១២. រាសិវិនិច្ឆយកថា

៤១៦. តត្ថ វិញ្ញាណកាយា ឆ, សត្ត វិញ្ញាណធាតុយោ;

ផស្សា ចក្ខាទិសម្ផស្សា, ឆព្ពិធា សត្តធាបិ ច.

៤១៧. ចក្ខុសម្ផស្សជាទីហិ, ភេទេហិ បន វេទនា;

សញ្ញា ច ចេតនា ចេវ, ភិន្នា ឆធា ច សត្តធា.

៤១៨. ចិត្តុប្បាទេសុ ធម្មា ច, ខន្ធាយតនធាតុយោ;

អាហារា ច យថាយោគំ, ផស្សបញ្ចករាសិយំ.

៤១៩. សព្ពេ សង្គហិតា ហោន្តិ, តស្មា នាមបរិគ្គហោ;

មូលរាសិ ច សោ សព្ព-សង្គហោតិ បវុច្ចតិ.

៤២០. ឈានរាសិម្ហិ បញ្ចេវ, ធម្មា សត្តប្បភេទតោ;

ឥន្ទ្រិយានិ ច ពាវីស, ធម្មតោ បន សោឡស.

៤២១. នវ មគ្គង្គធម្មា ច, ភិន្នា ទ្វាទសធាបិ តេ;

ឆឡេវ ហេតុយោ តត្ថ, ទេសិតា កង្ខិតុទ្ធវា.

៤២២. ទស កម្មបថា ធម្មា, ឆឡេវ បន ទេសិតា;

សេសាវ ទសធម្មេហិ, សមានា ចតុរាសយោ.

៤២៣. បញ្ញា ទសវិធា តត្ថ, វេទនា នវធា ឋិតា;

សមាធិ សត្តធា ហោតិ, វីរិយំ បន បញ្ចធា.

៤២៤. សតិ ភិន្នា ចតុធាវ, វិតក្កោ តិវិធោ មតោ;

ទ្វិធា ចិត្តាទយោ ហោន្តិ, ទសបញ្ចេវ សម្ភវា.

៤២៥. សេសា ទ្វត្តិំស សព្ពេបិ, ធម្មា ឯកេកធាបិ ច;

ហិត្វា រូបិន្ទ្រិយានេតេ, វិភាគា អដ្ឋធា កថំ.

៤២៦. ផស្សោ ច ចេតនា សញ្ញា, វិចារោ បីតិ ជីវិតំ;

និរវជ្ជា ឆ យុគឡា, សាវជ្ជមោហកង្ខិតា.

៤២៧. យេវាបនកធម្មា ច, វិរតុទ្ធច្ចវជ្ជិតា;

ទ្វាទសា ចេតិ សព្ពេបិ, ទ្វត្តិំសកេកធា តថា.

៤២៨. ចិត្តំ មនិន្ទ្រិយំ ចិត្តំ, សទ្ធា សទ្ធិន្ទ្រិយំ ពលំ;

ពលេសុ លោកិយា វុត្តា, លោកិយេ ច ទុកទ្វយេ.

៤២៩. លោភាលោភាទិកា ទ្វេ ទ្វេ,

ចត្តារោ ហេតុរាសិយំ;

មិច្ឆាទិដ្ឋិ ច មគ្គង្គេ,

បញ្ចកម្មបថេបិ តេ.

៤៣០. យេវាបនករាសិម្ហិ, ទេសិតា វិរតុទ្ធវា;

មគ្គហេតូសុ ចេវេតិ, ទ្វិធា បញ្ចទស ឋិតា.

៤៣១. វិតក្កោ ឈានមគ្គេសុ, តិវិធា នវធា បន;

វេទនា មូលរាសិម្ហិ, តថា ឈានិន្ទ្រិយេសុ ច.

៤៣២. ឥន្ទ្រិយមគ្គរាសិម្ហិ, ពលបិដ្ឋិទុកត្តិកេ;

ចតុធា សតិ តត្ថេវ, វីរិយម្បិ ច បញ្ចធា.

៤៣៣. សមាធិ សត្តធា វុត្តោ, ឈានង្គេសុ ច តត្ថ ច;

តត្ថេវ ទសធា បញ្ញា, ហេតុកម្មបថេសុ ច.

៤៣៤. ទសនវសត្តបញ្ចចតុតិទ្វេកធា ឋិតា;

ឆឡេកកា បញ្ចទស, ទ្វត្តិំស ច យថាក្កមំ.

៤៣៥. អដ្ឋ វិភាគសង្ខេបា, បទានិ ទសធា សិយុំ;

តេបញ្ញាសេវ ធម្មា ច, អដ្ឋារស ច រាសយោ.

៤៣៦. ឥតិ ធម្មវវត្ថានេ, ធម្មសង្គណិយំ បន;

ចិត្តុប្បាទបរិច្ឆេទេ, ឧទ្ទេសនយសង្គហោ.

៤៣៧. បទានិ ចតុរាសីតិ, ទេសិតានិ សរូបតោ;

យេវាបនកនាមេន, សោឡសេវ យថារហំ.

៤៣៨. តត្ថានិយតនាមានិ, បទានេកាទសេវ តុ;

វុត្តានេកូននវុតិ, និយតានេវ សម្ភវា.

៤៣៩. អសម្ភិន្នបទានេត្ថ, តេបញ្ញាសេវ សព្ពថា;

ចិត្តចេតសិកានំ តុ, វសេន បរិទីបយេ.

៤៤០. វិភាគបទធម្មានំ, វសេនេវំ បកាសិតោ;

ចិត្តចេតសិកានំ តុ, កមតោ រាសិនិច្ឆយោតិ.

ឥតិ ចេតសិកវិភាគេ រាសិវិនិច្ឆយកថា និដ្ឋិតា.

ទ្វាទសមោ បរិច្ឆេទោ.