៦. បាណសុត្តំ

១១០៦. ‘‘សេយ្យថាបិ, ភិក្ខវេ, បុរិសោ យំ ឥមស្មិំ ជម្ពុទីបេ តិណកដ្ឋសាខាបលាសំ តច្ឆេត្វា ឯកជ្ឈំ សំហរេយ្យ; ឯកជ្ឈំ សំហរិត្វា សូលំ ករេយ្យ. សូលំ ករិត្វា យេ មហាសមុទ្ទេ មហន្តកា បាណា តេ មហន្តកេសុ សូលេសុ អាវុនេយ្យ, យេ មហាសមុទ្ទេ មជ្ឈិមកា បាណា តេ មជ្ឈិមកេសុ សូលេសុ អាវុនេយ្យ, យេ មហាសមុទ្ទេ សុខុមកា បាណា តេ សុខុមកេសុ សូលេសុ អាវុនេយ្យ. អបរិយាទិន្នា ច, ភិក្ខវេ, មហាសមុទ្ទេ ឱឡារិកា បាណា អស្សុ.

‘‘អថ ឥមស្មិំ ជម្ពុទីបេ តិណកដ្ឋសាខាបលាសំ បរិក្ខយំ បរិយាទានំ គច្ឆេយ្យ. ឥតោ ពហុតរា ខោ, ភិក្ខវេ, មហាសមុទ្ទេ សុខុមកា បាណា, យេ ន សុករា សូលេសុ អាវុនិតុំ. តំ កិស្ស ហេតុ? សុខុមត្តា, ភិក្ខវេ, អត្តភាវស្ស. ឯវំ មហា ខោ, ភិក្ខវេ, អបាយោ. ឯវំ មហន្តស្មា ខោ, ភិក្ខវេ, អបាយស្មា បរិមុត្តោ ទិដ្ឋិសម្បន្នោ បុគ្គលោ ‘ឥទំ ទុក្ខ’ន្តិ យថាភូតំ បជានាតិ…បេ… ‘អយំ ទុក្ខនិរោធគាមិនី បដិបទា’តិ យថាភូតំ បជានាតិ.

‘‘តស្មាតិហ, ភិក្ខវេ, ‘ឥទំ ទុក្ខ’ន្តិ យោគោ ករណីយោ…បេ… ‘អយំ ទុក្ខនិរោធគាមិនី បដិបទា’តិ យោគោ ករណីយោ’’តិ. ឆដ្ឋំ.