តោ មគ្គោ ទុវង្គិកោ;

អមគ្គាហេតុកោ ចេតិ, សត្តធា តត្ថ សង្គហោ.

៥៨៨. អដ្ឋ ទ្វត្តិំសតិ ចេវ, ទស បញ្ចាធិកាបរេ;

តាលីស កមតោ សត្ត, ឯកញ្ចដ្ឋទសាបរេ.

៥៨៩. ពលានិ បន សត្តេវ, សព្ពត្ថាបិ តិហេតុកេ;

ញាណេន វិប្បយុត្តេសុ, ឆ ពលានិ សមុទ្ទិសេ.

៥៩០. ចតុធាកុសលេ ហោន្តិ, តិវិធា កង្ខិតេ បន;

ទ្វិពលំ សិតវោដ្ឋព្ពំ, អពលំ សេសមីរិតំ.

៥៩១. ឆព្ពិធោ សង្គហោ តត្ថ, សត្តតាលីសថាបរេ;

ទ្វាទសេកាទសេកំ ទ្វេ, សោឡសេតិ យថាក្កមំ.

៥៩២. ឥត្ថំ បញ្ច ឆ សត្ត ឆ-កោដ្ឋាសា កមតោ ឋិតា;

ចតុវីសតិ សព្ពេបិ, ឈានង្គាទិវសា កថា.

ឥតិ ចេតសិកវិភាគេ ចិត្តុប្បាទកថា និដ្ឋិតា.

សោឡសមោ បរិច្ឆេទោ.