ចុទ្ទសមោ បរិច្ឆេទោ

១៤. រាសិសម្ភវកថា

៤៩០. នវេវ យេវាបនកា, អដ្ឋារស ច រាសយោ;

នវភិំសតិសម្ភិន្នា, ទស ទ្វេ សវិភត្តិកា.

៤៩១. ឯកទ្វយតិចតុឆសត្តដ្ឋានានវជ្ជកេ;

សត្តវីសតិ សត្តេកោ, ទ្វយមេកោ បុនេកកោ.

៤៩២. ទសេវ យេវាបនកា, ឯកាទស ច រាសយោ;

អដ្ឋវីសតិសម្ភិន្នា, ទសេវ សវិភត្តិកា.

៤៩៣. ឯកទ្វយតិចតុក្កឆដ្ឋាននិយតា បន;

អដ្ឋារស ច សត្តេកោ, ឯកោ ចេកោវ បាបកេ.

៤៩៤. ទ្វេ យេវាបនកា ហោន្តិ, រាសយោ ច ចតុព្ពិធា;

តេរសេត្ថ អសម្ភិន្នា, តយោវ សវិភត្តិកា.

៤៩៥. ឯកទ្វយតិកដ្ឋានា, ទស ទ្វេកោ អហេតុកេ;

ឥច្ចានវជ្ជា សាវជ្ជា-ហេតុកេ យោគនិច្ឆយោ.

៤៩៦. សត្តាបិ នត្ថិ សាវជ្ជេ, និរវជ្ជេ បកាសកោ;

អហេតុកេ ច មគ្គាទិរាសយោ នត្ថិ ចុទ្ទស.

៤៩៧. អនវជ្ជា តុ សាវជ្ជេ, សាវជ្ជកានវជ្ជកេ;

ចិត្តុប្បាទម្ហិ នត្ថេវ, នត្ថោភយមហេតុកេ.

៤៩៨. សាវជ្ជា បន សាវជ្ជេ, អនវជ្ជានវជ្ជកេ;

គហេតព្ពា តុ សព្ពត្ថ, សាធារណា បកិណ្ណកា.

៤៩៩. ឈានបញ្ចកចិត្តេសុ, សត្តសដ្ឋិសុ និទ្ទិសេ;

ឈានង្គយោគភេទេន, រាសិភេទំ តហិំ តហិំ.

៥០០. ចតុឆក្កានវជ្ជេសុ, ញាណបីតិកតំ តថា;

ចតុវីស បរិត្តេសុ, ចតុធា ភេទមុទ្ទិសេ.

៥០១. សរាគវីតរាគានំ, អប្បមញ្ញាបវត្តិយំ;

ករុណាមុទិតា ហោន្តិ, កាមបុញ្ញមហាក្រិយេ.

៥០២. ឧបចារប្បនាបត្តា, សុខិតា សត្តគោចរា;

តស្មា ន បញ្ចមារុប្បេ, មហាបាកេ អនុត្តរេ.

៥០៣. សោតាបតិតុបេក្ខាសុ, បរិកម្មាទិសម្ភវេ;

ឈានានំ តុល្យបាកត្តា, តប្បាកេសុ ច លព្ភរេ.

៥០៤. វិរតី ច សរាគានំ, វីតិក្កមនសម្ភវា;

សម្បត្តេ ច សមាទានេ, កាមបុញ្ញេសុ លព្ភរេ.

៥០៥. តំតំទ្វារិកទុស្សិល្យ-ចេតនុច្ឆេទកិច្ចតោ;

មគ្គេ ច តុល្យបាកត្តា, ផលេ ច និយតា សិយុំ.

៥០៦. បវត្តាការវិសយភិន្នា បញ្ចាបិ សម្ភវា;

លោកិយេ លព្ភមានាបិ, វិសុំ ចេវ សិយុំ ន វា.

៥០៧. បាបា លព្ភន្តិ បាបេសុ, សត្ត ឆក្កេកកា កមា;

សរូបយេវោភយកា, និយតដ្ឋ ឆឡេតរេ.

៥០៨. សាធារណា ច សព្ពត្ថ, យថាវុត្តា បកិណ្ណកា;

តត្ថ ចេកគ្គតា នត្ថិ, ឥន្ទ្រិយាទីសុ កង្ខិតេ.

៥០៩. ឆន្ទាធិមោក្ខា យេវាបិ, វីសេកាទសវជ្ជិតេ;

ឧទ្ធច្ចមេកាទសសុ, មជ្ឈត្តមនវជ្ជកេ.

៥១០. សព្ពត្ថ មនសិការោ, តិទ្វេកទ្វិតិកាបរេ;

អដ្ឋដ្ឋវីសចតូសុ, បញ្ចទ្វីសុ យថាក្កមំ.

៥១១. សមុទាយវសេនេត្ថ, ឧទ្ធច្ចវិរតិត្តយំ;

សវិភត្តិកមញ្ញត្ថ, អវិភត្តិកមេវ តំ.

៥១២. ចិត្តុប្បាទេសុ តេនេតំ, វិភត្តិអវិភត្តិកំ;

ឥតិ សាធុ សល្លក្ខេយ្យ, សម្ភវាសម្ភវំ ពុធោតិ.

ឥតិ ចេតសិកវិភាគេ រាសិសម្ភវកថា និដ្ឋិតា.

ចុទ្ទសមោ បរិច្ឆេទោ.