តេរសមោ បរិច្ឆេទោ

១៣. រាសិយោគកថា

៤៤១. ឥតិ រាសិវីថិំ ញត្វា, លព្ភមានវសា ពុធោ;

តេសមេវាថ យោគម្បិ, ចិត្តុប្បាទេសុ ទីបយេ.

៤៤២. កាមាវចរកុសលស្ស, បឋមទ្វយមានសេ;

សព្ពេបិ រាសយោ ហោន្តិ, យថាសម្ភវតោ កថំ.

៤៤៣. ផស្សបញ្ចករាសី ច, ឈានបញ្ចករាសិ ច;

ឥន្ទ្រិយដ្ឋករាសី ច, មគ្គបញ្ចករាសិ ច.

៤៤៤. ពលសត្តករាសី ច, ហេតុកម្មបថត្តិកា;

ទសាវសេសា រាសី ច, លោកបាលទុកាទយោ.

៤៤៥. យេវាបនកនវកំ, និយតុទ្ធច្ចវជ្ជិតា;

អប្បមញ្ញាទ្វយញ្ចេវ, តិស្សោ វិរតិយោតិ ច.

៤៤៦. ឥតិ សត្តរសេវេតេ, ទេសិតា ច សរូបតោ;

យេវាបនករាសី ច, លព្ភន្តិដ្ឋារសាបិ ច.

៤៤៧. ឆប្បញ្ញាស បទានេត្ថ, ទេសិតានិ សរូបតោ;

ធម្មា បន សមតិំស, តត្ថ ហោន្តិ សរូបតោ.

៤៤៨. តានិ យេវាបនកេហិ, បញ្ចសដ្ឋិ បទានិ ច;

ធម្មា ចេកូនតាលីស, ភវន្តិ បន សម្ភវា.

៤៤៩. តត្ថ ទ្វាទស ធម្មា ច, ទេសិតា សវិភត្តិកា;

អវសេសា តុ សព្ពេបិ, អវិភត្តិកនាមកា.

៤៥០. ឯកទ្វិ ច តិចតុក្ក-ឆសត្តដ្ឋានិកា បន;

សត្តវីស ច សត្តេកោ, ទ្វេកេកោ ច យថាក្កមំ.

៤៥១. និយតា តុ ចតុត្តិំស, ធម្មាវ សហវុត្តិតោ;

យថាសម្ភវវុត្តិតោ, បញ្ចធា និយតា កថា.

៤៥២. តត្ថ ចានិយតេ សព្ពេ, គហេត្វា ច បហាយ ច;

បច្ចេកញ្ច គហេត្វាបិ, សត្តធា យោជនក្កមោ.

៤៥៣. សកិមេកូនតាលីស, ចតុត្តិំស យថាក្កមំ;

បញ្ចក្ខត្តុញ្ច យោជេយ្យ, បញ្ចតិំសាតិ បណ្ឌិតោ.

៤៥៤. រាសយោ ច បទានីធ, ធម្មន្តរវិភត្តិយោ;

សរូបយេវាបនកេ, និយតានិយតេ យថា.

៤៥៥. យោជនានយភេទញ្ច, គណនាសង្គហដ្ឋិតិ;

លព្ភមានានុមានេន, សល្លក្ខេន្តោ តហិំ តហិំ.

៤៥៦. ញាណំ ញាណវិយុត្តម្ហិ, ហិត្វា បីតិំ ឧបេក្ខិតេ;

វេទនា បរិវត្តេន្តោ, កាមបុញ្ញេ ច សេសកេ.

៤៥៧. មហាក្រិយេ ច យោជេយ្យ, បហាយ វិរតិត្តយំ;

អប្បមញ្ញា ច ហិត្វាថ, មហាបាកេ ច យោជយេ.

៤៥៨. តក្កាទិំ កមតោ ហិត្វា, សព្ពត្ថ វិរតិត្តយំ;

បញ្ចមេ អប្បមញ្ញាយ, ហិត្វា រូបេ ច យោជយេ.

៤៥៩. ហិត្វាប្បមញ្ញា យោជយេ, យថាឈានមនុត្តរេ;

លោកុត្តរិន្ទ្រិយញ្ចេវ, គហេត្វា វិរតិត្តយំ.

៤៦០. ឈានានិ ចតុតាលីស, សុខយុត្តានិ វត្តរេ;

ឧបេក្ខិតានិ តេវីស, បញ្ចមជ្ឈានេ ច សព្ពថា.

៤៦១. អប្បមញ្ញាវិរតិយោ, កាមបុញ្ញេសុ លព្ភរេ;

អប្បមញ្ញា រូបជ្ឈាន-ចតុក្កេ ច មហាក្រិយេ.

៤៦២. លោកុត្តរេសុ សព្ពត្ថ, សម្ភោតិ វិរតិត្តយំ;

នត្ថិទ្វយម្បិ អារុប្បេ, មហាបាកេ ច បញ្ចមេ.

៤៦៣. វិតក្កាទិត្តយំ បញ្ញា, បញ្ច ចានិយតា ចលា;

ហានិពុទ្ធិវសា សេសា, ន ចលន្តិ កុទាចនំ.

៤៦៤. ពាវីសតិវិធោ ចេត្ថ, សង្គហោ អនវជ្ជកេ;

ទ្វយទ្វយវសា ចេវ, ឈានបញ្ចកតោបិ ច.

៤៦៥. ឥតិ ញត្វានវជ្ជេសុ, រាសិសង្គហ សម្ភវំ;

សាវជ្ជេសុបិ វិញ្ញេយ្យា, វិញ្ញុនា រាសយោ កថំ.

៤៦៦. លោភមូលេសុ បឋមេ, ផស្សបញ្ចករាសិ ច;

ឈានបញ្ចករាសី ច, តថេវិន្ទ្រិយបញ្ចកំ.

៤៦៧. មគ្គពលចតុក្កញ្ច, ហេតុកម្មបថទុកា;

លោកនាសករាសី ច, សមថោ សមថទ្ទុកា.

៤៦៨. តត្រមជ្ឈត្តតំ ហិត្វា, យេវាបនកនាមកា;

ចត្តារោ ចេតិ លព្ភន្តិ, តត្ថេកាទស រាសយោ.

៤៦៩. ទ្វត្តិំសេវ បទានេត្ថ, ទេសិតានិ សរូបតោ;

តានិ យេវាបនកេហិ, ឆត្តិំសេវ ភវន្តិ ច.

៤៧០. អសម្ភិន្នបទានេត្ថ, សមវីសតិ សម្ភវា;

សវិភត្តិកនាមា ច, នវ ធម្មា បកាសិតា.

៤៧១. ឯកទ្វយតិចតុក្ក-ឆដ្ឋាននិយតា បន;

ឯកាទស ឆឡេកា ច, កមេនេកោ បុនេកកោ.

៤៧២. នត្ថេវានិយតា ហេត្ថ, យេវាបនកនាមកា;

យោជនានយភេទោ ច, តស្មា តត្ថ ន វិជ្ជតិ.

៤៧៣. មានោ ច ថិនមិទ្ធញ្ច, ឥស្សា មច្ឆរិយំ តថា;

កុក្កុច្ចមិតិ សាវជ្ជេ, ឆឡេវានិយតា មតា.

៤៧៤. មានោ ទិដ្ឋិវិយុត្តេសុ, សសង្ខារេសុ បញ្ចសុ;

ថិនមិទ្ធំ តយោ សេសា, បដិឃទ្វយយោគិនោ.

៤៧៥. ឥច្ចេវមដ្ឋ សាវជ្ជា, អនវជ្ជដ្ឋវីសតិ;

ឆត្តិំស មានសា សព្ពេ, ហោន្តានិយតយោគិនោ.

៤៧៦. តេហិ យុត្តា យថាយោគំ, ឯកទ្វិត្តយបញ្ចហិ;

ទ្វេ ទ្វាវីសំ តយោ ចេវ, នវ ចាថ យថាក្កមំ.

៤៧៧. ឥតិ វុត្តានុសារេន, លព្ភមានវសា បន;

តទញ្ញេសុបិ យោជេយ្យ, សាវជ្ជេសុ យថាក្កមំ.

៤៧៨. លោភមូលេសុ លោភញ្ច, ទោសញ្ច បដិឃទ្វយេ;

មោហមូលេ កង្ខុទ្ធច្ចំ, គហេត្វា ហេតុរាសិយំ.

៤៧៩. ទិដ្ឋិំ ទិដ្ឋិវិយុត្តម្ហិ, ហិត្វា បីតិមុបេក្ខិតេ;

វេទនំ បរិវត្តេន្តោ, ទោសមូលេ ច បណ្ឌិតោ.

៤៨០. តថា កម្មបថំ ទិដ្ឋិំ,

បីតិំ ឆន្ទញ្ច មោមុហេ;

កង្ខិតេ អធិមោក្ខញ្ច,

ហិត្វា យោជេយ្យ រាសយោ.

៤៨១. ចិត្តស្ស ឋិតិំ បត្តាសុ, ចិត្តស្សេកគ្គតា បន;

កង្ខិតេ បរិហីនាវ, ឥន្ទ្រិយាទីសុ បញ្ចសុ.

៤៨២. ឥតិ ទ្វាទសធា ញត្វា, សាវជ្ជេសុបិ សង្គហំ;

អហេតុកេបិ វិញ្ញេយ្យា, យថាសម្ភវតោ កថំ.

៤៨៣. អដ្ឋារសាហេតុកេសុ, បញ្ចវិញ្ញាណមានសេ;

ផស្សបញ្ចករាសី ច, ឈានដ្ឋានទុកំ តថា.

៤៨៤. ឥន្ទ្រិយត្តិករាសី ច, យេវាបនកនាមកោ;

ឯកោ មនសិការោតិ, ចត្តារោ រាសយោ សិយុំ.

៤៨៥. អសម្ភិន្នា បនដ្ឋេវ, ទ្វេ តត្ថ សវិភត្តិកា;

ឯកទ្វយតិកដ្ឋានា, ឆឡេកោ ច បុនេកកោ.

៤៨៦. មនោធាតុត្តិកាហេតុ-បដិសន្ធិយុគេ បន;

វិតក្កោ ច វិចារោ ច, អធិកា ឈានរាសិយំ.

៤៨៧. សុខសន្តីរណេ បីតិ, ទុតិយាវជ្ជនេ បន;

វីរិយញ្ច សមាធិញ្ច, លព្ភតិន្ទ្រិយរាសិយំ.

៤៨៨. អធិកា ហសិតេ ហោន្តិ, បីតិ ច វីរិយាទយោ;

យេវាបនាធិមោក្ខោ ច, បញ្ចវិញ្ញាណវជ្ជិតេ.

៤៨៩. ឥច្ចានវជ្ជេ ពាវីស,

សាវជ្ជេ ទ្វាទសាបរេ;

យោគា ហេតុម្ហិ បញ្ចេតេ,

តាលីសេកូនកា កថាតិ.

ឥតិ ចេតសិកវិភាគេ រាសិយោគកថា និដ្ឋិតា.

តេរសមោ បរិច្ឆេទោ.