៩. បឋមបព្ពតូបមសុត្តំ

១១២៩. ‘‘សេយ្យថាបិ, ភិក្ខវេ, បុរិសោ ហិមវតោ បព្ពតរាជស្ស សត្ត សាសបមត្តិយោ បាសាណសក្ខរា ឧបនិក្ខិបេយ្យ. តំ កិំ មញ្ញថ, ភិក្ខវេ, កតមំ នុ ខោ ពហុតរំ – យា វា សត្ត សាសបមត្តិយោ បាសាណសក្ខរា ឧបនិក្ខិត្តា, អយំ វា ហិមវា បព្ពតរាជា’’តិ? ‘‘ឯតទេវ, ភន្តេ, ពហុតរំ, យទិទំ – ហិមវា បព្ពតរាជា; អប្បមត្តិកា សត្ត សាសបមត្តិយោ បាសាណសក្ខរា ឧបនិក្ខិត្តា. សង្ខម្បិ ន ឧបេន្តិ, ឧបនិធម្បិ ន ឧបេន្តិ, កលភាគម្បិ ន ឧបេន្តិ ហិមវន្តំ បព្ពតរាជានំ ឧបនិធាយ សត្ត សាសបមត្តិយោ បាសាណសក្ខរា ឧបនិក្ខិត្តា’’តិ. ‘‘ឯវមេវ ខោ, ភិក្ខវេ, អរិយសាវកស្ស…បេ… យោគោ ករណីយោ’’តិ. នវមំ.